《有片睇》現時曼聯陣中一個不可或缺的球員——費特 精選

費特(Frederico Rodrigues de Paula Santos)
年齡：26歲 （1993年3月5日）身高：169CM
國籍：巴西
慣用腳：左腳

講起費特，大家會諗起啲乜？矮、比波差等等。由加盟到依加，多數都係比球迷鬧多過讚。但今次小編反而想讚下呢位中場球員。

首先，費特既精神非常值得曼聯既球員學習。無論場波既形勢發展到點，佢都唔會氣餒，呢個態度好值得加許。記得曼聯對曼城1:3嗰場，曼城球員馬列斯(Mahrez)，86分鐘被換出，佢慢慢離開球場，費特推住佢行出球場，想快啲開波。當時雖然已經係球賽既末段，但眼見比數落後1:3，費特都冇放棄過，態度確實比起隊中某啲球員更好。
唔止係咁，費特幾乎喺每場比賽入面都會作出嘗試，製造機會作為中場嚟講，當然唔少得。但除此之外，佢仲會作出好多射門。雖然射門好多時都未如理想，但曼聯經常對住啲防守為主既球隊，因為進攻單一，缺乏板斧，好多時都表現出老鼠拉龜既感覺，所以有更多遠射其實對曼聯嚟講係一件好事。當然，準繩同力量方面，費特都要繼續努力，如果唔係只會比球迷覺得係浪射。

講啲數據比大家知，曼聯喺今季英超入面，傳球次數最多既3位球員分別係兩位中堅，麥佳亞(1414次)、連迪洛夫(1256次)、以及中場費特(1077次)。
再睇睇曼聯中場上陣次數及時間
彭利拿(19場，1251分鐘) 傳球次數(559次)
麥湯文尼(17場，1453分鐘) 傳球次數(807次)費特(18場，1408分鐘) 傳球次數(1077次)

以上數據證明後場同中場既連接，喺缺乏普巴下，其實非常依靠費特。
雖然，呢啲數據都可以係因為基於蘇斯克查重用邊一位球員嚟連接球隊而刷既紀錄，但係點解要搵費特做呢個角色，當然就係因為領隊覺得佢最合適啦。

費特雖然進步當中，但仲有好多改善既地方。

護球能力－雖然已經比起剛加盟時進步，依加開始識得用自己重心低呢個優勢去保護皮球，但距離合格仲好似呢少少。

控球能力－好多時都會見到費特控波控到離行離辣，身位一位中場如果控球能力咁差，實在不能接受，呢樣野費特真係要加倍努力。
射門能力－雖然啱啱都讚左費特肯嘗試，但對比好多曼聯球員，例如普巴，格連活特，佢既遠射仲需要改善。

傳球能力－現時好多罰球、角球，都搵費特去開，但明顯地見到威脅不大。死球開得唔好之餘，生波好多時都會傳醫院波，真係害死隊友。

企位以及搶截方面－雖然都唔係非常出眾，但喺曼聯陣中，現時都算勉強合格。

雖然腳法以及能力，作為將踏入27歲既費特，完全唔稱得上一位頂級既球員。但費特既態度以及場內既角色，確實係現時曼聯最不可或缺既一位。

https://streamable.com/333n0