好好先生馬達留喺曼聯既日子仲有幾耐 精選 推薦

幾乎所有曼迷都會同認同既一點，一定係莫耶斯害咗整隊曼聯。但大家又記唔記得莫天才對曼聯都做咗一件好事呢？講緊既就係將馬達由車路士帶到嚟曼聯。好記得當時馬達去曼聯簽約嗰陣，搭直升機飛去曼聯，型到爆。原來不經不覺之間，佢已經為曼聯效力咗6年。亦即係話曼聯亦都重建咗六年了。

六年前，小編當時對馬達既認識唔深，大概係因為除咗曼聯之外，都再冇關注其他球隊。所以儘管佢為車路士上陣幾多場，踢咗幾多年，小編都冇乜去理會，或者冇乜印象。唯一一個印象深刻既，就係佢啲罰球有啲料，不過迪基亞仲勁。直至馬達嚟到曼聯，小編先開始真真認識呢位好好先生。
喺呢六年入面，曼聯同馬達一齊經歷咗好幾個時代，由莫耶斯到雲高爾到摩連奴到蘇斯克查，無論球隊重唔重用佢，佢都一直保持高水準既表現，抱住一個專業既態度面對每一個領隊以及每一場比賽。只要佢有份落場，就會盡力跟從領隊既要求，做到最好。儘管有啲打法，有啲位置明明就唔啱佢打，佢都會盡力為球隊付出。今日就同大家淺談一下，32歲既馬達仲會留喺曼聯幾耐呢？

馬達(Juan Mata)
年齡：32歲(1988年4月28日)
身高：170CM
國籍：西班牙
慣用腳：左腳
位置：攻中、左翼、右翼

為曼聯上陣249場既馬達，至今總共為曼聯攻入48球，數字上雖然唔多，但相信佢場上既表現絕對令球迷滿意。不過，講到近年馬達真係有啲大不如前，可能因為年紀都有番咁上下，加上球隊有好多球員代替咗佢既位置。以下一啲英超數據就可以話比大家知，初來乍到既馬達同近兩季馬達既分別。


(2013/2014）註：一月冬季轉會窗才加盟
7助攻 4入球
總共14場比賽 1場後備上陣 總共1320分鐘

(2014/2015）
4助攻 9入球
總共33場比賽 6場後備上陣 總共2308分鐘
(2018/2019）
4助攻 3入球
總共22場比賽 6場後備上陣 總共1293分鐘

(2019/2020）註：未完季
2助攻 0入球
總共17場比賽 9場後備上陣 總共733分鐘

由此可見近年嚟，馬達無論喺表現以及出場時間都係大幅地減少。到底點解會咁呢？最大原因一定係馬達同領隊既風格有別，近年嚟無論係摩連奴帶領既曼聯，抑或蘇斯克查帶領既曼聯，佢地都會要求前場有一定既速度。由求喺摩連奴時期，曼聯經常以防守反擊為主，確實令馬達不得不放落後備。加上呢幾年曼聯喺中場以及翼鋒都有好多選擇，當中有好多球員更比馬達實用得多。

以右翼位置而言，馬達喺球場上，除咗無球跑動、做配合以及做駁腳之外，基本上冇乜其他用途。相反好似馬斯亞、占士等等既球員，除咗做到無球跑動、駁腳之外，佢地都有一定既反擊能力以及速度，加上盤扭過人既技巧都比馬達好。佢地除咗可以扣大位射門、做配合之外，亦都有可以落底出波。但馬達就冇呢支歌仔唱。


中場位置而言，馬達喺體能上亦都開始應付唔到90分鐘既比賽時間，加上曼聯打三個中場既關係，無論攻與守，三個中場球員都要顧及。喺進攻方面馬達仍然算合格，但要馬達顧及埋防守，確實係差啲。因此，無論係摩連奴定蘇斯克查都會寧願用皮里拉、費特、麥湯文尼都唔會選擇馬達。


咁到底馬達仲有冇留低喺球隊既價值呢？雖然近年嚟馬達表現確實係有下滑既跡象，但論佢既專業態度、閱讀球賽既經驗、能力以及對球隊既忠心，絕對值得留低。無疑地馬達喺呢幾年既表現同當打既時候相差好遠，但喺控球能力、護球能力、閱讀球賽能力，都比隊中好多球員好。例如連加特、皮里拉等等，加上佢既經驗絕對能夠教到一班年青球員。而且曼聯來年都應該繼續有歐洲賽資格，多一個球員輪換對曼聯嚟講，絕對係一個好既做法。

加上喺打法上，曼聯陣中冇乜太多球員能夠好似佢咁，做到咁多出色、有作用既無球走動。另外，喺傳送方面馬達都仍然係世界級，如果曼聯面對一啲死守既球隊，需要有多啲球員做走動以及打穿防守，馬達絕對仍然有資格留喺曼聯。


雖然睇落去馬達留隊仍然係樂觀，但事實上小編認為馬達既日子仲有幾耐，真係講唔定。因為喺近年嚟，曼聯經常作出好多收購，希望儘快將球隊既平均年齡都拉番低啲，以及將整隊波重建，所以好多上咗年紀既球員都會被淘汰。最近曼聯亦都傳出想簽雲迪碧克，而阿積士既CEO暨曼聯名宿雲達沙亦都講過，收到消息話曼聯對雲迪碧克有興趣。雲迪碧克假設真係嚟到曼聯，總會取代一啲球員，到底會係一啲年紀比較老既球員，定要取代一啲作用冇咁大既球員呢？相信好多球迷都會選擇後者，然而曼聯近年來做既決定有時都真係超出意料，所以馬達到底會唔會繼續留到隊呢，仍然係一個迷。


曾經親身到場睇過曼聯比賽既小編，對馬達真係好有好感。除咗因為呢位球員既處事以及態度，令小編非常欣賞，記得當日曼聯踢完比賽，小編冒住雨等影相以及簽名，就只有幾位球員埋嚟。當中更加得馬達係最親民，同用最多時間同球迷逐一影相。呢啲球員喺現今既足球界入面，真係買少見少。最近小編亦都見到有個新詞彙「真曼」，好多球迷話恩哈路係「真曼」，如果係既話，相信馬達亦都係另一個「真曼」。

馬達，喺當打時期嚟到曼聯，為曼聯重建付出，唔介意正選與後備，唔介意球隊失去歐聯資格。由26歲打到依加32歲，最高峰時期都獻給曼聯，然而曼聯亦都冇太多交代比馬達。直至今日，佢仍然留喺球隊，盡每一分力為球隊付出。呢種精神，呢種心態，絕對值得尊敬！