蘇斯克查助攻 令錫菲聯取得今季第二場勝仗

洛遊球地 於 28/01/2021 發表 收藏文章

首先向大家正式講番聲,小編再一次番嚟喇。自11月之後,小編就因為私人原因關係,停止咗出文章。今日開始,本專頁將會重新出文,希望大家繼續支持。

今場波曼聯因星期六要作客對阿仙奴既關係,因此曼聯領隊蘇斯克查作出咗好多輪換。蘇斯克查今場大膽採用杜安錫比代替連迪洛夫,而左閘亦都收起咗梳爾轉用迪利斯。中場方面,費特以及麥湯文尼兩位都唔喺正選名單當中,取而代之既就係用馬迪。而前場華舒福賽前就有小小傷,但今場照樣可以正選上陣,而格連活亦都代表咗卡雲尼出任正選。

迪基亞
雲比沙卡 麥佳亞 杜安錫比 迪利斯
馬迪 普巴
美臣格連活 般奴 華舒福
馬斯亞
後備名單:甸軒達臣 連迪洛夫 梳爾 費特 占士 馬達 麥湯文尼 雲迪比 卡雲尼


喺講蘇斯克查點助攻錫菲聯之前,循例都講一講曼聯今場既表現先。2' 先有積基卡撞跌馬斯亞,馬斯亞落地唔靚,左邊膊頭受傷,需要出場治理,幸好沒有大礙。10' 馬斯亞策動攻勢,橫傳交比美臣格連活,隨即彈落底線比雲比沙卡,然後雲比沙卡地波傳番入禁區頂比華舒福起腳,可惜柱邊出界。22' 錫菲聯角球攻勢,斬入小禁區,迪基亞打空槌,令錫菲聯球員堅拜恩成功頂入,0:1。慢鏡睇番呢球失球,其實係有錫菲聯球員喺迪基亞打手槌之前,推一推迪基亞,可惜球證見唔到,亦都冇Check VAR。24' 美臣格連活喺右邊拐大位 ,左腳起腳。可惜射得比較正中,威脅唔大。

上半場完,曼聯先輸一球入更衣室,整個上半場明顯見到曼聯完全攻唔入錫菲聯,攻勢極少,有威脅既就更甚。另外行軍速度十分慢,前線三位球員長期啞火,三個之中就只有美臣格連活比較好少少。而防守方面,曼聯幾次被錫菲聯輕易打穿,只係對手因越位以及把握力不足等等,令到可以威脅到曼聯既機會唔多,但幾次輕易打穿,都已經令曼聯後防響起警號。


下半場出番嚟,曼聯表現一直都冇太大改變,61' 馬斯亞喺中前場博到犯規,獲得罰球。可惜呢個罰球離龍門都頗遠,但華舒福都嘗試作出射門,雖然射中目標,但完全威脅唔到對方門將。62' 般奴喺對手禁區頂博到犯規,自己博就自己射番,可惜般奴罰球省中對手,角球。接著曼聯就憑住呢一個角球,令曼聯成功追成平手,入波球員係隊長麥佳亞。65' 曼聯終於迎嚟第一個換人調動,卡雲尼入替美臣格連活,相反比格連活更沉既華舒福同馬斯亞,就繼續喺場內比賽。74' 曼聯再一次落後,對手喺曼聯禁區猜咗好多腳,但一直冇曼聯球員緊迫對手,最後對手喺無壓迫既情況下燙射,省中今季首次英超正選上陣既杜安錫比,將比數改寫成為1:2,曼聯再一次落後。76' 迪利斯遠射省中對手,改變方向,差啲收死對方門將。再一次失波之後差唔多十分鐘,先迎嚟第二次既換人調動。82' 雲迪比以及梳爾一齊入替杜安錫比同迪利斯。可惜喺之後既時間入面,曼聯都搵唔到具威脅既攻勢,令曼聯最後喺主場以1:2,不敵錫菲聯,全失三分。

整場波見到曼聯一直都打唔到自己應有既水平,進攻方面,戰術完全見唔到,兩閘極少疊瓦配合,經常單打獨鬥。中鋒既馬斯亞老問題依舊存在,少現身、少跑動、少走身後波,當下半場格連活換出,卡雲尼入替之後,馬斯亞同華舒福打兩翼,問題仲大,兩翼連過人都唔肯嘗試,以往嘗試落底出波以及兩閘配合,今場完全冇出現過。而喺中路既進攻就更加唔洗多講,錫菲聯繼續佢地既三中堅陣式,加上整隊非常有紀律性既防守,要喺中路滲入就更加難上加難。另外,般奴以及普巴後上以及入禁區次數唔多,令到中路滲入根本就冇可能發生。喺左右兩邊配合唔多,中路人數又不足既情況下,曼聯進攻就只剩死球一瓣。而曼聯又真係不負眾望,真係憑住死球入波,憑住角球機會令麥佳亞追平,但奇怪既係既然曼聯今場就只有死球有威脅,點解喺比賽尾段,又唔博多啲死球呢?


防守方面,曼聯再一次面對較弱既對手,顯得集中力不足。其實曼聯既防守能力,一直都唔需要懷疑,喺對上幾年,摩連奴領軍既年代,曼聯都可以做到聯賽入面最少失波嗰幾隊,而當時既防守球員同依加相比,有增強無減弱。但近幾季,曼聯喺防守方面就每況愈下。先講第一球失波,雖然對手係有犯規既嫌疑,甚至可以話係侵犯咗迪基亞,令迪基亞打空手槌,但曼聯球員同對手一齊爭頂既力度,又夠唔夠呢?眾所週知,曼聯門將迪基亞由加盟至今,面對高空波都係非常差,而呢一點對於迪基亞嚟講都唔容易改善。咁喺改善唔到既情況下,曼聯防守又可唔可以幫下迪基亞呢?喺呢球失波入面,迪基亞係比錫菲聯三個球員緊貼住。雖然呢球波,迪基亞係需要負上責任,但迪基亞呢個弱點都已經唔係啲咩新鮮事,點解曼聯防守會搵唔到方法去補救呢?



關於第二球失波,完全係集中力不足既問題,曼聯七個球員圍住錫菲聯兩個進攻球員,最後都可以比對手射入,真係令人費解。喺呢球波入面,明顯見到所有曼聯球員,注意力都落咗喺個波到,完完全全冇睇過對手企喺邊,七個球員入面就只有最遠衝緊番入嚟嗰個般奴睇得最通透,但最後都跟唔切對手,令對手係冇太大壓力下起腳射門。



關於呢兩球失波,有球迷認為係迪基亞或者係杜安錫比既失誤,但大家係咪真係睇清楚呢?第一球,迪基亞的確喺出迎問題上要負責任,但佢比三個錫菲聯既球員圍住,同樣比對手推一推,亦係無可厚非。相反,其他球員完全冇幫到迪基亞手,又洗唔洗負上責任呢?第一個失波,有跳既球員就只有迪利斯同杜安錫比,而杜安錫比就啱啱喺佢個頭上面擦過,唔通咁都打得差?第二球失波,大家第一個怪責既係迪基亞,但係大家又會唔會諗下,麥佳亞回傳嗰下,已經好近又貼腳,控多腳又唔得,退後一步再斬又唔得,加上大大個曼聯球員就企喺佢面前,喺呢個情況下,佢唯一可以做既除咗打橫掃走嗰波之外,其實再冇其他選擇。至於省中杜安錫比彈入,就更加唔可以怪杜安錫比,喺一個咁近距離既情況下,要比反應根本冇乜可能,要杜安沙比殺出嚟又唔夠時間,相反唯一可以殺出嚟嗰個,反而係迪利斯。如果迪利斯喺對手起腳嗰一刻,打橫訓身其實已經遮曬所有角度咁制。小編呢個講法,唔係想將責任推落迪利斯到,而只係想將責任推番去前幾秒,如果大家一早就望對手企位,就唔會有呢球失波發生。

今場波,明顯見到曼聯缺乏幾樣非常重要既野,而幾個老問題都冇解決過。大家有睇開小編寫既文章,或者會記得小編經常提及曼聯入禁區既人數唔夠。今場再一次出現呢個問題,幾球波入面禁區都只有卡雲尼,上半場甚至馬斯亞有時失埋蹤。但如果大家今場有睇波,就會知道般奴上半場一入咗禁區,威脅即刻大咗好多,仲差啲入埋波,只係對手積基卡今場打得好好,守到馬斯亞嗰下頭槌。


另一點就係曼聯中鋒問題,今場波見到蘇斯克查刻意地選擇輪換,收起卡雲尼,希望比佢抖多啲好讓下場 體力充沛地迎戰阿仙奴。但再一次引證馬斯亞唔係中鋒既材料,現身少、跑防守球員身後又少,又唔能夠控好第一腳等隊友做配合、拉扯又做得唔夠、搶點又慢等等。馬斯亞同卡雲尼打中鋒差距咁大,根本就唔能夠用馬斯亞甚至華舒福代替卡雲尼。咁到底曼聯應該搵邊個代替呢?其實曼聯本來有一個好好既替代球員,佢就係恩哈路,但上半季真真正正又打咗幾多場呢?蘇斯克查又有冇心留住佢呢?今場就見到冇咗佢,其實曼聯喺中鋒位置上面,板凳深度係唔足夠。又想輪換,但馬斯亞、華舒福又唔夠班,最後就要負上少三分既後果。

另外,小編一直都強調曼聯最需要就係Plan B,今場明顯見到中路滲入唔掂,左右兩邊威脅唔大。喺呢個時候,如果曼聯有Plan B,有一個高大或者大大隻隻既做衝做頂,已經可以令錫菲聯防守很艱難,情況就好似紐卡素既卡路爾或者韋斯咸既安東尼奧。可惜恩哈路既租借期完約,領隊、球隊都冇想留低佢既意思。最後就令到曼聯就只可以搵麥佳亞打破僵局。



再講就係用人唯親既領隊蘇斯克查,今場波就連盲既都知道馬斯亞打得好差,但點解可以打足全場呢?相反比較具威脅嗰個格連活就喺65分鐘已經比人換走。曼聯喺65分鐘已經係1:1,而比賽時間去到73分鐘先輸到1:2,喺呢八分鐘入面,其實曼聯喺進攻方面冇乜改善過,但點解都仲唔換多一個人呢?失咗波之後8分鐘,先再一次換人。其實都失到1:2,又點解仲要等多八分鐘先再換人呢?到底蘇斯克查係等緊咩呢?係咪一定要80分鐘先用雲迪比呢?再講,點解另一個換人係換隻閘,後備入面進攻既仲有馬達、占士、甚至之前短時間入兩球既麥湯文尼,但偏偏係需要進攻既時候,蘇斯克查選擇左閘換左閘。而兩個左閘分別唔大,都係左腳,傳中都係差唔多,甚至原本正選既迪利斯傳中仲要好好多。喺尾段根本就進唔入既情況下,其實唯一可以變既就係搵高佬入去湧,就算你換連迪洛夫,小編都覺得唔奇,但換梳爾到底係咩心態呢?你要中路滲入有馬達揀,要兩翼硬爆落底有占士揀,你要高佬頂波有麥湯文尼同連迪洛夫,但偏偏蘇斯克查揀個最唔合理既人選。

換人又換得奇怪無理,打得差既兩個契仔就繼續有得踢繼續有得差,換人時間就永遠要拖到勁遲。試問喺呢啲情況下,除咗咎由自取呢四個字,仲可以搵咩字眼去形容蘇斯克查呢?記得蘇斯克查喺初執教曼聯既時候話,因為佢自己係一個前鋒球員,所以會較多時間、教多心得去教前鋒野,但蘇斯克查教咗曼聯至今一年有多,幾位前鋒到底又學到啲乜,進步咗啲乜呢?每一次輸波就黑起塊面,但係話都冇話過班球員,真係好想問蘇斯克查你,到底知唔知道依加教緊嗰隊唔係中游、唔係下游分子嚟...


到底蘇斯克查仲想用人唯親多幾多次,到底蘇斯克查仲想傷幾多次馬達心呢?防守冇進步,進攻冇進步,但成績有進步,係咪等於進步呢?呢一點,真係希望蘇斯克查同各大曼迷諗清楚。蘇斯克查再係咁教落去,絕對唔會有更大既成績。


大家記唔記得當年費Sir帶歐聯,蘭尼紅牌嗰場波?嗰場波蘭尼攞完紅之後,就係因為換人慢,令到曼聯最後出埋局,賽後比網民話費Sir回塘,決定冇咁武斷。其實一兩分鐘,或者一兩個決定,就將會影響整場波既發展,蘇斯克查到今時今日都仲係咁慢,只會步費Sir當年既後塵,最後令到曼聯繼續冇進步。

希望蘇斯克查喺呢場敗仗後,真真正正面對自己既不足,用番啲值得用既球員,用行動去留低一班值得留低既球員,用戰術帶領球隊得到勝利,而唔係三分已袋。



有打錯字既話請見諒,睇完場波即刻打,愈打愈攰...
標籤: 曼聯  錫菲聯  蘇斯克查  馬斯亞  

留言


請按此登錄後留言。未成為會員? 立即註冊
    快捷鍵:←
    快捷鍵:→