曼聯球迷能否給迪基亞一個機會?

洛遊球地 於 07/05/2020 發表 收藏文章

隨著曼聯外借比錫菲聯門將軒達臣今季表現神勇,而迪基亞既表現相對有啲回落下。曼聯不斷被傳出會用軒達臣取代迪基亞,導致最近球迷們都紛紛討論迪基亞既去向,到底應該留隊繼續做曼聯既正選門將,還是賣走迪基亞改用軒達臣呢?

迪基亞(David De Gea)
年齡:29歲(1990年11月7號)
身高:189CM
國籍:西班牙
慣用腳:右腳
位置:門將


迪基亞,2011年由馬體會轉投曼聯。當年高價加盟曼聯既佢,被喻為雲達沙既接班人。其原因係佢喺馬體會既出色表現以及大家對費格遜既目光有信心,令球隊以及球迷們都對迪基亞投下信心既一票。迪基亞喺曼聯既日子裡面,比大家既感覺都係一個好頂級既門將,係一個必然正選既球員。不過其實佢喺曼聯入面,都唔係所有日子都係順風順水。

小編記得當初初到曼聯既迪基亞,比小編既感覺就好似一個傻仔咁,除咗因為佢既英文唔好,被誤以為偷冬甩一事之外,仲有初到球會既表現經常失魂,打手鎚又唔準等等。因為後者既事情,令到費格遜都忍唔住雪咗佢幾場。不過喺往後既日子,都有報張報導過佢原來一直有遠視問題,只係因為有段時間醫生又話佢唔適合做手術,有段時間又想代表西班牙踢奧運比賽,所以就遲遲都冇做手術,帶住隱形眼鏡上陣。其實對一個喺西班牙打滾開既門將嚟講,初步嚟到英超確實唔易適應。因為無論喺踢法上同節奏上,分別都真係好大。由其當年英超打法仍然好多球隊以高空攻勢為多。所以迪基亞初初喺曼聯既表現都算係不堪入目,不過隨著日子流逝,迪基亞既表現都開始穩定番,亦因為咁,正正式式成為曼聯既一號門將。



唔經唔覺,原來迪基亞今年已經準備踏入三十歲。為曼聯出戰接近四百場(394場)既迪基亞,由一個被寄予厚望既明日之星慢慢都變成球隊入面既老臣子。最近佢就喺曼聯官網講到自己既感受,以及講到想喺曼聯留更多既日子。但係好多球迷都對迪基亞留隊,有唔同既意見。某啲球迷就唔想佢留低,有啲球迷就覺得佢留低對曼聯仍然有好處。

其實無論喺實力上、年齡上,迪基亞留喺曼聯繼續長居正選位置,踢高水準既比賽仍然係卓卓有餘,畢竟身為門將,喺體能上既要求唔高,所以好多門將雖然年齡都有番咁上下,都仍然冇話退休,甚至仍然應乎高水平賽事。喺呢方面不得不提今年已經42歲既保方。現時保方仍然代表球隊出戰歐聯既賽事,可以話係呢方面既佼佼者。所以講到迪基亞應唔應該留低喺曼聯,喺年齡同實力上根本不容置疑。


今季迪基亞表現雖然未算話特別出色,甚至有幾場都有失準既情況出現。不過點都講好,佢既表現都談不上係差。但點解仍然有球迷會對迪基亞想留隊有意見呢?最主要既原因一定係因為迪基亞對球隊既忠心程度。喺過去既幾年,其實迪基亞一直都有話想離隊,加盟皇家馬德里。雖然當時皇馬已經有基羅拿華斯,但仍然對迪基亞虎視眈眈,而迪基亞亦好想重番馬德里,所以促使到有呢一單轉會,但最後因為Fax機既一事,令迪基亞冇轉會去到皇馬,從而繼續留喺曼聯效力至今。接住迪基亞又不斷要求加人工,最終曼聯都成功地同迪基亞傾咗份新約。但呢件事一直喺球迷心中,從未忘記。如今迪基亞年紀開始漸老,競爭性、吸引力都遠比以前高,而好多大球會亦唔缺出色既門將,令佢選擇唔多。所以就話想留喺球隊,無疑地係會令球迷覺得佢想搵個好歸宿,而非對曼聯忠心。

雖然小編都覺得有呢個可能性既機會好大,始終人有自知之明。喺呢個時期,加上軒達臣既出現,迪基亞要留喺球隊,都必須出番句聲。無論真係愛球會,或者真係為咗泊個好碼頭。但迪基亞真係唔值得留喺曼聯呢,小編就對呢個說法有啲保留。



其實迪基亞雖然多次話想離隊,又不斷要求加人工。不過最後迪基亞仍然為球隊付出百分百,其實冇功都有勞呀。好多球迷可能話,球隊有出糧比你,你就好應該付出㗎啦。加上你身為球隊既一份子,就好應該為球隊付出百分百。小編又咁睇,時下好多球員為咗離隊,真係乜都做得出。Hea踢既有,罷操練既又有,如果迪基亞衰啲,大可以喺Fax機嗰年,雖然轉唔到會但係就罷操、Hea踢。如果係咁,其實曼聯當年既成績可能更差。雖然呢個係球員既專業精神,做番自己本份可算是必然。但試想下,當年係佢既當打之年,約又唔多,就算球隊有骨氣唔用迪基亞,然後雪佢,其實大家最終都只不過係一拍兩散。因為佢絕對唔會差得遠既,最多唔踢比賽一段時間,但起碼人工繼續袋。然後完約免費送比其他球隊,蝕既更可能係曼聯。但當轉會市場完咗,迪基亞仍然打出應有既身價,為球迷攞咗好多分。其實喺情義方面,咪當打和囉,真係唔可以當粉筆字抹咗佢?

加上從迪基亞角度出發,其實佢離隊真係無可厚非。自費格遜退休後,曼聯一直喺重建階段。不斷換領隊,球隊成績差,又冇一個好明確既改革喺曼聯身上發生。身為一個有價值既球員,又未攞過啲咩大獎項,離隊確實係算係一件好正常既事。獎項對球員嚟講,有時唔止係一個名譽,喺足球圈更係一個價值。假設一個球員攞過幾個歐聯獎盃,同一個冇攞過任何大獎盃既球員對比,前者既價值必然係比後者既大。其實當年既迪基亞屬是當打之年,喺嗰個時期加人工算係合情合理。再唔喺當打既時候加,唔通等老咗先加人工咩。



小編認為球迷唔應該將足球員呢個角色定型,其實好多球員真係純粹當份工咁打。邊間球隊人工高、吸引啲,咪去邊間球隊囉。世界上唔係有咁多個忠心既球員,會一世效力一個、兩個球會。當然,亦都有好多球員係咁樣做,或者唔止效力一、兩個球會,不過對球會既忠心程度好高。但都唔可以因為咁,而定型每一個球員。迪基亞,用咗當打既十年為一直重建緊既曼聯付出,唔介意有冇歐聯獎盃,唔介意防守球員由李奧變成鍾斯,唔介意球隊由強攻對手變對手強攻自己球隊。喺好多經典中既大賽入面,多次神救,造就一場又一場既勝仗。如果球迷要求球員對球隊有情既時候,球隊又係咪要對球員有義先算合理呢?

迪基亞喺今季表現,真係大不如前。不過今季都作出好多神救,救咗曼聯、救咗蘇斯克查好幾次。係咪就因為軒達臣打咗一年好波,就抹煞咗迪基亞喺過往九年既功積呢?小編唔係認為軒達臣唔值得正選位置,只係替迪基亞唔抵。講到反應、講到落地、講到經驗,迪基亞仍然高軒達臣一班,咁快就用軒達臣或者咁快就放棄迪基亞,到底係咪一件正確既事呢?各位曼聯球迷又可唔可以比迪基亞一個機會呢?小編認為一日做小偷,唔代表佢一世都係小偷。如今,迪基亞都心表立場,希望留隊,亦都同大家講咗係愛呢隊波。真係唔值得一個原諒既機會?

如果喜歡我們的文章,請即分享到︰

標籤: 曼聯  迪基亞  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→