曼聯3M的將來及發展取決於蘇斯克查的一個決定 精選 推薦

喺文章開始之前，先帶番個頭盔先。因為小編想喺開始之前講一講自己既小小愚見，可能會得失某啲人，或者好多人會唔同意，請大家見諒。最近小編聽到某位足球評論員分享自己既意見，當中有一至兩點小編唔係好同意。講明先，喺呢到回應唔係想引起罵戰，只係想同大家分享下我既意見。嗰位評論員就話「長遠地不停繼續用恩哈路，會對華舒福以及格連活特成長不利。」，呢位評論員亦都話「恩哈路唔係成日用身體對抗性去做支點，喺兩場歐霸賽事入面，恩哈路會好快迎出嚟，Free住咁做穩定既回傳，華舒福同格連活特一定要學恩哈路咁點樣避開對抗既方法」
首先，小編就覺得曼聯繼續用恩哈路，對華舒福以及格連活特既成長唔會不利。如果一位球員能夠有啲優勝之處教到華舒福同格連活特，咁點解係不利呢？可能大家會話因為恩哈路長期打正選令到球員冇辦法更有效地進步。咁我想問當年伊巴嚟到，又係咪對馬斯亞、華舒福不利呢？C朗喺祖雲達斯踢，係咪對所有年青球員不利呢？當年細哨仲踢緊巴塞，係咪又對美斯不利呢？如果一位球員，競爭力仍然好高，又年青就真係可能會對其他同位置以及差唔多歲數既球員有少少不利喇。但恩哈路已經準備31歲，好老實佢仲可以踢到幾耐，又影響到華舒福同格連活特幾多呢？


相反，假設辛祖嚟到曼聯就真係對曼聯部份球員不利，好似占士、鍾泰希、達洛治等等。辛祖當年如果再留喺曼城，亦都對辛祖佢自己不利，因為同佢競爭既對手有馬烈斯、班拿度施華、辛尼等等。呢三位球員仍然處於當打既水平，如果要同佢地爭正選位置就真係十分難。但講番轉頭，恩哈路又點令到佢地不利呢，真係諗唔通。


另外，用歐霸兩場比賽講哈恩路唔係成日用身體對抗，小編都係有啲摸不著頭腦。首先，歐霸既對手有幾勁，大家都好應該好清楚。加上英超球隊同比利時球隊點樣比較呢？再講，球員點樣快出嚟迎波都好，如果真係有球員要Mark住你，打Monkey戰術，我又想問恩哈路點樣避開對手咁勁呢？打個比喻，近年既靴里拉Mark夏薩特，唔通夏薩特迎波唔夠快，定係佢唔識避開靴里拉？再講舊少少，當年朴智星Mark派路，咁派路又唔識避開星仔？

嗰兩場歐霸賽事只不過係冇人做呢個角色之餘，嗰隊既戰術都冇諗住去逼對手既支點球員先會令恩哈路咁易回傳姐。如果一個球員要死跟你，你點樣快去迎波，都會有人喺你隔嚟㗎啦。另外，華舒福同格連活特係咪一定要學呢啲方法呢，小編就覺得唔係喇。點解咁講？即刻入今日既主題。


首先，華舒福、格連活特甚至係馬斯亞，同恩哈路都唔係同一類型，點能夠相提並論呢？恩哈路個身橫幾多、厚幾多，同佢地三個比較真係冇得比嗰喎。加上人地三個都唔係踢嗰家波，點解又要去學人地踢嗰家波呢？小編好認同每一個球員應該向不同既方向發展，愈多愈好，愈全面。但有啲球員明明係唔適合，你點改造佢地都係唔適合㗎啦。當年小豆喺曼聯期間，都唔係做支點既嗰位球員，佢既工作只係喺禁區做搶點，做Finishing。但當佢去到韋斯咸，佢個踢法就改變咗，要學習出嚟迎波，攞落嚟等隊友。佢雖然真係學到，有做到，但效果有幾好，大家真係有目共睹。
明明3M都唔係做支點既球員，三個都擅長突破，擅長做Finishing，你叫佢去學做支點？咁等同搵美斯踢般尼，打基斯活個位姐。本來唔係嗰家波，你點樣去逼，點樣去改造根本就冇用，只會嘥咗個球員。好似當年巴爾喺熱刺用速度、靈活去令自己打得愈嚟愈好，但去到皇馬，球隊夾硬要佢變到好似C朗咁，最後受傷又多又打唔番水準。

小編之前都品提過高美斯，認為大家唔可以用身高或者體型去定義邊位球員合唔合適踢邊個賽事。姐係話，矮唔一定踢唔掂英超，高都唔一定踢得掂英超。但係體型同身高，就會定義咗邊啲人會踢到邊啲踢法。好似高洛治咁，唔通你叫佢靈活盤球，轉身去擺脫對手咩？但相反一啲比較矮，重心低既球員做可以做到呢啲動作。


要令到3M進步，首先要知己知彼，到底曼聯現時球員打到咩風格既足球，而又係咪合適佢地既打法。用利物浦做例子，佢地三叉戟能夠發揮得咁好，就係因為用盡曬三位球員既長處以及令佢地既弱點唔再出現。相反，你夾硬令3M學識做支點，同自己Show個弱點出嚟有咩分別。明明已經唔大隻，你面對啲硬淨啲既中堅，真係波皮都唔洗掂。依加曼聯仍然未搵到一個合適佢地既進攻套路，係因為蘇斯克查仍然冇自己一套打法，亦都冇去定型球隊既風格以及球員既打法。

如果要曼聯進步，最先要做既一件事，就係將每一個球員既踢法定型咗先。到底華舒福係咪適合打中鋒唔打翼鋒呢？馬斯亞又應該點樣放呢？格連活特會唔會只係負責搶點、Finishing呢？定係仍然要喺3M入面搵一個做支點球員呢？呢一個就會係蘇斯克查最頭痕既問題，亦都係影響3M既將來去向以及發展。


小編認為加盟一隊波，除咗講人工、講名譽、講感情之外，都好講到底隊波踢法啱唔啱球員。唔應該因為球隊既風格，而改變球員打法，相反應該用球隊風格去遷就球員。所以依加最重要一定係去認清楚球員最擅長邊項，從而去踢嗰個風格。曼聯到底係咪一定要個支點球員呢？真係好睇蘇斯克查既決定。而呢一個決定，亦都會令3M既將來有著好重要既變化。佢地會可能因為呢一個決定而踢得差，明明係進步得好快變成進步得好慢，甚至跌Watt。亦有可能因為咁而離隊，所以關鍵一定在於蘇帥既一個決定。


喺足球場上，自己既教練就會想盡辦法去令所有己隊內既球員優點Show盡，弱點就盡量隱藏。相反，教練亦要令對手既弱點放大，令到球賽更易控制。好似當年曼聯對車路士，摩連奴就係好清楚車路士最重要既係夏薩特，而解決佢既方法就係打Monkey。死都要跟住佢，只要唔好比佢有空間就能夠解決整隊波既攻勢。舊少少既曼聯對AC米蘭都係異曲同工之妙。
呢篇文章既開首，唔係想引起任何罵戰。亦有可能有好多地方，大家會覺得小編既諗法有誤。希望大家唔好十分介意，小編都只不過係想分享下自己既感受同諗法。因為好多事情都只不過係觀點與角度問度，小編唔係想指正呢位評論員既講法，只係唔同意而已，希望大家明白。如果真係引起好大回響，小編願意將文章刪除。