雲迪碧克到底要取代誰?

洛遊球地 於 26/10/2020 發表 收藏文章

雲迪碧克唔經唔覺已經加盟曼聯差唔多兩個月,但上陣機會卻寥寥可數,當中以至今曼聯踢咗最多比賽既英超聯賽嚟計,雲迪碧克總共落場時間,就只有59分鐘,上陣時間連1個鐘都唔夠。曼聯至今喺英超一共踢咗5場比賽,一共450分鐘,但雲迪碧克就只有60分鐘而已,到底係蘇斯克查買咗個佢唔啱用既球員,定係雲迪碧克做錯啲咩,定係真係要操到大大隻先出呢?如果出既話,佢應該要取代邊一個既位置呢?今日就同大家探討下呢一個問題。

之前雲迪碧克加盟曼聯既時候,小編都曾經出過一篇文章講關於雲迪碧克,詳情可以睇番呢到。當時小編都諗咗好多個方案出嚟,然而曼聯領隊蘇斯克查都係選擇以不變應萬變。雖然小編真係唔睇好咁既決定以及佢既用人以至調兵遣將,但呢個就係大家認識既蘇斯克查。慢、用人唯親,就係佢一貫既做法,所以想佢有任何改變,真係唔易。作為曼迷既你或我,除咗喺網上評論幾句之外,我相信唯一可以做既就只有繼續撐吧。

上場曼聯對車路士既比賽入面,小編冇乜時間打呢篇文,但整場比賽小編都睇足。翌日都有睇修咸頓對愛華頓既比賽,當中安察洛堤同蘇斯克查既分別立竿見影。愛華頓半場輸緊兩球,已經好清楚要換人,喺比賽未夠60分鐘既時間,就已經用盡三個換人名額。作為一個頂級既領隊,除咗有唔同既想法之餘,最重要一定係夠決斷以及有膽色。然而,蘇斯克查從來都唔會喺60分鐘前,用曬三個換人名額。或許呢一個就係兩隊領隊之間既分野吧... 大家可能會懷疑自己,明明睇緊雲迪碧克,點解會講到蘇斯克查?當一個領隊唔敢於作出新嘗試,除咗會令球隊唔進步之外,球員都唔會有更多既機會綻放異彩,表現自己。雲迪碧克現時最可惜既,唔係冇得為球隊正選上陣,而係冇得向公眾證明自己既能力以及身價。就算佢喺訓練場上踢到曉飛都好,冇任何機會上陣根本冇人會覺得佢得。之後蘇斯克查就可以用佢所謂既道理,繼續向公眾講佢未達到正選上陣既要求。



其實雲迪碧克呢位球員,對曼聯嚟講真係好重要,只係球隊喺需要佢既時候,唔選擇用佢。當球隊唔需要佢既時候,或者係喺比賽所謂既垃圾時間入面先選用佢,令到好多球評家甚至某啲外國媒體認為呢一筆收購,係一筆失敗既收購,認為曼聯係唔需要呢一位球員。艾夫拿喺曼聯對車路士既比賽之後,講咗自己對雲迪碧克收購一事既論點。當中最令小編印象深刻既一句:「We don't need him. Nobody will say it but that's the truth.」冇錯,喺呢一刻其實曼聯對雲迪碧克既需要性好似好低,但留意番曼聯今季係要應付三條戰線,而事實上只要曼聯表現唔差,以今季英超既混亂嚟講,係真係有機會向冠軍邁進。當去到聖誕快車期、當去到有啲球員需要休息、養傷既時候,曼聯真係唔需要一啲有質素既替補球員咩?加上雲迪碧克既踢法同現時曼聯既中場完全唔同,現時曼聯喺戰術上確實係可以有更多既變化,至於變唔變就要睇蘇斯克查既做法,但多一個選擇比蘇斯克查,唔通又唔係曼聯需要既野?

喺呢兩個月既比賽入面,曼聯好似經歷咗好多野咁。比傳統既中下游球隊三番四次攞到分,比以防守為主既熱刺大炒,但又以一個唔係好完整既陣容擊敗咗上屆歐聯亞軍。喺好多比賽入面,都因為種種唔同既原因間接或直接地顯示曼聯當時需要雲迪碧克,但好多時蘇斯克查都冇立即選用。有時候係希望平衡球隊既攻守,而有時就係唔敢輕舉妄動。直至比賽去到中後段,蘇斯克查先肯用雲迪碧克。

其實雲迪碧克呢位球員功能唔算好多,但十足既跑動量、入禁區既次數以及門前既觸覺就已經令佢好值得有更多既比賽時間以及機會。近兩場比賽,曼聯選擇喺中場採用費特搭麥湯文尼,希望透過超強既活力以及快速、高效率既防守,面對巴黎以及車路士。無疑地喺防守上,曼聯係表現有非常好,但係當曼聯希望採取主動,想贏下嗰場比賽既時候,曼聯就顯然地表現出何謂力不從心。自般奴既加盟之後,曼聯一直都非常依賴般奴,由其曼聯喺普巴缺陣既時候,依賴就更加顯注。好多球隊都洞悉到呢一點,因此喺般奴加盟之後兩個月,愈嚟愈多球隊開始對般奴有針對性既部署,令般奴表現大不如前,甚至愈打愈沉。其實雲迪碧克確實係可以替代般奴,雖然般奴係球隊既得分機器,好多時都需要靠佢既十二碼或助攻嚟得分,但當般奴踢得差既時候,其實都係需要換佢。喺費Sir時期帶領曼聯,從來冇話冇咗邊個唔得,幾乎每一個球員都係,只要踢得差就會換,但現時既蘇斯克查好似仲未有呢種膽色以及火喉。近呢幾場,由其是下半場既時候,般奴幾乎表現都係下滑,傳送經常有失誤、射門遠離目標等等。而曼聯喺下半場經常想攻多啲,多啲採取主動,其實將雲迪碧克替代般奴,就可以平衡到進與防之外,又可以有更多既跑動量,令到球隊既進攻更加立體。



當然,除咗般奴之外,其實仲有好多球員雲迪碧克係可以取替,好似費特、同普巴咁。費特雖然係一個比較防守型既球員,而雲迪碧克就屬於進攻型球員。相比之下,就好似攞咗個前鋒同個龍門去比較咁,好似有啲唔公平,比較唔到。但我地睇番費特喺呢兩場比賽入面,佢既工作除咗係做搶截之餘,都做咗好多由守轉攻既工作,不過效果始終都係一般。唔能夠令球隊有一個非常流暢、順滑既反擊機會。假如曼聯係希望下半場有更多既機會入波,其實大可以收起一個防守中場,改用雲迪碧克令進攻更加立體。加上雲迪碧克雖然屬於係一個進攻型球員,但係佢喺阿積士效力既時候,都有經常做一啲防務既工作。所以佢絕對可以替取費特既位置。


至於取替普巴呢一個問題,就同以上兩個球員唔同。因為普巴既工作同般奴、費特唔一樣,雲迪碧克唔能夠做到普巴既工作。雖然睇普巴踢波,每一次都係賭運、睇佢心情咁,但無疑地佢係好重要,喺某啲情況下。首先大家喺批評普巴之前,保持一個客觀啲既角度先,之後要認清楚到底佢強項喺邊弱項喺邊。普巴最強就係佢既長傳以及視野,呢一點可以話係世界級。但係最大問題就係佢會將攻勢拖到好慢,每一次經佢腳下都會將攻勢拖多一兩秒。淨係講一個強項同一個弱項就明白,其實普巴唔係喺每一場比賽入面,或者唔係喺每一個戰術入面,都適合佢。佢同啱啱兩個球員既Case唔同,替取佢係絕對需要睇下到底現時球隊係踢緊咩戰術,需要啲乜野功能既球員。因為普巴既能力冇另一位球員可以取替佢。佢既準繩以及視野,對防守反擊真係好重要。但係佢既慢,對蘇斯克查主張既短傳滲入一啲都唔需要。當蘇斯克查需要打陣地戰,需要採取主攻既一方,雲迪碧克係絕對可以替代普巴。但當球隊需要打防守反擊既時候,雲迪碧克就唔可以取替普巴既位置。


小編認為雲迪碧克取替費特、般奴、馬迪甚至普巴都可以,但係唯一唔可以取替既就係麥湯文尼呢一位球員。呢位球員雖然睇落去好似唔多起眼,但佢做既Dirty Work、遮線塞位等等,絕對係冇一個曼聯球員可以同佢Level。除非蘇斯克查真係好似外國傳媒咁講,將雲迪碧克練到好大隻,身體質素好強。咁樣或者可以替代麥湯文尼既,始終佢呢一種硬朗、集中,可以話係曼聯最需要既一環。

其實論需要性,雲迪碧克絕對係對曼聯非常重要。就算呢一刻,仍然坐喺後備席,佢都可以牽引住普巴,令普巴壓力更大。好似艾夫拿咁講,曼聯其實唔需要佢,小編就真係好有保留喇。但係雲迪碧克對曼聯既作用大唔大,始終都係基於蘇斯克查既做化,佢會唔會繼續用人唯親,會唔會變得更有膽色去改變打法、戰術甚至用人,將會直接影響到雲迪碧克喺曼聯未來既位置,希望雲迪碧克更快有更多既機會為曼聯正選上陣。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→