幸運大師蘇斯克查再一次無招勝無招

洛遊球地 於 18/10/2020 發表 收藏文章

星期六尾場紐卡素對曼聯既比賽,又係一場比分同表現不成正比既一場。雖然講到曼聯喺呢場比賽入面既數據非常之好,全場擁有超過60%既控球率,以及28次起腳,而當中亦都有14次射中龍門。照統計數字以及比分嚟講,曼聯表現確實好似係幾好,但事實上有睇場波既球迷,都好清楚曼聯既表現其實都唔係好好。喺分析呢場比賽之前,照舊講一講整場比賽既一啲精華先。

曼聯今場同對上一場對熱刺既比賽,用人分別多咗好多變化,除咗因為馬斯亞停賽,格連活特正選後備都冇之外,曼聯仲要顧及嚟緊星期二晚對巴黎聖日耳門既歐聯賽事。因此用人方面都唔同咗好多。今場門將繼續採用最近備受質疑既迪基亞,防守方面都冇任何變動,雖然曼聯有新成員泰利斯加盟,但今日都只係坐喺後備席。防守中場方面就選用咗麥湯文尼以及費特兩位比較有活力既球員。至於左翼就選用左占士、右翼就選用馬達,而攻中方面就繼續採用般奴費南迪斯。中鋒方面因為馬斯亞停賽關係,就搵左華舒福替代。

華舒福(中鋒)
占士(左翼) 般奴(攻中) 馬達(右翼)
費特(防中) 麥湯文尼(防中)
梳爾(左閘) 麥佳亞(中堅) 連迪洛夫(中堅) 雲比沙卡(右閘)
迪基亞(門將)


曼聯喺開賽初段唔夠5分鐘,就已經先失一球。紐卡素憑住一個傳中球,省中梳爾彈入。令曼聯幾乎整場波都要喺壓力中進行。失咗一球之後,曼聯先開始企穩陣腳,攻勢都愈嚟愈多。雖然好多波都喺對手半場內做組織,但曼聯不斷都只係嘗試喺中路突破,但面對住對手鐵桶型既防守,根本難以將皮球由中路攻入。唯獨有一球曼聯成功地透過馬達以及般奴既配合,令般奴射入世界波,然而因為越位既關係,般奴呢球世界波都只能令曼聯球迷開心一分鐘。及後曼聯憑住馬達一個具威脅既攻門,成功獲得角球。角球由馬達處理,麥佳亞頭槌一擺,皮球直飛死角,成功追成平手。曼聯追成平手之後,亦都有華舒福作出多番嘗試,可惜威脅不大。


下半場曼聯明顯地踢得更積極,奈何球隊仍然未有太大改善,埋門次數雖然多,但無論係質素定係威脅都唔大,加上紐卡素門將達奴「上身」,令曼聯仍然搵唔到入球。直至比賽去到55分鐘,曼聯經VAR check之後,被判獲得十二碼,可惜般奴宴客,未能令曼聯成功反超前。及後比賽時間去到69分鐘,蘇斯克查先開始作出第一個調動,收起費特換入普巴。普巴入替後,用波明顯再多咗少少,但效果始終唔係十分顯注。76分鐘,蘇斯克查再將今場表現一般既占士收起,換入雲達比。兩位中場球員雖然落到場明顯喺中場既統治力加強咗唔少,但因為陣式既改變以及陣容既平衡,令到曼聯喺進攻方面,仍然搵唔到太大威脅。85分鐘,普巴喺曼聯防守左路犯規,令紐卡素得到一個死球機會。紐卡素球員舒維處理,落點亦好準確,可惜紐卡素未有球員接應。及後曼聯隨即反擊,華舒福憑住佢既速度爆落邊線,然後等到般奴疊瓦,送般奴一程,最後般奴以一個非常乖巧既射門,將皮球送入網,成功反超前1:2。4分鐘之後,曼聯憑住耐心既組織,以多腳傳送猜散紐卡素防線,最後憑住華舒福同雲比沙卡既一個撞牆,令雲比沙卡面對一個半單刀機會,而雲比沙卡亦都不負眾望,成功把握機會射成1:3。96分鐘,散曬既紐卡素再一次因為曼聯既反擊,令華舒福得到單刀機會,華舒福輕鬆射入,然後球證亦都隨即嗚笛,結束呢場比賽。



今場波明顯地再一次見到馬達同般奴合作得非常好,兩位喺前場既眉來眼去以及靈活走位,令曼聯進攻變得更立體。加上喺後備席既普巴冇正選上陣,令到曼聯喺進攻方面明顯爽咗好多。曼聯雖然今場入球多,但喺進攻方面,明顯仲係差幾班波。曼聯仍然唔能夠有說服力地解決對方死守問題。幸好曼聯能夠把握對手既空位,反擊成功先可以打破悶局。另外,蘇斯克查喺換人方面,仍然係非常之慢以及唔夠果斷,毫無進步。比賽時間去到85分鐘,其實曼聯既處境都唔係好樂觀,而兩個換人亦都見唔到十分顯注既改善。而後備席方面,仍然有恩哈路呢位進攻球員可以比蘇斯克查選擇。但蘇斯克查冇任何舉動,當比賽去到89分鐘,曼聯先準備換馬迪出嚟。而喺戰術方面,無論係進攻與防守,都見唔到有任何板斧以及改善。以下就同大家詳細解釋小編既睇法。

首先講到戰術方面,雖然曼聯今場最後比數好似好好,但係喺85分鐘之前,曼聯喺戰術上完全唔見有任何板斧。今場曼聯中鋒華舒福雖然喺排陣上佢係打中鋒位置,但佢同占士經常重疊同一個位置。令到曼聯喺中鋒冇任何人接應,當般奴、馬達想喺中間滲入,就冇其他人同佢地做配合。但對比起馬斯亞打中鋒既時候,佢就會經常企喺9號位到,同翼鋒球員以及攻中球員等等做配合。



另外除咗中鋒問題之外,曼聯亦都冇用盡球場既闊度,當兩翼用波既時候,佢地會選擇收入中間,變相好多球員都囤積喺中路,冇任何空間比其他球員發揮。右翼馬達屬於一個半翼鋒既球員,經常走入中間都尚算合理。但另一邊翼鋒,占士方面,佢都經常推入中間,就令到自己愈推愈少空位。占士打左翼最常做既事就係扣大位用右腳射門,做法就好似以前拜仁既列貝利咁。但係佢最大問題就係冇用盡球場既闊度,令到占士扣大位之後,有既空位就變得好少。加上兩翼好少運用兩閘既疊瓦,呢一點亦都係今場波,其中一個非常大既問題。
其次,當對手塞曬喺中路既時候,曼聯從來冇打算點樣去解決問題,亦都冇考慮過改用兩邊做多少少攻勢。

至於換人問題,其實都同戰術關鉤。蘇斯克查面對死守以及老鼠拉龜既情況,佢選擇喺70分鐘先開始進行換人調動,舉動非常慢已經眾所週知。但用人方面,都令小編有啲摸不著頭腦。其實當時曼聯需要既,就係創造力以及節奏更快既球員,但蘇斯克查首選竟然用普巴而非雲達比。普巴雖然有創造力,但眾所週知佢既踢法就唔係好爽嗰種。球隊正正需要節奏加快既時候,就換咗一個拖慢節奏既球員出嚟。不過,蘇斯克查今次都算聰明,見情況冇乜任何改善,就立即將雲達比換入,收起占士。呢個換人舉動無疑地做得好好,但戰術上有冇任何變動呢?曼聯當時打緊5個中場,分別係麥湯文尼、般奴、馬達、普巴以及雲達比,同以前打3個中場唔同。陣式有變但戰術同踢法冇任何改變。以往有兩翼分工都比較明顯,但當陣式改變之後,5位中場既角色、分工都好似變得唔清唔楚。感覺上就好似5個中場都想用波,然後冇人做走位、入攝呢啲工作。比賽時間去到85分鐘前,曼聯仍然係老鼠拉龜,完全搵唔到好既威脅、優勢。點解唔考慮下恩哈路呢?當時其實曼聯非常缺乏支點,冇任何球員停到波做以往馬斯亞既工作。而恩哈路正正最強項就係呢一點,點解唔選擇用佢呢?小編可以理解既係蘇斯克查擔心有乜野突發事情,佢可以仲有一個換人名額比自己做調動。但係1分同0分,分別真係咁大咩,85分鐘都仲唔諗住All-in?

可能大家會覺得小編雞蛋裡挑骨頭,或者大家覺得今場波一直攻唔入既原因,只係因為對手門將「上身」。但係小編想解釋既係,其實今場若不是紐卡素體力下降,而又湊巧對方得到罰球機會,後場球員壓咗上去。曼聯根本冇乜機會贏到呢場波。作為一支得到今屆歐聯參賽資格既球隊,踢成咁其實真係唔值得高興或者覺得踢得好,相反更需要正視好多問題。蘇斯克查今時今日仲可以靠住不同既運氣去贏波,但當球隊面對強隊既時候,就唔能夠再以無招勝有招。嚟緊曼聯即將會迎接魔鬼賽程,如果曼聯仍然係咁既戰術、咁既表現,曼聯既將來將會令人非常擔憂。



蘇斯克查曾經講過,佢以前係一個進攻球員,喺進攻方面既心得會多過防守,喺訓練上都會以進攻多過防守,然而今時今日曼聯無論係進攻定係防守,都顯得患得患失。前場球員冇任何進步,後防球員就更加冇改善。好似今場咁,雖然華舒福最後錄得2助攻、1入球,但表現有幾好,相信大家有目共睹。有幾多個機會浪費,有幾多個決定做錯、做慢。而占士加盟一年,又有冇任何進步呢?

不過無論如何,曼聯今日總算重返勝利軌道,希望嚟緊喺魔鬼賽程能夠表現得更好,令曼聯可以愈嚟愈順。

如果喜歡我們的文章,請即分享到︰

標籤: 曼聯  蘇斯克查  紐卡素  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→