曼聯來季可能會離隊既球員——後防篇

洛遊球地 於 27/05/2021 發表 收藏文章

曼聯喺歐霸決賽不敵維拉利爾之後,正式迎接第四個四大皆空既球季。近年嚟,曼聯既人腳變化都非常大,其中一個最重要原因就係因為曼聯喺後費格遜年代,經常幾季就換一次領隊,而領隊風格又唔同,令到好多領隊嚟到球隊之後,需要將某啲球員放棄,以及增添一啲新球員,我地俗稱為「清瘀血」。而帶領咗曼聯兩年幾仍然無冠既蘇斯克查喺今季仲需唔需要繼續送舊迎新呢?今日先同大家分析曼聯既後防。



第一個要講既,一定係今年既大大大後備,羅美路。自從甸軒達臣今季喺錫菲聯重返曼聯之後,最大受害者相信就係羅美路。呢一位曾經係曼聯既二號門將,今季因為軒達臣重返令到佢被貶為曼聯第三門將。曾經為曼聯捧下歐霸獎盃既羅美路,今季竟然淪落到好似李爾格蘭咁,一場都冇為一隊上陣過。其實曾經既功臣淪落至如此田地,真係令到好多球迷心痛。昨日睇完歐霸決賽,見到大家討論曼聯應唔應該換軒達臣守十二碼,小編反而喺到諗,其實如果蘇斯克查肯喺英超正選用迪基亞,後備用軒達臣。而歐霸比賽正選就用軒達臣,後備用羅美路,又會唔會更好呢?羅美路守十二碼又有心得,又可以令到佢好離好去,何樂不為呢?各大傳媒都已經講羅美路將會喺7月1日離隊,甚至喺Transfermarkt都已經寫咗佢離隊,相信呢次既離隊都毫無懸念,希望羅美路未來既日子將會更好。最近亦有傳曾經同佢夾手夾腳捧走歐霸盃既前曼聯領隊摩連奴有意收購將自由身既羅美路。唔知佢地又會唔會再次合作,再次捧起來季既歐霸盃呢?



另一位亦都將會離隊既球員,啱啱喺上一段都提及過,就係李爾格蘭。李爾格蘭喺2018年由史篤城有盟曼聯,效力曼聯咁多年,都只為曼聯一隊上陣兩次,雖然喺收購佢既時候,格蘭喺史篤城既表現十分出色,但當時佢既加盟,各大球迷以及球評家都知道,呢一個收購只不過係為曼聯添加後備板凳深度,對曼聯既影響唔大。不經不覺佢已經將近約滿,而38歲既格蘭喺曼聯既價值都唔大,相信離隊都係塵埃落定,大家又記唔記得格蘭生涯有咩代表作呢?


下一個講既就係曼聯既老臣子菲爾鍾斯,菲爾鍾斯雖然份合約仍然未到期,距離到期仲有兩年咁多,但係菲爾鍾斯喺近呢兩年既上陣次數真係十隻手指都數得曬。同啱啱講既羅美路一樣,今季鍾斯都冇為一隊上過陣,都唔止,佢喺上一個球季都只係得8場既上陣,仲衰過羅美路既上陣次數。鍾斯最大既問題除咗係佢既球商以及技術唔夠之餘,最大問題係傷患困擾。曼聯其實係非常需要一個身型比較大份,防守高空波好既中堅,而鍾斯曾經都算符合呢啲條件。如果能夠真真正正擺脫傷患,操番好啲狀態,做曼聯既後備,輪換下好似李斯特城既韋斯摩根咁,其實都仲有價講。但鍾斯既傷患,又係咪咁易克服到呢?而球員本身既質素,又係咪令球迷或者令領隊滿意呢?相信大家都心中有數,鍾斯喺曼聯既日子,到底仲有幾耐呢?


講完個老臣子講番個比較新小小,被外借咗去AC米蘭既達洛治,喺未來既日子又會點呢?達洛治為AC米蘭效力咗一季,表現就真係中規中矩。有傳AC米蘭就唔會買斷達洛治,而好快就會重返曼聯既達洛治,喺曼聯既地位其實又真係唔係幾穩陣。首先係因為無傷無病既雲比沙卡喺防守真係非常出色,雖然仍然未做到滴水不漏,失位既情況都成日出現,但係佢既攔截確實係世界級。雲比沙卡1對1面對對手,幾乎係有贏冇輸。加上喺進攻方面,今季明顯地有改善,雖然都係有少少唔知佢想點咁,但都偶有佳作。反觀達洛治就有少少食之無味 棄之可惜,進攻雖然係比雲比沙卡好得多,不論係腳法、盤扭技術以及傳中既準確性。但係喺防守方面,真係差好遠。喺AC米蘭既比賽入面,對手既能力好多時都唔係非常之強,但出錯既情況都時不時出現。而英超既水平更要比意甲嚟得強,要達洛治出任右閘,相信球迷食求心丸都食到死。假設要達洛治推前一格打右翼又如何呢?右翼今季雖然仍然未有一個非常合適既人選,但不論係美臣格連活定係阿密迪亞奴都一定好過達洛治,左閘既位置就更加唔洗講,面對住今季重新大爆發既梳爾,迪利斯都無辦法搶去佢既正選位置,達洛治相信就更加比下去。曾經被摩連奴稱為明日之星既達洛治,雖然都只係22歲,但係不論左閘右閘既位置,好似都冇乜機會比佢發揮,唔知佢會唔會離開曼聯,尋覓新機遇呢?



最後一位防守球員相信大家都曾經對佢有一定既期望,佢就係班頓威廉斯。回帶番到上一個球季,班頓威廉斯既表現相信唔洗我多講。但今季表現就真係有好大既反差。小編最記得佢喺季尾對李斯特城既表現,非常之差。幾乎傳親波上前面都係交失,防守又唔穩陣,完全比唔到安全感隊友以及球迷。對比起上一季既表現,簡直就係判若兩人。佢要喺左閘搵到位置,相信絕對唔容易,因為競爭對手不論係如日中天既梳爾定係價值不菲既迪利斯,能力都係比威廉斯高好幾班。而右閘雖然佢都打到,但係今季基本上喺主要賽事都唔會比佢上陣,而佢既潛質又好似見底咁,唔知佢又會唔會提早離隊,搵個有正選踢既球隊呢?


班頓威廉斯雖然睇落去就最唔似會離隊既球員,但佢今季既實力,小編認為連英超既水平都未達到。假設再留喺曼聯,上陣既機會都唔會特別高,加上小編相信假設雲比沙卡無病無痛,都好難動搖到佢既位置。預期喺曼聯到再等多幾年,倒不如出去闖一闖。相反,曼聯應該搵個年紀大少少既右閘球員做替補,都不失為一件好事。始終放個年青球員喺後備,又唔會比正選佢打既時候,就只會浪費咗嗰位球員,再者年青球員都唔會甘心於做後備。所以小編認為,曼聯最好既做法,可能就係趁班頓威廉斯仲算係有價有市既時候,就趁早賣走佢。

到底曼聯來季會離隊既後防球員會有邊個呢,小編又有冇數漏杜安錫比呢?相信喺不久既將來就會有結果,因為曼聯今季既後防線確線唔算係好,由其是中堅問題,所以「清瘀血,增人手」相信都係必定既事情。希望曼聯除咗改善人腳問題,都正視一下防守死球既問題啦...

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→