到底英超最後會係邊隊降班——上集 精選

因為疫情蔓延全球關係，幾乎全球聯賽都要延期，包括英超在內。雖然現時暫停曬所有比賽，對於球迷嚟講係一件壞事，但相信對於所有球隊嚟講，都會係一件好事，尤其是英超既球隊。因為英超同其他聯賽唔同，冇歇冬期變相球隊冇一個重整或者休息既時間，巧合地依加暫停曬所有比賽，可以講係一個遲來的歇冬期，唔知呢個歇冬期會唔會幫到幾隊大機會降班既球隊重整呢？呢次小編將會講一講幾隊有機會降班既球隊，逐一同大家分析下佢地降班既機會大唔大。事不宜遲，由第29週排最尾既球隊講起。


第20名：諾域治(Norwich)
諾域治，作為一隊升班馬，排喺最尾絕對唔奇，但係對於諾域治嚟講，最奇怪既應該係隊波攞分既比賽，大多數都係對住啲比較難打既球隊。到現時為止，諾域治攞到分既比賽分別係對紐卡素、曼城、般尼茅夫、阿仙奴、李斯特城、熱刺、水晶宮。七隊入面有四隊都係硬野，對於諾域治嚟講照計應該一分都冇，但啱啱相反既係諾域治面對硬仗先有好表現。例如季初對車路士2:3嗰場，差啲迫和車路士、主場3:2贏曼城、逼和阿仙奴、李斯特城、熱刺，表現相當對板。但係面對下半版既球隊，好似維拉、屈福特就輸波，可以見到呢隊波係幾咁奇怪。諾域治呢班波出名以年輕為主，加上戰術較為主動、大膽，確實令好多球隊捉摸唔到。嚟緊仲有9場比賽比諾域治攞分護級，而當中要面對既球隊，都有幾隊硬野，好似係阿仙奴、愛華頓、車路士、曼城，到底諾域治能唔能夠再一次喺呢啲強隊身上攞分呢？小編覺得雖然諾域治依加係最尾嗰隊，又要面對呢幾隊強隊，要護級成功真係唔易。不過有半個月歇冬期比諾域治準備，或者改變一下踢法，對住強隊繼續貫徹佢地大膽、主動既作風，試下偷雞。反而對實力差唔多既球隊以穩陣、防守為主既打法應對，護級成功絕對唔係冇可能。


第19名：阿士東維拉(Aston Villa)
阿士東維拉，亦都係今季既升班馬，維拉喺季初用咗好多錢去擴充球隊既實力，但係表現一直未如理想。四場Clean Sheets，56個失波，仲差過榜尾既諾域治，可以見到防守能力非常不足，兩隊可以話係不相伯仲。維拉同諾域治最唔同既，一定就係攞分既目標球隊，維拉多數係贏同佢地實力相近既對手，而嚟緊佢地仲有10場既比賽比佢地攞分，不過當中強隊就佔大多數，睇嚟都兇多吉少。雖然係咁，不過佢地比起其他球隊打少一場，而只係落後第15名既白禮頓4分，確實仲有機會留喺英超賽場。維拉既球員實力都唔係特別差，有前利物浦門將連拿、入選英格蘭國家隊既明斯、英超經驗超豐富既艾莫哈馬迪、同埋一班好有能夠改變戰局既球員基利殊、麥堅、艾加沙、韋斯利等等。只要善用呢個休息期，改善一下防守問題，絕對能夠繼續留喺英超賽場。

第18名：般尼茅夫(Bournemouth)
般尼茅夫今季可以話係令球迷大跌眼鏡，自2015-2016球季之後，就一直留喺英超賽場，而近年成續一直都好穩定，可惜今季除外。季初成續還算係穩定既般尼茅夫去到11月，贏完曼聯之後就不斷下游，先輸比紐卡素，再輸比狼隊、熱刺、水晶宮、利物浦、車路士、般尼，之後賽和阿仙奴結束七連敗，以為有好轉啦。但接住再輸比白禮頓、韋斯咸、屈福特、諾域治，表現可以話係嚇死人。喺11月至1月期間，踢咗14場英超，錄得3勝1和10敗，當中仲有8場輸波係連波都唔識入，都咪話唔嚇親。領隊艾達賀維由08年執教般尼茅夫至今，表現都相當唔錯，唯獨今季真係令球迷們非常失望。小編喺韋斯咸對般尼茅夫場波入面，做咗坐上客，睇見韋斯咸下半場中段入到3球嗰陣，好多遠道而來既般尼茅夫球迷都索性走人，證明咗球迷對今季佢地既表現幾咁失望。近3場般尼茅夫又不勝，到底般尼茅夫最後既結局係點呢，真係令球迷擔心。嚟緊既九場賽事入面，仲要面對狼隊、曼聯、熱刺、李斯特城、曼城、愛華頓呢啲勁旅，相信來季仲留得到喺英超既機會都幾微。擁有尼敦艾基、佐敦艾比、哈利威爾遜、賴恩費沙、史坦拿斯、祖舒亞京治、卡林威爾遜呢啲好波之人既般尼茅夫能唔能夠喺呢段期間重新振作，繼續留喺英超，真係要睇下賀維既威力喇，如果真係唔好彩護級失敗，相信隊中一班一齊打咗好耐既球員都會相繼離開球隊。


嚟緊小編將會講埋下集既三隊球隊，包括屈福特、韋斯咸以及白禮頓，唔知各位球迷又想邊隊留低邊隊降班呢？歡迎大家留言喺Fanpiece入面或者Facebook上面，小編都好想知邊隊大家覺得值得留低。