《有片睇》分析坦夏第一簽 馬拉斯亞

望穿秋水曼聯終於迎嚟今夏第一簽，個個以為會係法基迪莊，點知就變咗馬拉斯亞。雖然坦夏最期待嘅迪莊，仍然未加盟曼聯，但點都好過喺轉會窗冇任何動作。小編冇乜留意荷甲比賽，所以對馬拉斯亞嘅認識，都只係一知半解。同其他球迷一樣，只係憑住網上嘅球皇片，去認識呢位左閘球員。不過都想同大家輕輕分析馬拉斯亞嘅踢法以及對曼聯嘅影響。
https://www.youtube.com/watch?v=FCY85mL8v7s

雖然曼聯終於喺轉會市場入面引入新球員，但明顯地呢一簽，絕對唔係好多球迷認同。有啲球迷認為左閘其實已經有好多球員，包括梳爾、迪利斯甚至係上季外借咗比諾域治嘅班頓威廉斯。再引入馬拉斯亞只係令到左閘處於人滿之患，相反應該改善其他位置。亦都有唔少球迷認為馬拉斯亞質素一般，喺荷甲就算打到曉飛都好，對手始終都係荷甲，未夠能力喺英超立足。不過都有球迷為坦夏抱不平，認為左閘雖然人腳多，但係質素始終都未夠，補強亦都未嘗為一件好事。事實上，支持或反對都好，都有合理原因。不過如果要小編揀，我就會偏向支持呢一單交易。


喺講馬拉斯亞之前，講少少上季曼聯左閘面對嘅問題先。基本上兩個左閘球員，分別係梳爾定係迪利斯，都係有段時間係受傷患困擾。兩個好似夾埋咁，季初就係迪利斯受傷，梳爾坐正左閘位置。季尾就啱啱好調轉，梳爾受傷，迪利斯坐正。


迪利斯都叫稍為好少少，梳爾可以用「玻璃人」嚟形容佢。上季計埋中咗武肺，梳爾足足傷咗18場英超賽事，仲未計其他比賽。18場入面，有啲係比賽中途受傷，需要替換，有啲就直頭缺陣，連後備都冇。小編怕讀者們唔知18場英超有幾多，所以輕輕帶過，英超一季總共有38場比賽。籠統啲講，梳爾可以話係有半季英超，都係處於受傷狀態。


至於迪利斯，就喺頭十輪英超賽事入面，錄得0分鐘嘅上陣時間，當時蘇斯克查真係一分鐘英超時間都冇比佢。而喺英超第30週嘅賽事入面，曼聯作客利物浦，漢歷克收起咗當時一直處於正選嘅迪利斯，而改用達洛治及雲比沙卡打左閘，兩位上下半場輪流交換左閘，不過仍然改善唔到左路嘅缺口，最終球隊大敗於晏飛路。喺嗰場比賽入面，更有三球係喺左路失波。可見漢歷克對迪利斯嘅防守能力問題存疑。而呢一個問題，唔只係漢歷克一位留意到，對上一個領隊，蘇斯克查喺著意防守嘅時候，都會選擇梳爾，而非迪利斯。甚至乎，一眾球評家、球迷等等，亦都好清楚知道迪利斯防守問題一直都係差。加上，上一季另一位後補左閘，班頓威廉斯被外借到諾域治，曼聯當時要搵到一個識得防守而少受傷嘅球員，根本就唔可能喺一隊搵到。


至於上一季，班頓威廉斯喺諾域治嘅表現又如何呢，相信小編都唔洗多講。一直被稱攻強於守嘅威廉斯，上一季喺諾域治雖然長期處於正選位置，但每一場都有好多失位嘅情況，甚至有啲唔能夠接受嘅失誤。要喺曼聯取得上陣機會，甚至乎為曼聯踢正選，喺今時今日威廉斯嘅水平下，好似真係冇乜可能，除非梳爾同迪利斯都受傷，威廉斯或者先會有啲機會正選上陣。基於呢幾個數據之下，試問曼聯又點可能唔收購一位左閘球員呢！？

咁到底馬拉斯亞，又點幫到曼聯手呢？睇番上一季，曼聯三位左閘球員，梳爾、迪利斯同威廉斯喺英超嘅數據，其實真係非常差。不論係進攻同防守，都絕對唔係頂級球隊需要嘅球員。小編用另外三位左閘球員同以上三位做比較，分別係白禮頓嘅古古尼也、曼城嘅簡些路以及利物浦嘅羅拔臣。喺比較之前，都講一講，呢個比較絕對唔係標準，因為每一隊踢法都唔同，自然喺數據上都唔可以準確地、公平地比較。不過都可以講一講少少數據比大家同曼聯三位球員比較一下。
Goals Conceded
梳爾 24次 (20場)
迪利斯 37次 (30場)
班頓威廉斯 52次 (26場)
羅拔臣 20次 (29場)
古古尼也 39次 (35場)
簡些路 25次 (36場)

喺呢個數據入面，梳爾雖然唔算多，但睇番出場次數，比其餘四位低好多。而迪利斯30場比賽入面，有37次已經非常差，更加唔好講威廉斯。古古尼也雖然都多，不過都上陣場次亦係最多。喺呢個數據入面，完全見到曼聯三位球員喺防守上面有幾咁得人驚。

Tackles
梳爾 21次 (成功率62%)
迪利斯 62次 (成功率55%)班頓威廉斯 55次 (成功率67%)
羅拔臣 36次 (成功率58%)
古古尼也 93次 (成功率67%)
簡些路 83次 (成功率65%)

呢個數據就更加見到個嚴重性，迪利斯成功率只有55%，姐係假設你係打曼聯嘅中堅，當迪利斯去做Tackle嘅時候，有一半機會係要你包番佢。而梳爾就只係得可憐嘅21次Tackles，仲要成功率都只係得62%。反而威廉斯仲要比以上兩位，嚟得更有說服力。

Big Chances Created
梳爾 5次 (助攻3個)
迪利斯 3次 (助攻6個)
班頓威廉斯 2次 (助攻1個)
羅拔臣 9次 (助攻10個)
古古尼也 3次 (助攻1個)簡些路 8次 (助攻7個)

防守唔掂又睇下進攻如何，對比起兩支強隊嘅左閘，曼聯嘅左閘比顯地比下去。不論係助攻次數定係創造機會嗰方面。明明曼聯左翼已經算係粒粒皆星，就算華舒福差都好，點都仲有個山曹。點解都係可以咁少助攻或者機會產生出嚟呢？


當然，只係用呢3個數據去比較，一定唔準，亦都好唔公平。始終大家喺唔同方面都有強有弱，而每一隊球隊打法，面對嘅問題都唔同。好似羅拔臣咁，防守數據明顯唔係十分好，或者係因為利物浦大但部分時間都係主攻為主，相反好少以防守為主，變相數字上唔係咁好睇。但係羅拔臣起碼喺進攻方面都叫唔失禮。相反，喺3個數據入面，曼聯嘅三位閘位球員都冇一樣比較出色。都未計一啲包波、封截等等嘅數據。


咁馬拉斯亞同三位曼聯嘅左閘又有啲咩唔同呢？小編認為馬拉斯亞優勝之處，會係喺Tackle上面。馬拉斯亞同梳爾、迪利斯嘅打法唔同。馬拉斯亞比較喜歡落鏟，訓落去。情況就好似雲比沙卡咁，呢一點其實好重要。曼聯球迷經常話梳爾漫不經心，有時候又唔會去盡。但係馬拉斯亞就唔會有呢隻情況出現，不過代價可能就係鏟唔中個波或者落地個勢差嘅話，受傷以及犯規嘅機會就自然變得更多。另外，馬拉斯亞踢法硬朗，雖然身型比較細粒啲，但硬朗加上速度同埋落鏟搭夠，絕對唔會怕英超一啲傳統型嘅翼鋒，例如回巢狼隊嘅查奧爾。

另外，馬拉斯亞亦都有唔錯嘅腳下功夫，雖然小編唔覺得進攻能力仲要比達洛治高，不過絕對唔會差得太遠。曼聯雖然左翼人腳多，個個都有突破能力，但經常要單人匹馬面對防守球員，有時仲要唔止一個。確實唔容易。喺其他聯賽或者仲可以以一敵二，嚟到英超就算水平有如尼馬、麥巴比級數，相信要憑一己之力去突破，都係好難。小編到依家，都只係覺得全盛時期嘅夏薩特先可以。甚至依加嘅沙拿、馬列斯、迪亞斯等等呢啲盤扭出眾嘅球員，都唔容易做到。所以曼聯左翼真係好需要左閘嘅幫手，不論係走位拉開對手定係做撞牆、疊瓦等等嘅配合。

至於有球迷話，曼聯點解要簽荷甲嘅球員，馬拉斯亞知名度又唔高，又冇英超經驗，根本就係一個賭注。小編明白呢啲球迷嘅憂慮，不過老實講。轉會窗入面，有邊啲球員係平、靚、正。首先，頂級嘅左閘，老實講全世界真係唔算十分之多。曼城都要高價收購古古尼也，就知道其實真係冇咩選擇。球迷們仲希望簽啲有質素嘅左閘，但曼聯連歐聯資格都冇，試問憑咩去簽人。老實講，小編認為曼聯時至今日，真係吸引到球員嘅，除咗係錢，真係冇。唔通真係「細細個就想加盟曼聯」、「曼聯係一支偉大嘅球隊」咩。再講，唔通曼聯攞一大舊錢去買左閘，而唔係其他位置？定係覺得左閘唔洗補強呢？


曼聯今季水喉唔算少但都絕對唔係多，如果真係留咗一大舊錢比法基迪莊嘅話，其實剩低嘅錢真係唔多，曼聯又要冇歐聯踢，吸引力大跌，一定會比其他球隊坐地起價。喺呢啲情況之下，其實曼聯簽馬拉斯亞未嘗唔係一件好事。講緊馬拉斯亞都只係準備23歲，進步空間都仲有，加上1500萬歐元加200萬附加條款，呢個價錢買到個踢緊荷蘭國家隊嘅球員，計落真係唔算貴。你話馬拉斯亞代表嘅國家係弱都話，雖然荷蘭唔算十分勁，不過都叫做傳統勁旅。加上雲高爾提拔佢入荷蘭國家隊，球迷們對馬拉斯亞嘅信心都應該要大啲。雖然雲高爾教曼聯嘅時候差，不過佢提拔嘅球員，確實唔差㗎。小編就認為呢個收購，就值得8/10呢個分數。唔知大家又認唔認同呢？


話時話，馬拉斯亞都曾經同過曼聯球員同隊踢波，嗰個就係鍾泰希。唔知大家又知唔知呢？