曼聯應唔應該留一個正選位置比馬迪

洛遊球地 於 19/04/2020 發表 收藏文章

提起馬迪,唔知大家對佢既印象係啲乜呢?小編就諗起幾個形容詞,慢、高高瘦瘦、老、世界波。原來唔經唔覺馬迪喺曼聯都差唔多三年,當初比曼聯球迷既感覺應該就係摩連奴契仔,到今日摩連奴已經成為熱刺既教頭,呢個稱號都漸漸消失了。今日小編就想同大家分享一下到底曼聯應唔應該留一個正選位置比佢。

喺文章正式開始前,先講一講小編只係一個普通球迷,每一篇文章都只係分享一下自己既感受,絕對唔係球評家,所以識字既人都真係可以寫呢啲文章,如果大家覺得小編寫得唔好,絕對可以彈,但千祈唔好期望小編既分析或者分享係絕對正確,甚至當小編係球評家。

馬迪 (Nemanja Matic)
年齡:31歲 (1988年8月1號)
身高:194CM
國籍:塞爾維亞
慣用腳:左腳
位置:防守中場


兩年前,馬迪喺佢既生日前一日,由車路士加盟曼聯,跟住佢契爺摩連奴一齊過檔。身穿31號球衣既馬迪,憑住出色既防守及護球能力,令馬迪得到摩連奴同好多隊內球員稱讚。喺摩連奴既帶領下,馬迪幾乎係必然正選,但自從蘇斯克查接任之後,馬迪既正選位置開始有所動搖,加上傷患既困擾,馬迪已經再唔係必然正選。取而代之既就係麥湯文尼、費特甚至皮里拉等等。

如果大家熟識曼聯,應該好清楚曼聯大部分時間都係用三中場既陣式,不論係打5後衛陣式或者係4後衛陣式,三中場都永遠不變。變動既就只會係中場入面既球員,簡單啲咁講就係位換位。咁喺云云中場入面,到底點樣安排先係最好呢?而馬迪又到底有冇份打正選呢?

鑒於普巴現時既轉會情況仍然處於太多變數,所以小編假設普巴係留隊先。換言之,曼聯中場正路就應該係普巴搭般奴費南迪斯。咁曼聯中場第三人就應該係馬迪、費特、麥湯文尼以及皮里拉之爭。小編認為馬迪應該介乎於正選與後備之間。點解咁講?



先同大家講一講馬迪既優勝之處。首先,馬迪既經驗係四人入面最豐富既一位。其次,無論係控制節奏以及護球能力,佢都係四人之最。奈何佢本身就唔係一個速度高、覆蓋範圍大既球員,所有喺某啲情況下馬迪係值得獲得正選,喺某啲情況下應該後備。情況就好似費Sir用星仔一樣,喺適當既情況先用佢,而唔係必然正選。小編認為馬迪應該喺一啲對手能力較高既比賽入面打正選。曼聯球迷應該好清楚,近年嚟曼聯每當硬仗時,永遠都係較弱既一方,大多數既攻勢或者控球都會係對手較多,喺呢一個情況下,就非常適合馬迪呢種球員。佢既經驗、補位意識、護球能力甚至節奏控制方面,都可以令球隊喺受強攻時舒緩到壓力。

相反,喺一啲需要多配合去打穿防線既球隊方面,可能馬迪就要移居去後備位置。因為馬迪既創造力唔高,速度又比較慢。對手攻擊曼聯就只有快速反擊時,馬迪就會變成球隊既弱點。呢啲情況下,小編認為麥湯文尼同費特就會係比較適合既人選。因為佢地比較靈活、有速度以及覆蓋範圍較大,所以喺進攻以及防守方面都會比較好。小編認為 Box to Box 既球員,面對以防守為主既球隊,最重要係攻守兼備以及活力十足。呢方面,普巴一定唔會係合適人選,而般奴打 Box to Box 呢個位置亦都係唔夠合適。雖然佢好勤力,助攻助守。可惜喺防守方面既意識都係比較差。相反,麥湯文尼以及費特無論喺進攻以及防守方面,都係唔錯,算係一個 Box To Box 既合適人選。


其實馬迪就好似巴塞既巴斯基斯,當然馬迪一定係弱版啦。小編認為曼聯既中場板凳深度尚算合格,有好多唔同打法既球員,而水準方面亦都唔係話太差。如果蘇斯克查肯靈活地因應對手既打法,替換中場球員,會係曼聯另一個優勝之處。現時好多球隊既中場,都係不變。好似曼城、皇馬、巴塞咁,佢地一定只會放一個防守,兩個進攻,其中一個大原因就係因為佢地既防中球員不足。但相反曼聯中場既變化就可以更靈活,因為無論喺防守方面或者進攻方面,球員都尚算足夠。情況就好似利物浦咁,不過曼聯中場既實力就明顯低啲喇。小編認為利物浦最強,最大威脅既唔係前場既三叉戟。相反係中場既靈活變化,佢地有好多球員可以執行、飾演唔同既位置或者角色,無論球隊係需要控制節奏還是高強度逼搶,佢地都有足夠既球員以及能力去執行。呢一方面,現時曼聯既中場球員雖然能力唔會高過利物浦,但確實係有條件仿效利物浦。

馬迪雖然已經三十有一,狀態都開始不及當年勇。但係對住一啲強隊,佢都仲係好值得有一個正選位置。因為無論喺護球能力、經驗等等都算係頂級。佢可能喺比賽入面,唔會係最出眾既一位,但絕對係曼聯重要既球員之一。


標籤: 曼聯  馬迪  

留言


請按此登錄後留言。未成為會員? 立即註冊
    快捷鍵:←
    快捷鍵:→