曼聯迎嚟今季英超既第二場，終於打開勝利之門，全場被白禮頓壓住嚟踢，都能夠以2:3險勝白禮頓。小編首先喺到，恭喜其餘十九隊英超既球隊先。今場波，曼聯沿用番上一季季尾既勝利十一人。喺比賽開始之前，大家對領隊繼續用連迪洛夫有唔少微言，或者係幾於上一場波既表現。但今場見到連迪洛夫都包到唔少球，表現比上一場好咗好多，唔知大家又會唔會對連迪洛夫改觀呢？始終小編都喺上一篇文入面提及過，上場對水晶宮，連迪洛夫既表現某程度上都有關領隊既問題。如果要呢個身型單薄、頭槌又唔好既中堅對付一啲衝得、撞得既球員，確實會好容易出事。好似今場咁，曼聯選擇用馬迪去做呢個角色，將連迪洛夫既缺點收埋，效果咪幾好... 希望蘇斯克查會繼續呢個戰術啦。
喺分析之前，照舊講番少少今場曼聯既表現先。曼聯沿用番勝利十一人，理論上應該夾得幾好，無論喺默契或者係戰術上，都應該起碼可以好似上季一樣。但今場比球迷睇到既就係，大部分球員仍然狀態低迷，另外戰術唔止冇進步，仲超退步。曼聯整場比賽都做唔到太多入肉既攻勢，或者係話曼聯整場波都冇乜攻勢。全場射門就只有7次射門，相反白禮頓就有18次射門。而中目標次數兩隊就差唔多，白禮頓有5次，而曼聯有3次。換言之，曼聯喺中目標轉換入球既百分比，係100%，都唔知呢個數據值唔值得高興。雖然白禮頓只有5次中目標既嘗試，但呢場波入面，竟然係有5次中柱既射門。
上下半場曼聯一直都冇乜太多機會，就連控球權都唔高，整個節奏以至比賽都好似係白禮頓帶領住，整個感覺就好似白禮頓仲要高曼聯一班波。上半場曼聯一直搵唔到機會之餘，仲要因為般奴喺禁區入面侵犯對手而輸十二碼，先失一球。及後喺唔夠5分鐘既時候，左閘既梳爾引球推進，壓過三名對手，爆落底線被對手侵犯，獲得一個罰球。罰球由般奴處理，般奴開去大尾柱比到馬迪，然後馬迪立即彈入中間，令對手登克犯錯，射入自己龍門。最終以1:1賽和上半場，握手言和進入更衣室。
下半場曼聯51分鐘，美臣格連活一個非常毒既傳中球，搵到師兄華舒福，最後華舒福搶點成功，將皮球成功射入龍門，但可惜原來入球之前，華舒福已經處於越位既位置，入球無效。但要入既始終都係要入，3分鐘之後曼聯一個反擊，再一次搵到華舒福，今次華舒福冇越位之餘亦都成功地再一次射入，令曼聯反超前1:2。但曼聯喺入咗波之後，白禮頓亦都隨即換咗一個打法，令到曼聯喺中段至尾段，經常被打穿。當中最大漏洞既一定係曼聯既右閘位置。曼聯先後喺右閘既位置走甩對手，令對手有多次機會威脅到曼聯，可惜唔係過唔到門將，就係過唔到門柱。儘管之後曼聯先後換入費特以及拜利，呢一個位置仍然係冇改善。而比賽時間去到95分鐘，白禮頓終於搵到機會再一次射入曼聯龍門，將比數改寫成為2:2。大家以為比賽就咁結束既時候，球證就話再補多少少時間，曼聯喺96分鐘獲得角球機會，中堅麥佳亞頭槌攻門，可惜皮球彈出，其後球證嗚笛，結束比賽。但曼聯球員既投訴，令到球證需要Check VAR，Check完之後發現，原來麥佳亞既攻門，係擊中咗對方球員既手，所以改判十二碼。而曼聯劊子手般奴亦都不負所托成功射入，最後戲劇性地反勝2:3，以99%運氣以及1%能力下全取三分。
講完整場比賽既表現之後，就講下今場波曼聯既一啲大問題。首先曼聯今場既後備名單入面，有甸軒達臣、拜利、福素文沙、費特、麥湯文尼、連加特以及雲達碧克。中場球員足足有四個咁多，而左右閘既後備就係福素文沙包辦曬，中鋒就一個都冇，而賽前就冇講過恩哈路有傷。其實小編都冇乜所謂，因為一直都覺得續借都係用嚟雪。但係我就喺到諗，萬一前場啞火到時點算呢？一直以來陣式又唔會變喎，突然因為冇其他中鋒入替而改陣式，又會唔會出事呢？不過好彩，以上既事情都只係小編既過度猜測。
而喺換人嗰方面，今場其實都算係合理。雖然落場既人腳就尚算正確，但改變就真係睇唔出。下半場中後段，曼聯比對手攻到幾乎抖唔到氣，換入費特，換出普巴，有助改善中場活力以及令連接後場同前場既人手多咗。概念非常正確，但效果就非常一般。另外，換入拜利收起美臣格連活亦都係加強防守，以三中堅防守住對手三中鋒，令到右閘壓力減低。但亦都係效果麻麻，雲比沙卡嗰邊，仍然係放題，令白禮頓不斷威脅迪基亞。
其實人就換咗，但係作為領隊既蘇帥，見到冇改變，後備席又再冇其他人可以調動既時候，係咪可以喺場邊嗌住呢？呢一點小編真係永遠見到都好燥，鏡頭永遠影埋去都係同小編同樣、動作一模一樣。橋住雙手，黑曬口面咁望住個Mon，差在小編多幾塊薯片同得閒望下電話。之前傑斯都講過，曼聯球員或者心態出現問題，如果係真的話，領隊又有冇責任呢？好似喺屋企到睇緊波咁，唔肯企出嚟都算，嗌都唔嗌下，到底係想點。小編曾經都踢過好多比賽，當小編踢得差或者踢到亂曬，有個領隊喺到嗌住真係成件事唔同啲。曼聯本來已經冇乜人喺場內嗌住，領隊都唔做既話，一啲心理質素差啲既球員，真係只會愈踢愈差。
另外上一篇文章講對水晶宮既比賽，有講到蘇斯克查喺準備工作入面就得唔夠。當時話曼聯今季對水晶宮失波既方式同上一季對水晶宮既失波方式一模一樣。上場做唔足功課估唔到今場都一樣。上一季復賽之後對白禮頓贏得非常輕鬆，當時曼聯既對手搵唔到方法點樣去擊敗曼聯。但係喺上一季復賽對修咸頓既比賽入面，普巴既甩漏已經話曬比全世界知，點樣成功都解決曼聯。答案就係前場壓迫。之後復賽既比賽，曼聯愈打愈吃力就係因為所有球隊都參考修咸頓做緊迫，而修咸頓之前既比賽，所有對手都係縮後等曼聯攻。
簡單啲講，姐係上一季季尾，曼聯喺原本既一套打法入面，已經完完全全被看透，但點解今季曼聯仍然係冇改善呢？所謂不進則退就係呢一種。今場曼聯喺後場就係全程被壓住，令到個波根本放唔到上去。大家成日話係普巴既問題，但當費特出咗嚟，換咗人之後，其實問題仍然存在，原因喺邊？小編講咗好多次，就係中場支援既人數唔夠。永遠現身出嚟既就只有普巴，而當普巴攞到波既時候，又只有般奴現身。試問喺咁既情況底下，對手點會唔識防守呢？呢一點小編真係講咗N咁多次，就算買幾多人，換幾多次管理層都好，冇戰術改變，呢一點永遠都唔會改變。今日控球率少過對手既原因，正正就因為後場冇人支援，迫住要大腳踢上去，之後個波就跌落對手到。
控球次數經常喺對手到，曼聯又運唔到個波上去，咪令到今場波曼聯只有零星既攻門囉。至於入球既出現，小編唔講嗰兩球死球，只講第二球。打既戰術正正就係摩連奴時期既防守反擊，只不過傳波嗰個以前係普巴，今日係般奴。換言之，今日完完全全又係冇任何戰術比到大家睇。
其實人腳曼聯今季就冇變，踢法又冇變，戰術又比對手睇通睇透既時候，曼聯仲想唔改變，係咪真係等死呢？今場波完咗之後，冇一個球迷表示滿意，仲有好多球迷寧願愛隊輸波，到底點解會搞成咁呢？真係仲係管理層既問題咁簡單？
比賽完咗之後，小編真係好灰，以前曼聯反勝，仲要係補時反勝，一定開心到訓唔著。但今日竟然想曼聯輸波，自己頓時問咗自己一句，「我係咪唔愛曼聯喇？」，定真係愛之深... 定係呢啲就係某啲人講既勝利球迷呢？其實小編真係唔介意曼聯既成績如何，但係踢成咁，真係好難接受。小編好記得喺莫耶斯帶領既時候，有一句說話：「曼聯贏波既時候，我同你君臨天下；曼聯輸波既時候，我陪你東山再起。」，但如果踢成咁，又毫無進步既時候，球迷們既心，真係會比曼聯傷透。
蘇斯克查喺賽前講過，曼聯中場有好多個配搭，好多個組合。小編真係好同意，但係如果咁多個配搭咁多個組合既時候，都係沿用番同一個配搭、戰術既時候。再多既，又如何呢？
請按此登錄後留言。未成為會員? 立即註冊