大戰後完美展現出蘇斯克查完敗喺摩帥手上

洛遊球地 於 21/06/2020 發表 收藏文章

今週矚目大戰除咗有曼城對阿仙奴之外,緊係唔少得熱刺對曼聯既比賽。今場波曼聯同熱刺都有好多球員可以復出上陣,兩隊幾乎都算 Full Team出戰呢場比賽,除咗熱刺既阿里需要停賽之外。喺講蘇斯克查點樣完敗之前,先同大家簡單文字講述曼聯喺呢場比賽既過程先。

曼聯今場採用番4231既陣式,傷癒復出既普巴列入後備名單。相反同樣係傷癒復出既華舒福就列入正選名單。

曼聯陣式(4231)
馬斯亞(中鋒)
華舒福(左翼) 般奴費南迪斯(攻中) 占士(右翼)
費特(防中) 麥湯文尼(防中)
梳爾(左閘) 麥佳亞(中堅) 連迪洛夫(中堅) 雲比沙卡(右閘)
迪基亞(門將)

講比賽之前,先想藉住呢個機會,讚一讚梳爾。喺過去既抗疫期間,見到好多球員番嚟都有個大肚腩喺到,當中祖雲達斯既希古恩就最為明顯。但相反梳爾喺呢段期間,唔單止冇脹咗。相反仲減咗好多,以前見佢大大份,個心口同背脊好厚。到今日見到佢明顯冇咁厚,身型上Fit咗好多,絕對值得稱讚。不過因為曼市到呢一刻都未有髮廊開,所以同頭就比較「薯仔」啲,冇以前咁型。

返回正題,曼聯喺初段就同熱刺打成均勢,曼聯就稍微佔咗少少優勢。大多數既控球權都落喺曼聯腳下,相反熱刺就縮後嚟踢。然而曼聯得到既控球權完全冇任何發揮空間。12分鐘,熱刺既孫興慜避開咗雲比沙卡,推到大位喺禁區頂起腳,可惜噤死咗個波。21分鐘,般奴接應占士回傳,隨即出波,熱刺後防球員戴雲遜山齊士頭槌解圍變咗助攻,皮球落到華舒福腳下,華舒福隨即起腳,可惜角度未夠刁鑽,洛里斯用腳救出。然後亦有費特以及般奴既射門,雖然中龍,可惜威脅不大,洛里斯輕鬆沒收。26分鐘,洛里斯大腳踢上前,梳爾頭槌頂前,皮球落到奧利亞身上,然後比到貝治韋恩,貝治韋恩推入中間,輕鬆避開想捉路既麥佳亞,勁射入網,先拔頭籌。雖然貝治韋恩射門角度並非十分刁鑽,但勝在勁度十足,加上迪基亞一個失誤,打咗個波入網,令熱刺領先1:0。31分鐘,熱刺閘位球員奧利亞傳中,孫興慜喺沒人看管既情況下,頭槌攻門,可惜力度欠奉,迪基亞飛身救出。45+2分鐘,般奴離門三十多碼作出射門,皮球臨到門前急墜,不過亦無影響洛里斯,洛里斯輕鬆接實皮球,上半場完。

下半場,曼聯仍然沿用番同樣陣式以及球員,53分鐘般奴再一次遠射,可惜略門而過。59分鐘,曼聯終於作出換人調動,占士、費特換出,換入普巴以及格連活特。63分鐘,普巴同般奴中場配合,般奴乖巧轉身,隨即將皮球放到馬斯亞腳下,馬斯亞控橫然後起腳,熱刺中堅戴亞趕得切阻擋射門,化險為夷。65分鐘,梳爾傳中,馬斯迪再一次搵到機會射門,可惜再一次比洛里斯救出。77分鐘,馬斯亞、連迪洛夫換出,恩哈路以及馬迪入替。79分鐘,普巴喺邊線既突破,過咗熱刺防守球員戴亞,然後戴亞喺禁區侵犯普巴,被罰十二碼。般奴主射十二碼成功取得入球,將比時改寫成1:1。89分鐘,曼聯球員華舒福搶到奧利亞波,然後傳比禁區既般奴,最後般奴跌低,球證再一次直指十二碼。但經VAR覆核,十二碼取消。95分鐘,恩哈路橫傳比格連活特,隨即用佢招牌式插花一擺,然後起腳,可惜冇中目標。95分半鐘,般奴轉身後再一次遠射,不過今次就射得離行離辣,最後球證嗚長笛。熱刺同曼聯打成1:1,各得一分。賽後曼聯領先踢少一場既錫菲聯兩分排第五,落後第四名少踢一場既車路士兩分。


呢場比賽入面,先講一講熱刺幾位非常出眾既球員,包括右閘既奧利亞、防中施素高、哈利榮斯以及門將洛里斯。呢場佢地四位表現相當對板。奧利亞走上走落,威脅非常大,令曼聯左邊經常受到好大既壓力。有一個助攻之餘,射門以及傳中都有威脅。兩位防中喺塞位以及盯人既工作都做得好好。令曼聯唔容易打穿熱刺防線。洛里斯亦有多次撲救,而且非常穩陣。

反觀曼聯方面,真係冇乜邊個可以讚,般奴雖然有入球,但表現並非十分好。後防表現亦差,門將迪基亞既失誤,兩位中堅喺失嗰球都要負上責任。除咗麥佳亞有問題之外,負責包位既連迪洛夫亦都係好慢。左閘梳爾算係表現比較好既一位,雖然上半場都係喺佢嗰個位到失,但長期面對幾個對手,梳爾都冇太大犯錯。另外,下半場多番上前製造到好多機會。相反,右閘雲比沙卡表現不算太突出,因熱刺進攻偏向曼聯左邊多,而雲比沙卡上前幫忙亦冇太多作為,由其傳中球經常唔到位,有一兩球甚至令前場失去控球權。防中兩位球員完全冇作用,原因唔係打得差,而係戰術害咗佢地,文章之後會解釋。前場三個球員表現亦冇一個突出。



講完呢場比賽既一啲精華之後,就到小編既解說,點解小編會咁大膽打呢個標題呢?全因為呢場蘇斯克查完美展現出佢同摩連奴真係仲有一段距離。首先睇排陣,曼聯繼續用4231,其實問題不大。但蘇斯克查諗漏咗一步,就係當摩連奴少咗阿里,仲會唔會好似上次曼聯主場贏熱刺咁,同你鬥中場,爭控球權呢?好明顯唔會啦,加上摩帥最叻就係打防反,緊係縮後同你踢啦。

但蘇斯克查喺陣容上已經話咗比對手知,話咗比球迷知,你係想打防反。中場有普巴傷癒復出唔用,竟然繼續用麥湯文尼以及費特,唔係話唔得,只係咁樣好明顯就話比人知,我會打防守為主。因為佢地兩個都係防守比進攻好,如果真係想打進攻,用馬達都好呀。到開賽嗰陣,熱刺刻意縮後同你踢,曼聯唯一可以做既事,就係跟賽事發展去行事,有波咪控住,然後發板,唯有做主動囉。起初都還可以,踢得唔錯,之後二十分鐘後摩連奴見到唔對路,就叫哈利榮斯Mark緊啲般奴,施素高就負責包位。摩連奴既安排係將兩個防中,一個做塞位,一個做Mark般奴。然後曼聯就因為咁,令麥湯文尼同費特要用多啲波,同壓前啲。每當熱刺有反擊既時間,摩連奴要會叫熱刺前場球員,好似林美拉、孫興慜、貝治韋恩走前。走前既意思係走到去防中既身後,姐係曼聯既中堅與防中之間。每一次都係三個人走呢啲位,而唔係現身攞波。然後熱刺就踢落去位到,比球員去追。

反觀呢一刻既曼聯,防中兩位被指示既工作唔係去追人,而去兩個都做破壞既工作。一個去對住有波球員,另一個就負責包波,萬一本來對波嗰個球員失咗,就另一個保上。最後就形成熱刺前場三個,加埋簡尼對住曼聯四個後防球員。大家有興趣可以睇嚟場波,上半場好多次都係咁,令曼聯喺人數上先人少打人多。熱刺既入球,除咗迪基亞同麥佳亞有問題之外,大家留意下,點解防中會冇人呢?就係因為兩個防中都係做同一樣工作,就係喺防中位置做破壞。但熱刺係冇人現身上前攞波,請問做啲咩破壞呢?兩個防中因為熱刺縮後而壓前,加上要做破壞而唔係塞位、對線,令到當皮球過咗佢地頭,中堅就亳無遮掩下對住幾個進攻球員。



我地再睇番熱刺做一個比較,兩個防中既工作非常清晰,一個負責出嚟對住般奴,另一個就只係負責塞位。雖然冇球員去做破壞,但摩連奴好清楚一件事,只要將般奴威脅減到最細,所有曼聯前場球員都發揮唔到。所以佢地任由麥湯文尼以及費特攞波或者做傳球。

然後熱刺另一個做得最好既野,就係要奧利亞走上走落。首先佢既進攻能力本身已經好強,加上曼聯左閘防守係比右閘防守弱,加上兩個防中都唔係塞位,只係喺中間做破壞,所以當熱刺前場四個球員攞到波,奧利亞就會九秒九咁跑上去幫手,令梳爾經常要一個顧兩個甚至三個球員。整個上半場曼聯都係咁樣,好老實輸一球算少。


下半場以為蘇斯克查睇到呢個問題,點知出到嚟,仍然冇變。人冇換、戰術冇變;唯一有變既就係喺進攻方面,蘇斯克查落咗指令要兩閘多啲上前做配合。但明顯兩閘既進攻能力係未夠班,由其係雲比沙卡,呢個時候我睇咗一睇後備球員,點解冇達洛治呢?熱刺非常聰明,經常唔用孫興慜嗰邊,就係因為想避開雲比沙卡,因此呢場波雲比沙卡喺防守上面,根本冇太多作為。如果達洛治喺到,打個右閘,會唔會更好呢?如果後備唔係班頓威廉斯係達洛治,就完全可以解決到右閘進攻力唔夠呢件事啦。小編唯一搵蘇斯克查諗到既,就係因為威廉斯打到左右閘,就算傷咗一個都唔怕,所以就選擇威廉斯冇選擇達洛治。

咁小編又有疑問,眾所週知兩閘進攻都唔掂,仲要夾硬推上去,有咩意思呢?另外,依加英超新規定可以換五個人,點解唔早啲換人呢?好明顯地,呢場波兩個防中打係冇用,冇用既原因唔係佢打得差,而係蘇斯克查比既指令錯咗。如果係咁,點解唔一早就出馬迪呢?馬迪本來就係一個負責塞位既防中,負責控制節奏,左右轉邊,相反費特同麥湯文尼就算點跑上跑落,都係幫唔到球隊,點解唔一早換走佢地呢?就算唔用馬迪,下半場開波前,即刻換入普巴或馬達得唔得呢?



今場兩個防中既踢法以及作用根本就完全運用唔到喺球場上,以前見到費特可以滿場飛去做破壞,今場冇。以前見到麥湯文尼Box To Box做到好好,今場冇。因為熱刺縮後,喺進攻嗰時又唔會有人現身,咪令到兩個作用變零囉。咁般奴呢?般奴一直就比榮斯管住,當佢攞到波既時間,榮斯就立即對住佢,雖然未到打Monkey咁,好似星仔捉派路咁。但係就咁對住,加上施素高喺後面塞位,已經足夠令般奴威脅減低啦。直至去到60分鐘,蘇斯克查先換走費特,換入普巴。因為兩個中場都做到波,喺進攻上有威脅,令熱刺兩個防中就分散注意,注意除咗落喺般奴身上,更要落喺普巴到。變相般奴喺60分鐘打後,咪打番生囉。

然後另一個問題就係馬斯亞,喺比賽去到50分鐘既時候,有一個數據曾經出現過。就係全場觸球最少球員,馬斯亞9次,簡尼同施素高10次。馬斯亞本來出嚟現身,攞背脊「得」住人都已經唔叻,加上佢又唔係成日現身,點解唔早啲換恩哈路呢?起初安排占士、馬斯亞同華舒福打前場,就係因為要佢地既速度姐,整個上半場摩連奴都話咗比大家知,佢會縮後踢。喺呢個情況下占士、馬斯亞既作用,一定係歸零㗎啦,點解仲要拖到77分鐘先換馬斯亞呢?

比賽去到77分鐘,除咗換走馬斯亞之外,亦都換咗馬迪,但換出既球員係連迪洛夫。起初小編仲以為馬迪會打中堅,拍住麥佳亞啦,點知麥佳亞竟然打前啲,中堅係麥湯文尼同馬迪。我當堂嚇一跳,然後得啖笑。如果你要麥佳亞打前少少,點解唔搵後備既馬達甚至連加特呢?或者叫麥湯文尼推前啲都叫合理,點解會係麥佳亞前啲既。麥佳亞既前,唔係中鋒喎。中鋒都可以話合理,可以高空轟炸,佢要麥佳亞打防中位置,姐係咩意思?冇花冇假㗎,由馬迪入替之後,麥佳亞就已經喺前面。大家睇下普巴博十二碼嗰下,麥佳亞係企喺峨嵋月既位置。而麥湯文尼呢?喺最後既位置...好彩最後博到十二碼,又能夠扳平,否則大家將會見到麥佳亞打防中。

般奴入波送比有咗BB既老婆

雖然最後博到個十二碼,執番一分,但係小編真係滿腦問號,點解呢個時候唔係換馬達甚至連加特呢?熱刺已經鐵桶陣,普巴入咗嚟之後,令到般奴生曬,令榮斯同施素高要顧兩個人,如果馬達或連加特落嚟,講緊係兩個對三個喎。難道要推前麥佳亞,打高空轟炸?陣中根本就冇一個頂得之人,真係寧願要咁打都唔選擇搵多個可以喺防守球員背後走嚟走去既人?呢一點真係令小編摸不著頭腦。
總結,整場波摩連奴完完全全係戰術上擊敗蘇斯克查,只係蘇斯克查夠運,先可以執番一分。而呢場比賽都證明,摩連奴真係好熟悉曼聯,知道冇咗般奴,整隊曼聯即刻面目全非。亦都令其他球隊更清楚點樣去解決曼聯。亦都係因為呢場波,證明蘇斯克查教咗曼聯足足一季,老問題換人速度仍然慢得好犀利。以前都可以有藉口話得三個人換,要換得謹慎啲,唔可以輕舉妄動。但今場波,真係再冇任何藉口。大家諗下,如果曼聯仲係摩連奴教緊,佢會唔會下半場就即刻換人呀拿?最後想同一部分曼聯球迷講,唔好成日話邊個打得差,不如話下點解佢會打成咁,好似占士咁,本來就只可以打反擊,你叫佢唔打反擊緊係差啦。又好似馬斯亞咁,人地都唔係打柱躉式中鋒,你係要佢現身出嚟分波,咁人地緊係差啦。

另外,普巴雖然係門西,大家都知。但喺呢一刻,曼聯憑甚麼話賣佢呢?論質素、論視野、論傳球、論威脅力,佢始終係高一班。除非搵到一個頂級既中場啦,否則曼聯球迷都係接受現實啦。



以下係低普巴以及般奴對熱刺賽事精華,片尾嗰一球傳球,整場有冇人比到?普巴出嚟既作用除咗係片入面嗰啲之外,最重要係解決解凍般奴。你話曼聯唔需要普巴?買咗新人先啦。
文章喺完場之後已經打完,但因為見到太多曼聯賽後感文章,所以第二日先出文。慢咗少少,唔好意思。

如果喜歡我們的文章,請即分享到︰

標籤: 曼聯  蘇斯克查  摩連奴  熱刺  

留言

會員
我要評論
請按此登錄後留言。未成為會員? 立即註冊
  • 曼聯No.99
    曼聯No.99 於 21/06/2020 評論 NO. 1

    睇到你話應該出dalot就唔洗再睇 大戰出dalot想後防放題?Rashford咁無態你一句都無講 反而無限放大其他人

  • 曼聯No.99
    曼聯No.99 於 21/06/2020 評論 NO. 2

    好明顯Ole係想用返3個月之前個陣係為左穩定性

  • 10年球迷
    10年球迷 於 21/06/2020 評論 NO. 3

    首先,論冇態今場除咗華舒福之外,好多球員都冇態。
    我冇諗住喺文章入面逐一講
    我呢篇文章係想針對個戰術、排陣、打法等等
    針對既係教練既安排大於球員既表現

    第二,當年馬些路都係守大於攻,係咪因為咁就以後唔出佢呢?
    每一個球員都有強有弱㗎啦,整場波熱刺都冇乜喺右閘嗰邊攻。
    老實講係咪好適合達洛治踢先?
    就算唔喺後備名單換走威廉斯換走連加特又得唔得呀?
    放達洛治得唔得呢?
    我只係見曼聯喺嗰段時間咁重用兩邊出波 然而達洛治唔喺度覺得有問題姐
    個人認為如果蘇斯克查係諗得周到,達洛治係要出嗰囉
    你咁講如果場波出鍾斯係咪連場波都唔洗睇?

  • 10年球迷
    10年球迷 於 21/06/2020 評論 NO. 4

    為咗穩定性 般奴都唔應該出添 或者出少一個前場都得啦
    出埋馬迪夠曬穩定啦
    或者打三中堅仲穩定啦,有埋拜利。

  • 曼聯No.99
    曼聯No.99 於 21/06/2020 評論 NO. 5

    你用Evra去比較都好啲 但係你用馬些路...馬些路攻擊性係大到做翼都無人質疑

  • 曼聯No.99
    曼聯No.99 於 21/06/2020 評論 NO. 6

    你用Evra去比較都好啲 但係你用馬些路...馬些路攻擊性係大到做翼都無人質疑

  • 曼聯No.99
    曼聯No.99 於 21/06/2020 評論 NO. 7

    大佬 你估打機咩 Son係數一數二咁大威脅既對手 有個防守強既唔用用攻擊性好小小不過唔穩定既 主教練有咁易咩

  • 10年球迷
    10年球迷 於 21/06/2020 評論 NO. 8

    如果要穩定性 場場都要㗎啦。 咁不如索性賣左達洛治。需要佢嗰陣都唔岀 原因就係要穩定性 咁佢呢世都唔洗踢都似

  • 10年球迷
    10年球迷 於 21/06/2020 評論 NO. 9

    所以英格蘭揀阿奴打右閘就係錯啦 講防守阿奴差雲比沙卡幾班啦 我冇話做教練易 只係佢做啱就讚做錯就要彈 好正常 如果用你最尾嗰句說話 咁做英超球員都唔易 唔好彈佢地呀笨

  • 曼聯No.99
    曼聯No.99 於 22/06/2020 評論 NO. 10

    你可能係啱嘅 如果Dalot同Wan Bisaka 係差唔多級數 唔係既就係揠⋯⋯苗助長

  • 曼聯No.99
    曼聯No.99 於 22/06/2020 評論 NO. 11

    閣下都幾賭仔格 有個用開穩陣唔用 用個只係可能有機會或者會踢得好啲

  • 10年球迷
    10年球迷 於 22/06/2020 評論 NO. 12

    只能夠講大家觀點與角度唔同但唔該唔好三句唔埋就話篇文唔洗睇你可以話我寫得差 啲論點論據有問題但唔該尊重每一位寫文章既人每一個寫文既 花幾多時間 花幾多心機你可以唔欣賞 但唔好用兩三分鐘就將人地兩三個鐘既心血破壞喺呢到寫文賺唔到幾多錢 但好多人仍然每日出兩篇、三篇文章除咗為興趣,都想得到人既欣賞或認同唔啱睇可以走 但請你唔好咁樣講 感謝!

快捷鍵:←
快捷鍵:→