今季會係達洛特留喺曼聯既最後一季？ 精選

最近達洛特離隊既傳聞愈嚟愈多，其中有兩支大球會都話想簽達洛特。分別係西班牙既巴塞同埋法國既巴黎聖日耳門，兩支球隊一直都係歐聯既常客。相反曼聯近年浮浮沉沉，今季更因為疫症可能又令球隊下季都冇機會踢到歐聯。加上達洛特喺曼聯一直都冇正選位置，無論有冇傷患困擾左右閘既正選位置都未到佢，而翼鋒既位置，曼聯又偏好於羅致新球員多過用球隊成員。種種原因下，呢一季會唔會係達洛特既最後一季呢？
達洛特(Diogo Dalot)
年齡：21歲(1999年3月18日)
身高：183CM
國籍：葡萄牙
慣用腳：右腳
位置：右閘、右翼、左閘


2018年6月加盟曼聯既達洛特，起初加盟大家對達洛特既期望都好大。好可惜，加盟曼聯後大部份時間都係被傷患困擾或者被列入後備名單內，加盟至今只係踢咗33場，而今季足總盃對燦美爾既賽事先射入加盟曼聯既第一球。雖然喺數據上面達洛特比較遜色，但係達洛特係咪真係咁差呢？



小編認為以佢既實力，如果唔受傷患困擾，實力應該可以去到當年喺熱刺既查比亞。達洛特同查比亞最相似既地方，就係佢地既傳中球，急勁加上準繩唔錯，可以話係防守球員既惡夢。呢種傳中球可算係現今球壇最具威脅性以及最有效既入球方式。好多數一數二既球星都掌握呢種技巧，令到球隊喺進攻方面更具侵略性。好似曼城既迪布尼、利物浦既阿奴等等就係呢個技巧既佼佼者。達洛特本來已經具有呢種能力，雖然可能準繩以及技巧上面，仍未去到熟能生巧既階段，但如果達洛特喺呢方面下多啲苦功，喺未來既日子定必係球隊既其中一把刀。


另一個達洛特既優點就係佢有一定程度既過人能力。達洛特好常會喺邊線上面，勇於嘗試好多一對一既突破，憑住佢熟識既插花技巧以及爆發力，令佢容易時常騰出空位，隨即傳中。呢一點都係達洛特其中既一個殺著，好多時防守既一方都會集中於防守喺對手既翼鋒球員身上而忽略咗閘位球員。如果達洛特能夠踢閘位既話，佢既威脅就會更加大，令防守一方更加難去處理。現時好多球隊當進攻既時候，都會要求閘位球員上前做疊瓦或者其他配合，達洛特喺呢一點又係比好多傳統既閘位球員優勝，包括現時隊內既雲比沙卡。
雖然達洛特喺呢兩方面都比好多球員優勝，但係喺佢身上都搵到好多缺點。第一當然係傷患，作為足球員最可怕既就係傷患，無論球員能力有幾高，表現有幾好，傷患永遠都係球員最大既惡夢，輕則重傷一段時間，重則可能令實力下滑，再上唔番本來既實力。達洛特雖然喺曼聯既時間唔耐，但原來已經因為傷患錯失咗32場波。如果達洛特喺未來既時間，再唔能夠克服傷患，相信對佢既球員生涯算係一個好大既影響。


另外，作為防守球員之一既達洛特，確實不得不提及佢既防守能力。達洛特呢位球員雖然主打閘位為主，但防守既能力比進攻還要差。好多時都會有失位既情況發生，加上出腳唔係十分準而球員本身又容易出腳，令佢喺防守上面既表現經常表現得患得患失，同時亦因為咁，令閘位既位置變成球隊既弱點。

幸好，達洛特喺心態上以及勤力令佢仍然被喻為一位可造之才。達洛特喺雲比沙卡加盟後，仍然樂於接受挑戰，更揚言要挑戰雲比沙卡既正選位置，心態上實在值得加許。雖然係隊中，達洛特一直都未得到一個正選位置，但言下之意令大家都覺得佢會傾向於留隊爭取正選一席位多於為正選位置離隊加盟其他球會。達洛特唔經唔覺已經21歲，表現仍然未算太好，仲有好多方面可以改善。但勝在心態上仍然保持樂觀，加上有國家隊隊友般奴喺隊內既互助支持，達洛特喺曼聯既日子好似仲有大把時間。球員可能會比較傾向留隊，但相反曼聯留唔留達洛特喺球隊，相信仲有好多討論空間，始終曼聯一直都希望羅致一個右翼球員，加上達洛特喺加盟至今，都係傷多踢少，如其繼續留佢喺球隊，更有可能既會係因為第三球隊出合適既價錢，而賣走達洛特。


曾被喻為明日之星既達洛特到底喺未來既日子何去何從，仍然存在太多不穩定既因素。能力上以及態度上，佢依然值得留喺曼聯。但球隊會唔會放棄達洛特，或者達洛特會唔會因為上陣機會不足而離隊，相信今夏既轉會窗會係佢留唔留低喺隊中既最大轉捩點。