若韋斯咸今季降班 邊五位能力出眾既球員可能會離隊?

洛遊球地 於 11/06/2020 發表 收藏文章
近年嚟,韋斯咸一直位於中游位置,排名一直徘徊喺第10名附近,由2012/2013球季重返英超後,再冇降過班,表現亦相當穩定。可惜今季韋斯咸同般尼茅夫一樣表現非常失色,令球迷大跌眼鏡。今季至今踢咗29場比賽,就只有27分,以得失球差,好過屈福特兩球以及好過般尼茅夫三球,排第16。嚟緊仲有九場比賽比韋斯咸搶分,留唔留得低喺英超都好難講。因為講緊16名至19名,其實都只係相差2分。喺入正題之前,先比大家睇一睇近年韋斯咸既數據先。

2010/2011 第20名 33分(降班)
2011/2012 英冠作賽
2012/2013 第10名 46分(同第九史雲斯同分,得失球差-4球)
2013/2014 第13名 40分
2014/2015 第12名 47分(同第十一名愛華頓同分,得失球差-1球)
2015/2016 第7名 62分(排名比利物浦、車路士、愛華頓還要高)
2016/2017 第11名 45分(同西布朗同分,得失球差-9球)
2017/2018 第13名 42分
2018/2019 第10名 52分(同李斯特城同分,得失球差-6球)

睇完以上既數據,大家會見到我地熟悉既韋斯咸本來好穩定,每一季攞既分數都有40分,排名最低都有13名。但今季既表現真係令人失望,踢咗29場仍然只係排16名得27分。嚟緊九場波要攞13分,先攞到40分。睇落好似好容易,但球迷們要睇一睇佢地餘下九場既對手有咩先。

主場對狼隊
作客對熱刺
主場對車路士
作客對紐卡素
主場對般尼
作客對諾域治
主場對屈福特
作客對曼聯
主場對阿士東維拉


淨係睇對手都已經有四場硬仗,加上紐卡素同般尼亦都唔容易對乎。講到易踢小小既就只有諾域治、屈福特同維拉,而屈福特同維拉都係韋斯咸既獲級對手,而現時分數上差唔太多。同屈福特同分之餘,亦都係多維拉兩分但打少一場。姐係話嗰兩場比賽對韋斯咸嚟講都係6分波,就算和都唔可以輸。萬一真係唔好彩輸咗一場甚至兩場,降班既機會都幾大。

另外一佪數據就係,韋斯咸咁多年嚟,佢既得失球都唔係十分好。用番以上嗰個數據,咁多次同分之下,都係得失球輸比對手,冇一次係好過同分對手。而今季現時得失球方面,韋斯咸只係微微領先同分既兩隊兩球同三球。換言之若韋斯咸稍一不慎,亦有可能因得失球差而降班。

若然韋斯咸真係繼七年後再一次降班,邊啲好波既球員又會離隊呢?(排名不分先後)


伊沙迪奧普(Issa Diop)
呢位23歲既中堅,踢法硬朗,好肯落腳,落腳準繩亦都唔算差。加上身型高大,面對前線一啲比較大隻既球員表現都唔會太差。迪奧普喺打法上比較喜歡喺後場帶出重圍,步大力雄,能夠輕易將皮球帶出困境。另外,佢既頭鎚以及長傳都唔錯,年紀亦輕。曾經都被傳出曼聯以及阿仙奴對佢有意思。若韋斯咸降班,相信呢位曾代表法國U21出賽既球員,絕對有機會離隊。



菲臘比安達臣 (Felipe Anderson)
呢位腳法出眾既中場球員,雖然年紀唔細,已經27歲。但勝在腳法細膩,保護皮球能力好高,射術亦都唔錯。加上有一定要盤扭以及過人能力,確實係幾吸引。另外,喺傳送方面,菲臘比安達臣都唔弱,經常能夠做到助攻及Key Pass。左右翼都能夠勝任。亦都喺韋斯咸入面經常處理罰球,無論係射門以及傳球都有,係一個唔錯既球員。雖然身高方面唔係高,但佢亦都能夠運用自己既技巧以及重心低,令到佢可以喺英超立足。菲臘比安達臣相信都會得到其他球隊青睐。


蘭仙尼(Manuel Lanzini)
蘭仙尼同啱啱講既安達臣喺踢法上以及身型上都非常相似。亦都係一個腳法乖巧靈活既一位球員,喺傳送方面蘭仙尼好似仲比安達臣還要好。另外喺埋門方面,蘭仙尼一樣了得。唯一同安達臣有分別既,就係位置。蘭仙尼會出戰攻中比較多,左翼都曾經踢過。年齡亦都同安達臣一樣,27歲。唔經唔覺喺韋斯咸入面打滾咗差不多五年,仍然打得出水準,冇話因為身高、體型等問題,令佢表現下滑。如果韋斯咸要降班,相信仍然處於當打時期既蘭仙尼都應該會轉投其他隊伍。


韋舒亞(Jack Wilshere)
韋舒亞亦係同以上兩位好相似,不過喺位置上就同以上兩位唔同。佢就屬於中場中多啲,能力上大家都不用置疑,無論係做串連既工作,保護皮球既工作都做得好好。亦都好肯落腳鏟波,唯一就係脾氣方面差啲。有時差起上嚟,真係可以離曬譜。大家對佢既認識都一定好多,當中代表作不得不提喺阿仙奴時期,對著巴塞既好表現。雖然韋舒亞加盟韋斯咸只係兩年,但若果韋斯咸真係降班,相信韋舒亞一定唔會接受到落英冠比賽。


迪肯賴斯(Declan Rice)
曾經被傳過會加盟曼聯既迪肯賴斯,最近又被傳會加盟車路士。呢位曾經係車路士青年軍既球員,喺2013年轉會到韋斯咸,成為韋斯咸青少軍成員之一。2016/2017球季,迪肯賴斯終於為韋斯咸一隊出戰英超賽事。幾年間,迪肯賴斯由年青球員成為咗韋斯咸既必然正選。佢既防守能力被受肯定,無論係搶截、攔截、傳送等等都出色。加上喺場上冷靜既表現,令佢得到好多球隊既青睞。啱啱21歲既迪肯賴斯,大好前途。相信如果唔係對球隊超級忠心,絕對唔會選擇跟韋斯咸降班,影響自己前程。

雖然現時降班對韋斯咸嚟講仍然係言之尚早,邊個會轉會,邊個會留隊,就更加係仲遠既事。但事實上,英超已經宣布重開,而賽程亦都係密密麻麻,踢完整個英超可以話係眨下眼就過。呢五位最有潛藏離隊機會既球員,都開始要決定佢地既將來。以上五位確實喺能力上,唔算非常差,唯一最大問題係有幾位實在太易受傷。若他日佢地真係離隊,相信「傷患」二字,會係令佢地或者令頭隊最頭痕既事。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→