未來曼聯既方向到底點

洛遊球地 於 21/02/2020 發表 收藏文章
啱啱踢完首輪32強既歐霸賽事,即刻同大家分析一下。不過喺分析之前,小編又想問下大家,到底你地覺得曼聯未來既方向應該係「等待對手犯錯取得入球」,抑或係「爭取進攻機會取得入球」。
今場作客既曼聯,喺排陣上竟然係出乎預期所料,但表現就一如既往地差。先講講正選球員。 門將羅美路,後防5個後衛,分別係左閘威廉斯右閘達洛治,三個中堅分別係梳爾、麥佳亞同連迪洛夫。中場就用馬迪搭皮里拉。進攻就用咗馬達、連加特同馬斯亞。


上下半場兩隊攻勢都唔入肉,雖然係咁但兩隊都有一球斬獲。首先係布魯日喺14分鐘既入球,布魯日門將喺龍門小禁區開死球,直接去到曼聯中後場,把握曼聯後防學界式失誤,乖巧笠入輕出既羅美路,先拔頭籌。及後,比賽去到35分鐘,布魯日球員揼界外球,揼到離行離辣,曼聯球員馬斯亞把握到另一個對手既學界失誤,追番成平手。隨後,馬斯亞更有一記左腳既遠射。好可惜前利物浦門將米奴列,飛到盡啱啱救到再中柱,力保不失。曼聯下半場中後段亦加強攻力,恩哈路、費特、般奴相繼入替。比賽去到80分鐘,攻勢終於比較入肉,好可惜最後都未能再次將皮球送入網。最後1:1悶和。

雖然講就話兩隊攻勢唔係特別入肉,但係喺比較之下,小編認為布魯日表現以及攻勢更勝一籌。到底呢場波問題係出現喺邊到呢?即刻同大家分析一下。

首先用人方面,唔知係咪蘇斯克查想球員專注喺英超賽場上面,所以保持球員既體力。呢場用咗好多本來唔係正選既球員,包括馬達、連加特、皮里拉、達洛治等等。雖然呢到有幾位球員,表現落力,但好可惜都未能夠將球員自身既強項完全展現出嚟。

好似馬達咁,走上走落、不斷跑動做拉扯、騰出空位,可惜成隊得佢做呢啲工作,未能夠打生成隊波。有波在腳既時候,又搵唔到人走位或者配合,所以儘管相當落力,但無論係戰術或者係領隊,仍然係未能夠將佢發揮到極致。連加特跑動就好多,不過冇完全幫唔到手,攞波都係甩多。皮里拉仍然喺判斷嗰方面做得唔夠決斷,上腳非常多,亳無進步。達洛治打番個右邊就真係好過喺左邊,不過建樹唔多,因為球員既優點喺戰術上完全發揮唔到,喺防守方面又唔係特別好,所以比球迷覺得作用唔大。


戰術方面,曼聯仍然喺進攻方面亳無板斧,今場波就連上場對車路士最大威脅既角球攻勢,都冇埋。進攻就永遠得一招,向前踢然後叫馬斯亞同四個後防走。後防就更加差,以為人多好辦事?蘇斯克查就話比球迷知道,就算禁區企8個人喺入面,對手只要有3個已經打得贏有突。包位又唔快,出腳又唔準,難聽講就係8個雪糕筒。戰術同陣容明明同對車路士、曼城、利物浦一樣個喎,點解會踢到咁大分別?原因好簡單,因為曼聯今次既角色係進攻,對手雖然唔係死守,但係控球同球員本身能力都弱過曼聯,換言之控球權永遠都係喺曼聯腳下比較多。冇任何戰術底下,唯有以人多補救,所以上半場有幾次都係防守中場甚至中堅走咗上去,之後因為失位所以有好多甩漏。今場連落底出波做威脅都冇,其實真係唔關達洛治或者威廉斯事。你叫佢地出波都要有人入禁區頂,今場幾乎仲衰過上場,真係得一個喺禁區。呢個問題,我幾乎篇篇文都有寫,點解咁簡單既野都做唔到?80分鐘後,般奴入替咗先有好轉,但小編認為好轉既原因唔止係般奴同其他球員既分別,而係對手體力都消耗得七七八八,散曬咁制,咁就緊係多空位,踢得好啦。

曼城同曼聯其實依加入球都好依賴遠射同落底傳中,但點解兩隊分別咁大。其實一個好簡單既原因,就係配合多與少既分別。曼城邊線基本上有兩個或以上既球員做配合,禁區最少兩個,禁區頂最少又有一至兩個球員。配合做完,拉散曬對手防線,再噤個地波出嚟。再睇下曼聯每次都係靠邊線嗰個球員以一個人力闖,之前既馬斯亞、華舒福、占士、雲比沙加、達洛治、威廉斯甚至梳爾都試過,有幾多個真係闖得到,又闖得到幾多次?你叫啲本身打翼既做,都算啦。啲閘點做呀?仲有占士嗰啲根本腳法唔係好,同當年既華倫西亞分別都唔係特別大,你叫佢做,所以得出嚟既結果咪就係比球迷話佢差囉。就算勁到好似曼城既班拿度施華、馬烈斯、史達寧都要搵球員做配合啦。其實大大個版比蘇斯克查學,點解大半季乜都改唔到。


其實呢啲情況,喺曼聯身上發生已經係家常便飯。但係講咗咁多次,到底點樣去解決。蘇斯克查坐喺到黑面仲衰過擒日曼城對韋斯咸嗰場莫耶斯企喺到黑面,見莫耶斯喺到指手劃腳而蘇斯克查就坐喺到一碌木咁,有時真係覺得如其要比時間蘇斯克查教點解唔比莫耶斯教,起碼佢教愛華頓曾經有成績先啦。最近小編喺到研究喺英國考教練牌到底要做啲乜,見到有一個牌係要建立一個足球既哲學並且運用,而呢個牌係考英超教練前已經要考到既牌。我喺度諗咗好耐,到底蘇斯克查點樣考番嚟?數番後費格遜年代既所有教練,個個都有自己一套戰術同諗法,但教咗成年既蘇斯克查根本就冇。到底今時今日既曼聯,或者將來建立既曼聯,係要等對手有失誤先入波,定係運用自己既方法取得入波?雖然係好諷刺,但係今時今日既曼聯真係再冇辦法唔正視呢個問題。

如果喜歡我們的文章,請即分享到︰

標籤: 曼聯  布魯日  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→