曼聯有冇留番個位置比你——阿歷斯山齊士

洛遊球地 於 18/01/2020 發表 收藏文章
講起山齊士,身為曼聯球迷之一既小編,感覺都唔好受㗎,成日都見到同一堆留言,神魔合一、彈琴,等等既字眼。講得山齊士既話題,小編都預左又係呢啲留言㗎喇。不過無論如何,都無阻小編談論山齊士。

阿歷斯山齊士(Alexis Sánchez)
年齡:31歲 (1988年12月19號)
身高:168CM
國籍:智利
慣用腳:右腳
位置:左翼、右翼、前鋒

阿歷斯山齊士,佢既整個職業生涯,可以話比受傷佔咗五分之一。雖然係咁,但其實佢喺踢巴塞至到加盟名仙奴既第一季,受傷既問題從來冇發生過。但加盟阿仙奴既第二季開始,佢既受傷可以用恐怖呢形容。復出冇耐,又要再次養傷。到加盟曼聯,傷患既困擾從來冇改變過,足足受傷左124日。之後借到去國際米蘭既山齊士由上年10月傷到今年既5號,足足84日。到底點解會變咗一個玻璃人,小編真係摸不著頭腦。你話佢一直都係咁玻璃咩?佢曾經喺巴塞至阿仙奴既第一季又冇傷過個喎,原因係咩乜真係得佢自己先知。

雖然山齊士成日受傷,週薪又高,好多球迷都覺得佢唔應該留喺曼聯。但小編反而覺得佢番曼聯係最好不過,今日又同大家分析一下原因。

曼聯一直喺到搵右翼球員,雖然今季有丹尼爾占士既加盟,對右翼既需求減少。但球員總會有受傷既日子㗎,唔通真係搵格連活特打右翼?相信大家都知道格連活特本來打既位置就係前鋒,你知我知,小編相信蘇斯克查都知。但點解死都要搵佢打右翼,我諗離不開幾個原因。例如3M真係好夾、占士能力不及格連活特、占士既最佳位置同馬斯亞、華舒福一樣都係左翼或者係前線板凳深度唔高。雖然,今季馬斯亞、華舒華同堆格連活特,呢個組合攻入好多波,最近仲瘋傳一張相,講緊3M入波仲多過利物浦既前線組合文尼、沙拿同費明奴。但好老實,曼聯既進攻點,仍然係得左邊。入球既方式、套路,根本就仲未有,甚至有幾場比賽若不是對方既失誤或者十二碼,根本連「贏」呢個字,都好難講。咁姐係話,雖然占士既加盟或者有格連活特打右翼都好,根本球隊都冇改善過右翼既攻力。如果係咁,到底曼聯係咪應該諗下仲有兩三年合約,曾經打過巴塞右翼既山齊士呢?

打法上面,山齊士其實都幾符合蘇斯克查依加既打法。對陣攻力強既球隊,通常以反擊為主。以山齊士既速度以言,確實係好適合。相反對陣一啲防守為主既球隊,蘇斯克查鐘意用短傳以及一啲撞牆既方法打散對方後防。山齊士既基本攻大家都不用置疑,確實係過之而無不及。加上佢有一定既控球技術以及突破能力,真係曼聯對解決右翼既靈丹妙藥。

另外,好多球評家或者係曼城領隊哥迪奧拿都講過曼聯前線既跑動不足,係令到曼聯攻力降低既最大原因。而山齊士確實喺每場既跑動都非常之多,如果曼聯真係回收山齊士番嚟,又會唔會令到進攻更多樣性或者更加立體呢?

再者,曼聯一直搵緊10號位球員。然而,今時今日都仲未簽到般奴費南迪斯。儘管簽到都好,正如我上一篇對費南迪斯既分析都講過,佢唔係一位創造力高既球員。對於現時缺乏創造力曼聯,根本冇顯注既改變。如果阿齊士試下打10號位,又得唔得呢?勤力走上走落做幫波,又有能力將皮球快速轉向,放波既準繩以及力量控制都十足,仲要有一定既護波能力,遠射又唔差,又肯殺入禁區,其實都幾適合今時今日既曼聯吖.......

曾經都見過有球迷對於山齊士既態度有質疑,但小編就覺得相反喎。山齊士其實喺曼聯既比賽入面,好多時都同你去盡,做逼搶都係第一第二個走埋去。雖然,好多時你會見到山齊士對球隊有埋怨,有時又叉曬腰、低曬頭咁,又發脾氣,但呢啲其實咪就係對球賽投入囉。好簡單咁講,如果對球隊勝負唔在意既,失波又好,入唔到波又好,關我咩事,洗乜發脾氣。入唔到咪跑番轉頭等對面開死球囉,失左波咪喺中圈等開波囉。

前曼聯前鋒貝碧托夫都講過:「球員們可以喺場上同隊友嘈交,甚至用粗口辱罵隊友,我唔理佢地係嘈交定係打交,只要贏到波,佢地隊友之間做啲乜都可以」。其實每場比賽既投入程度真係好重要,曾經既堅尼、曾經既朗尼,曾經既哥迪奧拿與阿古路對罵都教識左我地,投入既重要性。發脾氣、有怨言喺球場上面一定會有,因為著緊嘛。最緊要係埋怨過後,努力做番好。呢一點,山齊士確實做得好好,佢傳失左第一時間就係追。對比起連加特,佢就真係唔投入個賽事喇。

一個球員著重勝負,對入球充滿飢渴先喺前鋒最需要既野,山齊士就有齊喇。講到心態,小編真係覺得佢冇得彈,唯一最大既問題,應該係同隊友們冇打成一片或者少溝通。呢一點佢自己確實好應該去改善,而領隊亦都有責任去令到每一個球員團結起嚟,令球隊齊上齊落,缺一不可。
喺高美斯同鍾泰希仲未夠能力踢一隊既時候,啱啱傷癒復出既山齊士如果真係操得番起狀態又減少傷患,曼聯確實仍然好需要佢。不過當然,最主要就係改善咗自己內斂既性格同埋與球隊上下一心啦。國際米蘭最近又同基奧特、艾歷臣傳得好熱,到底山齊士喺國際米蘭仲有冇機會呢?如果冇,到底又會唔會重返曼聯,打出身價,拯救水深火熱既曼聯呢,確實令小編期待。



標籤: 曼聯  山齊士  國際米蘭  

留言


請按此登錄後留言。未成為會員? 立即註冊
  • spencw 於 19/01/2020 評論 NO. 1

    筆者似乎仲係掛住以前嘅山神,而家嘅山神泛泛冇,護波都唔掂!

  • 10年球迷 於 20/01/2020 評論 NO. 2

    小編覺得一個曾經係世界級既球員,點樣唔練波,點樣差都好。都總係有個譜,點樣去提升番自己既水平先係最重要。點樣去提升或者保持球員既能力,除咗個人方面,球會都好應該搵方法。球會做既工作唔止係提供出賽機會比球員,仲有好多例如培養一個球員既生理心理。但好老實,我唔見曼聯有做呢樣野囉。一季後,覺得唔掂喎,借出去收番啲錢好過。你話曼聯唔缺人,或者呢個位置已經有好既替補就話啫,曼聯又冇喎。咁點解唔嘗試帶佢番嚟,搵方法去重新塑造呢位球員。

快捷鍵:←
快捷鍵:→