「尷尬囉」 一條片證明曼聯連阿積士都不如！？ 精選

仲有一個月，英超又再開鑼，好多球隊都密鑼緊鼓為新一季做作準備。今夏轉咗新教頭嘅曼聯，當然唔例外，話曬要教好一班大帝，真係唔容易。唔只係我話呢班球員係大帝㗎，小編啱啱睇完ViuTV嘅「空肚講宵夜」，Baby John都有提及過㗎，雖然就冇指名道姓，亦都冇話過係邊一隊，邊一啲球員，不過佢就講到近季成績差，而佢之前亦都有接受過訪問，提及過自己鍾意曼聯。咁到底啱啱節目係咪講緊曼聯嘅球員係大帝呢，就交番比各位球迷領悟或者交番比Baby John解釋喇。不過好老實，曼聯一眾球員，被稱為大帝都唔係第一日嘅事，球員喺場內、場外嘅表現，真係同大帝冇乜差別。
後費格遜年代嘅曼聯，表現算係每況愈下，經歷過唔同嘅教頭，唔同嘅打法，都好似搵唔到一個合適嘅踢法咁。曾經試過摩連奴嘅踢法，以防守為主，以防守反擊，擊敗過好多強隊，亦都攞過幾個獎項。亦都試過蘇斯克查聲稱嘅進攻足球，都曾經有一段時間，為曼聯球迷帶嚟唔少驚喜。當然亦都試過漢歷克成名之作，以快速逼搶嘅打法，喺頭幾場嘅賽事入面... 不過顯然地，以上幾個打法，都好似唔係好適合曼聯一眾球員。咁到底新上任嘅坦夏又會帶嚟點咩打法比曼聯一眾大帝呢？


喺曼聯嘅YouTube頻道入面，曼聯就更新咗幾段曼聯球員重返卡靈頓訓練嘅片段，而片段當中除咗有一眾球員熱身同埋做一啲簡單嘅協調之外，亦都有一啲訓練嘅模式。而模式同以往有少少唔同，可能係因為新領隊上任，教嘅野，要求嘅野都唔同啦。而曼聯訓練嘅模式就同以往阿積士嘅一樣，心水清嘅球迷一定會表示：「唔難理解，始終坦夏以前就係教阿積士，用番自己嗰套教曼聯球員都好正常。」。無疑地，用番自己最熟悉嘅教法，相信係最好嘅。不過有眼利嘅球迷就搵咗阿積士嘅訓練，同曼聯近日嘅訓練做咗個比較。兩條片比較之外，明顯見到曼聯喺做One Touch嘅速度比阿積士嘅慢得多。球員與球員之間嘅距離都比阿積士球員訓練時隔得遠。除此之外，亦都見到阿積士嘅球員，喺呢一個訓練入面做得比曼聯球員「爽」，相反曼聯球員就有一種「施施然」嘅感覺。



而球迷們睇到呢條片之後嘅反應都好有趣。有啲球迷就話「呢啲就係差別喇」「差別就係在於心態上」亦都有啲球迷就話「阿積士玩呢個訓練玩咗一年，曼聯就只係玩咗一日」。唔知大家對呢兩條片嘅睇法又係點呢？小編今次就中立少少，認為大家都講得冇錯。確實，喺條片入面，曼聯一眾球員真係同阿積士冇得比，但同時亦都好認同，熟能始終會生巧，今時今日做得唔好或者真係因為未熟呢。不過喺條片入面，亦都出現咗另一個亮點，講緊嘅就係坦夏對曼聯球員當時嘅反應。片段中不斷聽到坦夏強調「On the right foot」不過有球員聽到之後，仍然冇用右腳，最後坦夏都有話「Making too many mistakes」。


到底曼聯嚟緊喺新一季嘅打法、表現，會係如何呢？小編睇完條片，真係有少少擔心，依家又話傳C朗都想走，走埋嘅話，曼聯之後嘅日子真係唔敢想像。結果係好嘅話，緊係求之不得啦。如果更差嘅話，即係話又要等多幾年！？

坦夏嚟到曼聯之後，強調過佢希望曼聯係可以踢法比較爽，節奏快啲，要係進攻足球，球員們要有信心，勇於用波。但呢幾年有留意曼聯嘅球迷，一定好清楚曼聯近年嘅風格，已經再唔係以前嗰種，行軍速度好快嘅踢法。相反已經係漸漸改變咗為，拖慢節奏，以控球為首嘅踢法。另外，坦夏希望係踢進攻足球，但係以上一季英超嘅表現嚟計，曼聯入球數字就只有57球。喺傳統嘅Big6球隊入面，曼聯嘅入球數值係敬陪末座，仲要比韋斯咸同李斯特城少。唔好唔記得，上季仲要有好多都係C朗憑個人能力爭取番嚟。憑住上季咁嘅表現，坦夏想曼聯踢番啲進攻足球，難道會唔會有啲大呢？另外，不得不提嘅係曼聯上一季英超失球，同樣係57球。即得失球差為0，只計得失球差嘅話，曼聯排英超第10。如果來季曼聯專注喺進攻方面，失球數字又會唔會更加多呢？


至餘坦夏希望曼聯球員踢得更加自信，要有信心肯用波呢一點，小編相信曼聯球員應該就會改善到嘅。因為最近亦有報道指，坦夏喺曼聯訓練期間，唔接受球員作無謂的橫傳和回傳。其實呢一點真係對曼聯嚟講好重要，近年曼聯改變咗踢法之後，崇尚控球之下變得多咗好多回傳同橫傳。令到曼聯喺進攻嘅時候，好多時會顯得老鼠拉龜，加上翼鋒唔勇於喺邊線進行突破，令到曼聯嘅攻勢好單調。依家坦夏呢一個舉動，睇得出佢對曼聯都算係幾了解，亦都有想改變呢個習慣嘅心。呢一點，對曼聯嘅進攻確實係好大嘅幫助。
坦夏到底可唔可以改變到曼聯，喺未來嘅日子可唔可以帶領曼聯重回正軌，其實仲有好多變數。當中包括坦夏之後仲會唔會為曼聯添加新球員，新球員又啱唔啱洗呢？另外戰術上又係咪適合曼聯球員呢等等。另外喺球員狀態上面，又會唔會係重要嘅因素呢。其實一條片，又點樣比較到曼聯同阿積士，淨係球員狀態都有差別啦。曼聯好多球員啱啱先放完假，隻腳可能仲硬緊，好似小編喺第五波疫情放寬之後，控腳波都甩甩漏漏啦。未上力之下，坦夏將訓練模式拉遠咗，球員未夠「爽」，都仲可以接受嘅。不過長遠都係咁嘅話，曼聯嘅將來就真係令人擔心喇。唔知球迷們對坦夏有冇信心呢，來季曼聯應該攞第幾先滿意呢？歐聯資格係咪一定要有先算合格呢？歡迎球迷們留言。