季前的訓練造就今天的曼聯

洛遊球地 於 04/08/2020 發表 收藏文章

繼上一篇文章寫曼聯喺今季英超既一啲問題之後,今日繼續寫曼聯喺今季英超既表現,今次就係入球篇。喺開始之前先同讀者講番,上一篇文章就冇發佈喺Facebook入面,所以大家可能冇睇到,大家可以Click番呢到睇番篇文,「從今季英超看出曼聯的三大問題」

話到明今篇文章係入球篇,所以都會攞幾個入球去同大家做幾點既分享,講講今季曼聯既一啲進攻模式以及一啲入波既方程式。事不宜遲,即刻由第一點,亦都係今次篇文章既標題開始。

記得今季開季之前,梳爾曾經接受過訪問,當中佢亦都提及過佢地喺季前既練習,已經練緊一套踢法,就係點樣去做逼搶,以至將對手既控球權搶回。喺整季英超賽事入面,球迷的確見到曼聯喺呢一方面做得非常之好,好多時都能夠成功完成戰術,成功將控球權搶回,甚至做到好多入球出現。


至於係乜戰術,相信大家都好清楚,就係前場壓迫。自從足總將規矩改咗,可以喺開龍門球既時候唔洗開出禁區之後,好多球隊都會嘗試喺開死球既時候,開短然後組織上去。令到整個球壇都愈嚟愈多球隊打前場壓迫既戰術,包括今季既曼聯。其實曼聯喺對上幾季,講緊仍然係摩連奴帶領既時候,已經開始嘗試踢呢種打法。但當時曼聯喺戰術上明顯未夠清晰以及好似冇乜練習過,所以好多時都只有幾位球員上去做壓迫。而喺中場甚至後場既球員,就只有緊守自己既崗位,變相好多時都會出現前場同中後場斷開一半,或者只有一兩個球員去追去拍,其餘既就只有捕位或者望住佢地去撲。當中兩位現時國際米蘭既球員,分別係前曼聯球員盧卡古以及借咗比國際米蘭既山齊士就最常做自己一個撲既角色。雖然睇到佢地明顯係好有心都去做迫搶,然而根本就冇可能以一人之力去成功做到迫搶,令到佢地經常喺前場有氣餒、以及埋怨既表現。

但今季我地見到曼聯明顯喺呢一方面,落咗好多功夫。無論係團結嗰方面,定係默契方面都做得非常之好。當對手嘗試喺後場組織,好多球隊都會將皮球交比中堅,由中堅發板,所以整季英超入面,每隊掂最多波既球員,好多時都係以中堅為最多。當對方中堅控制住皮球既時候,曼聯既中鋒係唔會立即衝上去做迫搶,反而係將對手慢慢引去邊線,而翼鋒球員以及中後場球員,就會喺呢個時候慢慢向前壓或者準備去前壓,當皮球去到對手閘位球員時,就會立即壓上去。

呢一個戰術喺好多球隊入面,都開始變得好常見,當中曼聯亦都曾經比呢種戰術擊破,令到球隊失分。最為人記得既應該係曼聯對陣修咸頓,賽和2:2嗰場。小編亦都做過一啲分析,可以回顧番上一篇文章以及片段。而曼聯喺面對對手打呢種打法既時候,亦都冇太多解決既方法係做到,可以話係成也這戰術,敗也這戰術。雖然係咁,但曼聯無疑地喺防守時做呢種打法,今季見到係幾奏效。


不過喺季初至季中,以及季中至季尾既時候,曼聯都有一個好大既分別喺執行呢種戰術之後既行動。曼聯喺季初至季中既時候,好多時當佢地成功迫搶之後,都會重新組織。當皮球去到防中或者閘位球員既時候,曼聯都會將皮球回傳,重新組織,感覺就好似功成身退咁,戰術成功之後重新再嚟過。但去到季中至季尾既時候,曼聯就開始冇咗呢種打法,取而代之既就係立即做一個功勢,殺對手一個措手不及。

點解季初既季尾既分別咁大,正正就係因為般奴。今季所有球迷都見到般奴踢得好好,好多時都能夠做到助攻、入球等等,呢啲事實幾乎連隔離屋陳太都知道,但有幾多人知道般奴仲有好多間接既作用做到出嚟呢?般奴除咗喺曼聯隊中,做到一個領袖以及一個中場既連繫人,連接後場同前場之餘,佢亦都有一樣野係非常有價值。講緊就係,「簡單」。簡單、直接既踢法令到曼聯整隊好似變咗身咁。曼聯以往就係打簡單、直接既打法愈踢愈好,但自從費格遜退休、足壇既踢法開始改變、曼聯幾個唔同既朝代終結之後,整隊曼聯都好似變曬咁,好多時將一件事簡單複雜化。呢一樣野除咗係幾位球員令到球隊咁之外,領隊亦都有問題。但當般奴嚟到之後,明顯見到球隊以佢為重心,加上佢喺球場入面指手劃腳,帶領住隊友點樣踢。令到隊波明顯喺踢法上直接了當咗,其實喺般奴既踢法入面,就係有空位就嘗試射門、多跑動、多直接既傳球等等,然後將呢啲重作不斷重複。

我地見到當般奴嚟到之後,每當曼聯執行到呢個戰術之後,般奴就會作出起腳或者向前傳送,但相反喺般奴未嚟之前,曼聯就係冇呢一種打法。因此亦都解釋到點解曼聯喺復賽之後,曼聯有咁多入波出現。因為曼聯開始將皮球向前傳,以及終於有一把手術刀。回想番般奴未嚟之前,用費特、麥湯文尼甚至皮里拉,佢地就係少向前傳波,冇一個劏穿對手防線既能力,所以只能夠橫傳、回傳,重新組織。


講完今季曼聯一個成功既戰術之後,就講到曼聯另一個入球方式,呢種方式睇落去就好似好講個人能力,但事實上好多時一兩個跑動,就幫到隊友好大忙。講緊就係馬斯亞、占士、華舒福好常用既一招,拐大位起腳射門。呢一招確實好大部份都係講球員既質素,而球擅既佼佼者當然有為人熟識既洛賓、古天奴等等既球員啦。但明顯見到曼聯三位球員同以上兩位球員既差距都有啲大,因此呢三位球員亦都好需要戰術去及隊友跑動去做幫手。講呢個戰術之前,都想講一講曾經以呢一招喺維拉成名既前曼聯隊長楊格,喺最近比賽亦都用呢招入咗球波。


講番呢種打法先,好多時要成功作出到射門,球員通常係以一敵一既情況下,用身體擺動以及靈活快速既腳法擺過對手,然後起腳。要成功做到呢一招,首先球員喺盤球方面要做得好好,皮球要好貼腳,好似夏薩特、古天奴等等,另外腳法亦都要有番咁上下底子,當兩樣條件都非常符合的話,基本上就好似格連活特咁,一個打曬,唔洗任何隊友做到啲乜。但好明顯,馬斯亞、華舒福同占士喺呢一招上面,都未到格連活特既級數。因此好難去擺脫到對手,就算成功射門,好多時都比對手省走。因此佢地好需要一個中場球員或者一位閘位球員既幫手,佢地做既野好簡單就係Over Lap,做一個疊瓦拉開防守球員,唔洗將對手成個拉開,只需要令到對手拉開咗一步,其實佢地就好夠開位做到呢一招。

我地見到曼聯對般尼茅夫5:2嗰場比賽,馬斯亞就係用呢招成功取得入球,而當時正正就係梳爾走上去做疊瓦,本來亦係馬斯亞同對手,一對一既狀態。但當梳爾走上嚟,對手就右移一步,令到馬斯亞有機會射門。同樣既方式同樣既入球都曾經出現過喺占士身上。喺季初修咸頓對曼聯既賽事入面,占士同樣係一對一,對住蘇亞利斯,然後馬達喺占士身後走上做疊瓦,蘇亞利斯右移一步,令到占士可以有空位射門製造入球。



最後一個曼聯既入球方式,亦都係曼聯好需要繼續改善既一點,就係長傳快速反擊既打法。今季曼聯對Big6既比賽入面,曼聯喺攞分方面,都做得非常之好,當中更成功喺英超雙殺同市宿敵曼城以及藍戰士車路士。而當中曼聯經常採用防守反擊令對手失球,雖然今季喺Big6入面既表現可以話係非常好。但事實上,好多入球都係有幸福成份或者係一啲死球、十二碼等等。

防守反擊入面,防守就做得唔錯,但反擊好似始終都差少少火喉咁。其實曼聯前場既速度真係不容置疑,然而球隊明顯地好少利用佢地既速度。喺Big6入面既對決,曼聯都會用下佢地既速度,因為喺賽前都會準備下,練習下呢種打法。但相反當對手係中游甚至下游,曼聯又好似少咗呢種打法。雖然曼聯對中游、下游好多時都唔係打防守反擊,但係咪唔打呢個戰術,就完全唔打反擊呢?


曼聯好多時都缺乏長傳,不論係轉換邊線定係長傳放上前場都比較少,呢一點就令到曼聯少咗好多入球機會,好多時曼聯前場都走甩咗對手,但控球既隊友好似永遠都睇唔到佢地或者永遠唔去嘗試做傳送,當中費特就最常出現呢個問題。小編留意咗好多次費特呢個問題,佢好多時都係慢咗一步先見到,或者比唔到隊友,講緊唔係傳失嗰隻未唔到,係傳唔到個波出去嗰隻,最後就只可以同隊友Say Sorry。

整隊波感覺就好似得普巴一個夠腳力傳上去咁,但我相信踢得英超、踢得職業足球、甚至踢得曼聯,喺後場夠力長傳踢上去前場應該係好基本既事,如果係基本既話點解唔嘗試多啲呢?準唔準繩,比唔比到隊友都已經係另一回事,起碼叫做有嘗試過。但今季曼聯喺打反擊既時候,長傳既永遠就只有普巴一個,其實只要肯做多啲長傳,曼聯亦都可以入到更多波。就好似季中,諾域治對曼聯既賽事入面,占士一個長傳,就令到華舒福單刀射入。而今季曼聯首場比賽對車路士都有異曲同工之妙,普巴既長傳,交到比華舒福單刀射入。小編認為如果曼聯多幾個球員嘗試做多啲長傳,喺呢一方面下多啲功夫,曼聯喺入球方面就可以昇華,再提升一級。



曼聯今季入球方面,的確係改善咗好多,由其喺前場壓迫呢個戰術入面,真係令球迷對曼聯充滿期望。但喺其餘幾個入球方程式入面,仲有好多需要改善既空間。小編認為曼聯今季確實已經漸漸展現出佢地有足夠既實力去挑戰冠軍,只要喺戰術上再下多啲苦功就已足夠。球迷們經常同車路士對比,認為球隊需要好似車路士咁大手引入球員,小編反而認為戰術上既訓練比羅致球員更重要,唔係話曼聯一個球員都唔需要買,中堅、中鋒當然要添加人手,但中場、翼鋒又需唔需要呢?小編就有所保留...

下一篇文章將會繼續從整季英超分析曼聯,而下一篇就係失球篇。如果大家想睇埋入球、失球片段,可以Click入嚟,有一個簡單既分析。

另外最近都見到好多同我文章相似既創作以及諗法向球迷分享,小編亦都明白可能真係會有好多意見相同,但如果真係想用小編文章既論點的話,希望都打番個Credit by「洛遊球地」,感謝!
標籤: 曼聯  入球  

留言


請按此登錄後留言。未成為會員? 立即註冊
    快捷鍵:←
    快捷鍵:→