真正考驗蘇斯克查的日子終於來臨 精選 推薦

蘇斯克查到底夠唔夠料教曼聯，好多球迷都有唔同既意見。有啲球迷就覺得帶住呢班波，有呢個成績，算係合格。有啲球迷就覺得好多球員好似仲未比佢教得好，沉既繼續沉，好似唔能夠激活到球員咁。成績亦只係中規中矩，有進步既空間。小編想偏向後者既諗法，雖然大家見到佢冬季借咗恩哈路同收購左般奴之後，立竿見影。好多人會歸功於蘇帥，但到底係球探工作做得好，定係真係佢眼光，冇人知。就算真係佢揀番嚟既話，係咪幾場波就代表佢收購正確呢？小編就會認為睇多一季、兩季先啦。因為近年，好多球員嚟到曼聯，都只係曇花一現。之後踢得差，球迷又會話係水貨。所以小編認為今時今日，佢夠唔夠料教曼聯，好似仲要睇多陣。至少都要睇埋嚟緊既比賽先。隨著五大聯賽陸續重開，英超亦準備開始，相信歐洲賽事重開都不遠。到時曼聯除咗要應付英超之外，仲有足總盃以及歐霸賽事。到底曼聯能唔能夠喺咁密既賽事入面，能夠順利渡過呢，真係要考考蘇斯克查既功力喇。
華舒福、普巴等等既球員，藉住停賽既日子趕及復出為曼聯上陣，相信大家都好期待以及替球隊高興。然而，到時候蘇斯克查應該將邊個列入正選邊個要列入後備，會係令佢最頭痕既問題。因為事實上曼聯現時冇話邊一個係必然正選，由其是中前場既選擇入面，非常之多選擇，更可以因為球員而改變陣式以及打法。


三中場應該點樣踢呢？相信般奴就一定佔一席位，咁到底用唔用普巴呢？小編睇過幾個非正式統計，好似大家都偏向唔用普巴。但無疑地喺能力上，佢仍然係最Top嗰位，無論係視野、長傳、罰球、射門、護球能力等等。加上蘇斯克查喺未教曼聯之前，都講過球隊應該圍繞住普巴去踢。基於以上既原因，普巴又好似係正選之一。咁另一個中場係費特、麥湯文尼定係馬迪呢？

費特今季打得好好，走上走落，防守稱職；麥湯文尼又係一個非常好既Box To Box球員，體能十分好，加上射門好似仲好過費特少少；馬迪經驗老到，無論係塞位定係控制節奏都係頂級。好似三個球員都各有千秋，揀邊個好似都言之有理。


定係改陣式改打法，變四個中場呢？如果係咁，前場應該放棄邊一個呢？華舒福、馬斯亞、格連活特之間放棄一個？定係放棄兩個用恩哈路呢？如果中場打四個，前場打兩個，咁占士、鍾泰希、馬達、高美斯、連加特，皮里拉呢啲球員又點算呢？

假設嚟緊對熱刺嗰一套打法係成功既，蘇斯克查應該繼續沿用呢個打法、繼續沿用呢一班球員，定係輪換呢？假設嚟緊對熱刺打得差，咁係換陣、換球員定係堅持自己既打法呢？蘇斯克查好似突然要面對好多問題，雖然呢啲問題基本上每一個領隊都要面對好快都要面對。然而，今季蘇斯克查既輪換都冇話太多，對於佢嚟講呢個又會唔會係一個挑戰呢？以聖誕快車期為例：

12月22號對屈福特正選名單 輸2:0 (4231）
迪基亞梳爾 麥佳亞 連迪洛夫 雲比沙卡
費特 麥湯文尼
華舒福 連加特 占士
馬斯亞

12月26號對紐卡素正選名單 贏4:1 (4231）
迪基亞
梳爾 麥佳亞 連迪洛夫 雲比沙卡
費特 麥湯文尼
華舒福 皮里拉 格連活特
馬斯亞

12月28號對般尼正選名單 贏0:2 (4231）
迪基亞
班頓威廉斯 麥佳亞 連迪洛夫 楊格
馬迪 費特
華舒福 皮里拉 占士
馬斯亞
1月1號對阿仙奴正選名單 輸0:2 (4231）
迪基亞
梳爾 麥佳亞 連迪洛夫 雲比沙卡
馬迪 費特
華舒福 連加特 占士
馬斯亞

以上四場快車期既賽事，可見蘇斯克查喺輪換上面，都唔係太多變動。大家可能會話因為好多球員傷緊，或者能力不足，令到蘇斯克查冇乜選擇。冇錯，呢個原因係合理以及好大可能性，但係亦都係有另一個可能性，就係佢對其他球員既信任到底足唔足夠，以及球員既能力到底係咪足夠應付對手。如果蘇斯克查真係唔信其他球員，好似高美斯、鍾泰希、馬達等等，就算嚟緊既賽程有幾緊密，都只會死用嗰幾個球員。

另外，若然歐霸賽事重開，英超同歐霸都十分重要，到底蘇斯克查又會點樣去處理呢？暫停咗英超三個月，而球隊真正復操既時間就一個月都冇。體能同狀態大不如前都係意料中事，若然仍然用同一班人踢足每一場，恐怕最後可能英超、歐霸雙失都似。


聖誕快車期比嚟緊既日子更容易過，然而喺快車期間，曼聯表現都已經唔係十分出眾。四戰兩勝兩敗，當中更係輸比接近榜尾既屈福特以及狀態極差既阿仙奴。而紐卡素嗰場比賽，大家記得既話都知道紐卡素踢得非常差，而唔係曼聯踢得好。若然嚟緊既日子，曼聯既表現好似快車期咁，相信都幾令人擔心。

餘下既英超比賽，曼聯係全英超最易既賽程，平均對手排名最低，對手普遍都較弱，理論上好似好易食。但睇番今季曼聯既表現，12勝9和8敗。當中八敗分別係水晶宮、韋斯咸、紐卡素、般尼茅夫、屈福特、阿仙奴、利物浦以及般尼。八敗當中就只有阿仙奴以及利物浦係比較勁。我地睇埋九場和波既對手，分別係狼隊兩場、修咸頓、阿仙奴、利物浦、錫菲聯、阿士東維拉以及愛華頓兩場。當中修咸頓、維拉以及愛華頓今季表現都係差，然而喺三隊入面，曼聯總共失咗8分，確實唔算合格。


曼聯喺餘下九場英超比賽，就只有三場比較難打，分別係重開英超既第一、二場作客面對熱刺以及主場迎戰錫菲聯。之後就要去到英超最後一場先作客對李斯特城。睇嚟好似好易打，但無論係今季還是對上幾季，曼聯經常會喺啲最易贏既比賽入面失分，所以其餘六支球隊可能仲難過打Big6。
之前小編都喺一篇文章入面講過，曼聯一直都冇一個入波既方程式或者一個好切實既陣式、戰術。相反今季令人刮目相看既錫菲聯就有一個好好既戰術，而成續都非常好。小編當時喺文章結尾都講過，如果曼聯依然冇解決呢方面，可能今季會比錫菲聯超越都未定。最近小編都睇到新聞係講，超級電腦預測錫菲聯今季會超越曼聯，所以曼聯球迷以及小編老實講都咪話唔擔心。

上年蘇斯克查嚟到曼聯之後，幾場連勝之外，亦都曾試過奇蹟地反勝巴黎聖日耳門。好多球迷都因為咁，話蘇斯克查夠班教曼聯。但事實上，次回合巴黎整隊既表現非常差、保方既表現就更加差。加上一個有運既十二碼先可以擊敗對手，咁樣就話佢夠班教曼聯，好似夾硬咗少少。反而，嚟緊蘇斯克查能夠平衡到三線比賽，或者能夠成功爭取到歐聯資格，再話佢夠料教曼聯，就好似比較合理。
嚟緊既日子，相信會係蘇斯克查最頭痕既階段。一個幸福的煩惱好似更考佢既功力。到底今季曼聯會行到幾遠呢，過幾日即將會有第一張成績表。