百位金童獎候選人之一的加拿 是球迷今季最易遺忘的一位

洛遊球地 於 28/08/2020 發表 收藏文章

提到加拿,曼聯球迷對佢既印象會係乜?或者唔好講大家對佢既印象,問大家兩條問題,睇下大家識唔識。第一題,佢係打咩位置?第二題,喺一隊入面,佢身穿幾號波衫?如果答啱兩題,不妨試下答埋額外呢一題,佢今季英超踢咗幾多場波?如果三題答得啱,睇嚟你都非常留意佢,或者非常留意曼聯。答唔啱亦都啱洗擔心,因為真係唔易答,點解?喺解釋比大家知之前,先開估答案。

1. 佢係打咩位置:防守中場 / 中場
2. 佢身穿幾號波衫:37號
3. 今季英超踢咗幾多場波:2場,總共9分鐘

我冇打錯,你都冇睇錯,佢今季只係踢咗兩場波,總共9分鐘而已,試問一個踢得9分鐘既球員,球迷又點會印象深刻呢?今日就想同大家講下加拿呢位球員。

加拿 (James Garner)
年齡:19歲 (2001年3月13號)
身高:186CM
國籍:英格蘭
慣用腳:右腳
位置:防守中場、中場

呢位曼聯青訓產品今季雖然喺英超上陣只有兩場,總共唔夠10分鐘,但喺歐霸都總算叫做踢得多啲。雖然唔係一隊正選球員,或者唔係出名既明日之星,但加拿亦都成功入選本届金童獎百人名單,可見佢喺潛力以及能力方面得到應同,今日就同大家介紹下呢位球員。



主要司職防中既加拿,被外國球迷譽為有可能係新卡域克,小編認為卡唔卡域克都係言之尚早,但係以佢今時今日既能力以及隊中其他隊員既能力,確實係有能力做成為一隊既後備球員。首先佢喺身高方面算係高大,雖然冇麥湯文尼以及馬迪咁,有米九既身高,但比起費特都仲要高10幾CM。可惜講到身型就比較瘦削小小,對抗性方面都冇話十分之好。但始終佢先19歲,身型仲可以慢慢去操,好似拜仁既哥列斯卡就係一個好例子。

喺身型上比費特佔優小小既加拿除咗有一個唔錯既身高之外,腳下功夫都有啲底子。無論係護球能力、短傳、長傳技巧都唔錯,感覺仲好似穩陣過費特咁。費特今季雖然明顯比上季進步咗唔少,由其上半季既時候,但下半季佢啲小無病又出番曬嚟,一啲好簡單既傳控都未做得好。如果球隊想喺呢方面改善一下,相信加拿都可以係一個選擇。

另外,啱啱都講過佢既長傳能力都唔差。事實上,球隊喺比賽既期間,若然冇咗普巴就好似冇另一位中場球員能夠轉到邊,不論係麥湯文尼、費特定係馬迪,球迷都好少見到佢地會大腳轉方面。反而飾演攻中既般奴好似還要比其他防中多。而加拿除咗有足夠既腳頭、準繩之外,視野方面都唔係特別差,喺青年軍既入面都會時常見到佢長傳轉邊,可見佢喺呢方面確實係有啲底子。



講到防中最重要嗰兩環,分別係搶波同攔截嗰方面,佢就屬於中間。點為止中間?佢有費特、麥湯文尼既積極以及肯落腳去鏟波既決心,又有馬迪既塞位能力,做搶波既工作又能夠勝任,做塞位遮線既工作都能夠應付自如。不過雖然佢喺防守入裡呢兩個能力都有,但係講到水平方面始終不及隊中其他球員。搶波未做到非常乾淨利落,遮線包位又未做得徹底。

另外最大弱點相信就係經驗以及領導能力。小編其實都唔係經常睇佢既比賽,但小編好記得今季英超對諾域治,加拿踢嗰八分鐘既比賽。雖然見到佢好肯同隊友做配合同埋好肯做無球跑動,會經常現位同攞波。但明顯見到佢冇嗰種感覺,喺想攞住個波嚟踢,反而係當個波一到腳,就即刻想彈走佢。對比喺青年隊既時候,控制住節奏既佢有啲唔同。唔知係咪因為個領導能力既問題呢?定係領隊既指引呢?佢同啱啱出道既麥湯文尼唔同既就係,麥湯文尼一出嚟,就有一種統治既感覺,但加拿相反就冇呢種感覺,令到喺控制節奏方面,嗰八分鐘都做得唔太好。



其次就係經驗方面明顯仲要提升更多,喺嗰場比賽入面,曼聯最終以3:1既比數,擊敗諾域治。而嗰球失球,除咗係麥湯文尼以及麥佳亞既失誤之外,加拿亦都有需要負番小小責任。當對手引球推進向球隊既中堅迎面衝埋嚟,而對手又處於一個極大威脅既位置之時,身為防中既佢有責任係立即犯規,中斷呢個攻勢,佢加拿只要追貼對手,冇選擇犯規,最後令到對手擺過麥佳亞,成功以寡敵眾,取得入球。喺呢一球既處理入面,明顯地見到加拿喺經驗上面係差咗小小,但總括嚟睇嗰場比賽,加拿既能力都唔差,確實係令人期待。

其實佢既打法就有啲似馬迪同埋以前既卡域克,但講到跑動量又比呢兩位球員好,唔知到底真係因為後生活力好,定係一個比較全面啲既中場呢?雖然佢就司職防中位置,但都會經常後上入禁區幫前場球員。呢一點同卡域克或者馬迪相比又好似有小小唔同。佢除咗會喺前場做一啲配合之外,都會射門。講到射門真係不得不提費特,佢都好經常起腳遠射,但講到準繩、威脅等等,就真係比較參差。相反加拿既射門準繩就比費特高得多。由曼聯官網顯示指出,費特今季有42次起腳,但中目標就只有38%。而加拿今季就有40次起腳,但中目標就有58%。雖然呢個比較可能有啲唔公平以及唔準確,始終一位係代表球隊出戰一隊賽事,而另一位今季通常都係為U23上陣。但係小編認為就算一隊同U23既比賽節奏、對手能力差得大,射門既準繩都應該唔會差得咁遠掛...


睇落去加拿感覺上好似每樣能力都有啲料,但又冇每一個方面真係特別出眾。比人既感覺就有少少周身刀冇張利咁。但係都係嗰句啦,佢先19歲,前途可以話仲係無可限量。但有一樣野佢必須要有,就係更多高水平賽事既上陣機會。今季佢只係喺英超上陣咗總共九分鐘,掂波都唔知有冇四十腳。喺咁短既時間除咗唔能夠表現自己之餘,更加唔會有太大既進步。試問喺呢兩方面都唔能夠得到機會,佢又點進步呢?其實計落,小編又覺得佢都開始有能力勝任一隊,唔洗正選,十場比賽入面有一兩場後備,踢番廿分鐘都好啊...但面對呢位連後備都唔願意換既領隊嚟講,要換加拿係咪真係仲更加艱難呢?

既然領隊都唔會比太多機會佢為一陣上陣,小編就衷心希望佢可以好似鍾泰希佢借出去,甚至好似高美斯咁另謀高就,咁樣先唔會浪費咗自己既能力。雖然先19歲,仲有大把前途,但如果能夠平握呢幾年,發展得再好啲,佢既能力一定會更大,始終後生學野都快啲嘛。萬一過多幾年,好似華舒福咁既年紀,開始要定型既時候,仲未搵到自己既風格,佢既足涯就麻煩喇...

如果喜歡我們的文章,請即分享到︰

標籤: 曼聯  加拿  

留言


請按此登錄後留言。未成為會員? 立即註冊
    快捷鍵:←
    快捷鍵:→