到底曼聯今時今日既文化係咪已經同以往背道而馳 精選

唔知幾時開始，曼聯變成咁。遲熟或者第一季上一隊，打得唔好既球員，就唔能夠喺曼聯繼續踢落去。講緊既係高美斯同鍾泰希。今季本身機會已經唔多，當有機會為一隊上陣，表現又唔好。因為咁，曼聯球迷好多都想曼聯借走、甚至賣走佢地。到底曼聯今時今日既文化係咪已經同以往背道而馳？
辛祖喺多蒙特既表現，可以話係冇得彈。而曼聯喺右翼呢個位置上面，一直都未搵到一個最合適既球員，儘管好多球員都可以打右翼，但始終能力未夠，令大部份曼聯球迷更加想要辛祖，好讓右翼呢個進攻點更加強。但事實上，曼聯仍然有兩位同樣係翼鋒既年青球員等緊機會，分別係高美斯同鍾泰希。好多曼聯球迷亦都因為咁，有截然不同既諗法。公說公有理，婆說婆有理。今日小編唔係想同大家探討應唔應該買辛祖，反而係想分享下小編對曼聯現時既文化。


一直以來，曼聯都好重視青訓。由其是費格遜帶領既年代，但自從費格遜既離開。曼聯青訓上一隊既球員愈嚟愈少，就算好多球員有被提拔都好。好多球員都唔能夠長時間留喺球隊。呢個問題喺雲高爾時期最令人印象深刻。當年雲高爾提拔咗好多年青球員，好似華利拿、波夫域積遜、麥尼亞、布歷基、華舒福、連加特、皮里拉、福素文沙等等。今時今日，留得低喺曼聯既就只有後者既嗰四位球員。

可能有球迷話因為佢地能力唔高，所以唔能夠留隊，咁講都算合理。不過如果用以上既講法，咁依加留得低喺曼聯嗰四個球員，能力高既就只有華舒福一人。咁其餘嗰三個係咪應該一早就要走呢？再講，當年以上幾個喺好多場英超比賽入面都打正選，證明佢地就算實力未算係頂級都叫做有能力先啦。點解呢啲球員最後唔能夠留喺曼聯繼續打落去，亦都唔能夠以好價錢賣出去。小編認為其中有兩大原因，分別就係上陣時間不足以及球會唔重視呢啲球員。
年青球員一直以來最需要既就係機會同埋得到球會既認同。然而，自費格遜年代之後，曼聯好似就變咗曼城咁。每當嗰個位置實力未夠好，就會用金錢去補強，而唔會選擇相信自家既青訓球員。可能會有球迷認為，都要有球員打得好或潛力高先可以相信。咁小編想問當年吉遜(Darron Gibson)，佢好好波咩，點解費Sir會肯用呢啲球員？


球員總有啲遲熟、有啲早熟；球員表現總有啲踢得好、有啲踢得唔好。點解今季表現未成熟或者踢得唔好就要賣，而唔係留個位置比佢地試多啲，踢多啲呢？其實好多球員過咗25歲，佢地既能力同表現先出嚟，好似華迪、簡迪等等。但係依加既曼聯，無論係領隊甚至球迷，都喺球員廿歲已經將佢地既能力定型。話高美斯太矮，永遠唔適合英超賽場。話鍾泰希只係識衝，養唔大。如果係咁，簡迪同高美斯一樣高喎，姐係簡迪都唔會踢得掂英超？艾達馬查奧爾都係爆、都係衝姐，又會咁多球隊怕咗佢？小編用以上既例子唔係想比較兩位球員之間既能力。只係想表達，咁快就去定型球員既能力，係錯既諗法。


其實年青球員最快、最容易進步既方法就係踢多啲高水平賽事，當球員上陣機會多，水平上升自然會愈嚟愈快。相反，只係喺球會到不斷做訓練，儘管練多十年八年，進步都唔會比不斷踢高水平比賽既球員嚟得快，大家有玩開FM既都好清楚呢一點啦。高美斯、鍾泰希，喺U隊既表現，基本上已經算係超班，繼續喺U隊入面屈人地機，進步都唔會大得去邊。你叫佢地借出去，然後球會買辛祖。咁一年之後，佢地番嚟曼聯踢咩位呢？你話球會有一個好穩定既球員，而嗰位球員年紀都差唔多老喇，借出去一年之後再接手打嗰個位，都比較合理。但如果球會之後再喺佢地打到既位置入面補強，講到尾姐係一年後番嚟，都唔會比你打啦。咁點樣留住呢啲有潛力既年青人呢？


普巴、辛祖，前車可鑑。兩位喺青訓期間，都好希望有一隊正選機會，能夠喺高水平賽事踢波，球會喺當時比唔到呢個機會佢地，佢地就決定離開。最後一個喺祖雲達斯、一個喺多蒙特都打正選，愈踢愈好，進步得好快。如果高美斯、鍾泰希喺之後既日子，都唔能夠得到認同以及上陣機會，其實最後既後果都會係一樣。

相比起曼聯，三支倫敦球會就好得多。阿仙奴有位置留比佢地既寶，分別係Martinelli、Nketiah、Nelson、Willock等等。車路士有位置留比佢地既寶，分別係Reece James、Emerson、Mount、Gilmour、Hudson-Odoi等等。熱刺有位置留比佢地既寶，分別係Bergwijn、Gedson Fernandes、Japhet Tanganga等等。因為三支球隊喺佢地既位置上面都有老化既跡象，或者能力不足既問題。但相反，曼聯本來前線既陣容已經好後生，而位置上基本上就差右翼，如果再喺前線補充一個後生仔，根本就冇位置留高美斯同鍾泰希。
當然，曼聯會唔會再喺前線補強，依加仍然係言之尚早。但無論曼聯或者係曼聯球迷確實真係要諗一諗咁既文化，係咪適合曼聯？係咪同以前有啲背道而馳？而呢個文化又係咪對曼聯嚟講，又係咪一個正面影響？其實年青球員要既野，只不過係明確既將來、光明既前程，如果能夠滿足到佢地，又喺球會踢得開心，點會咁易想離開一隊，由小培訓到依加既球會呢？