分析曼聯新「雲迪克」在球會的前景如何?

洛遊球地 於 06/06/2020 發表 收藏文章

明明呢個係鍾泰希,但唔知點解佢紥起咗頭髮之後,睇落硬係好似雲迪克。最近英超宣布咗開賽日期同各隊第一隊對手之後,好多球員都開始復操,再唔係分批操練。亦都因為球員復操,好多球員既「新」髮型都喺球壇出現,繼利物浦既文尼、費「綿」奴、車路士既巴克利、簡迪、前曼聯球員楊格之後,仲有鍾泰希呢個新造型。其實佢地個頭變成咁,住喺英國既小編都可以為佢地解釋既。事實上喺英國爆發疫情之後,所有店舖幾乎閂曬,除咗超級市場有開之外,冇一間食肆或者其他店舖有開。喺呢個情況之下,球員搵到髮型舖幫佢地剪頭髮既機會,根本就冇可能,除非好似楊格之前咁請個髮型師去屋企剪。所以你都見到連加特個樣好似又老咗咁。當然,鍾泰希呢個Case又可能唔同啦,始終佢個爆炸頭咁勁,而曼徹斯特早幾日又熱到飛起,紥起佢都合情合理既。




講完一堆廢話之後,即刻入主題,今日小編想淺談一下鍾泰希喺曼聯既未來。

鍾泰希(Tahith Chong)
年齡:20歲 (1999年12月4號)
身高:185CM
國籍:荷蘭
慣用腳:左腳
位置:右翼、左翼

今年三月,鍾泰希同曼聯續咗一份新約,而合約只不過係續咗兩年,去到2022年6月30號就會完約。作為一個二十出頭既年青球員嚟講,兩年約可算係好少。可見曼聯對佢既期望唔肯定之餘,鍾泰希本人都好似唔太想長留曼聯咁。到底鍾泰希未來係點,相信呢兩年會係一個好關鍵既日子。


小編記得當初鍾泰希加盟曼聯,好多球迷都對佢充滿期望以及令人矚目。除咗因為佢既造型特別之外,佢既能力都被受注目。當時既鍾泰希喺飛燕諾青年軍踢到識飛咁,加上步大力雄,又有華人血統,令到球迷對佢超高期望,好想快啲見到佢為一隊上陣。

然後嚟到曼聯青年軍,佢同幾個球員好似大家熟識少少既高美斯、格連活特踢到有聲有色,喺青年軍可以算係半超班。得閒有睇下曼聯青年軍既球迷都知道,佢地三個比對手既壓力真係幾大㗎。但可惜今季上到嚟一隊,踢得起既就只有格連活特一個。而鍾泰希同高美斯就只能夠喺一啲冇咁重要既比賽上陣,甚至上陣既機會只係一啲垃圾時間,好似補時階段或者比賽末段,甚至曼聯都冇乜進攻意識既時間比佢上陣。



今季鍾泰希喺英超既上陣時間,總共3場,錄得共34分鐘,射門只有一次。基本上喺英超完完全全冇發揮機會。咁睇下歐霸賽事,鍾泰希總共上陣5場,227分鐘,沒有入球,兩個助攻。喺227分鐘入面,鍾泰希上陣咗5場,除番開姐係每場比賽踢得半場,45分鐘既時間。雖然數據上冇師弟格連活特咁好,但係都有兩個助攻,絕對唔算差。加上今季喺青年軍出賽6場,有5個入波5個助攻,證明佢能力真係比其他青年軍高一班。

講完數據又講下佢既踢法,鍾泰希無論喺青年軍、季前熱身賽、歐霸,都好肯去做突破同埋推進。加上速度唔差,所以佢時常會大步爆落底出波或者扣大位射門,喺踢法上算係一個比較靈活既翼鋒。對比起同隊占士,鍾泰希仲好似多啲變化。


至於呢位球員有咩缺點呢?最嚴重就係成日都會令球隊失控球權,呢樣亦都係球迷睇到最燥既事。好多時一啲好簡單既傳球或者控球,佢都做得未夠好。另外,佢既decide making亦都做得好差,好多時會上多咗腳或者決定得好慢。不過呢一點,作為一個年青球員,有亦都好正常。好似上一篇文章都講過華舒福喺decide making上面都未夠好,不過只要比啲時間佢地,呢方面要解決都唔算難既。另外喺盤球方面,始終腳法都唔算太好,好多時都會推大力咗或者扭失。

雖然喺缺點上,鍾泰希好似有好多。但鍾泰希始終都係啱啱二十出頭,球迷對鍾泰希既要求,有時又會唔會過份苛刻呢?甚至有啲球迷會話鍾泰希養唔熟,唔會踢得好。呢啲說話又會唔會講得早咗少少呢?其實現時好多球員都唔係廿一二歲就踢得好好,遲熟既球員唔通真係有罪?華迪、簡迪成名都唔係廿一二歲既事啦。

啱啱就公佈咗英超各球隊既比賽日子,踢得密密麻麻就真係意料之內。6月19號開始,曼聯喺12日要踢三場英超比賽以及一場足總盃,仲未計歐霸盃既賽事。嚟講將會係曼聯球員踢得最吃力既時候,一方面希望足總盃有機會攞冠軍,另一方面又要爭取入前四下季踢歐聯。再者,曼聯亦有機會再奪歐霸冠軍,蘇斯克查係咪可以多啲用下鍾泰希比其他球員休息多啲之餘,又可以令鍾泰希進步呢?



之前未續約既鍾泰希多次傳出會去祖雲達斯,但最後佢都選擇留喺曼聯。曼聯又係咪應該比番多少少上陣機會佢呢?今季喺華舒福受傷期間,又未到一月轉會窗既時候,右翼永遠用死占士一個,死都唔肯換人。有幾場明明占士都不在狀態,鍾泰希仍然冇上陣機會,又會唔會有少少刻薄咗鍾泰希呢?明明右翼位置就係鍾泰希最擅長既位置,但偏偏佢就冇上陣機會。對鍾泰希以言,真係有啲失望。球迷可能覺得佢既能力唔夠班踢英超,小編就咁諗,當年馬捷達都未夠班踢英超啦。但費Sir都肯比佢試下,最後為曼聯攞咗6分,奪英超冠軍。我覺得如果實力唔係差到好似碧比咁既,比賽最尾十幾分鐘,係咪又可以搵佢試下博下呢?


講到翼鋒既靈活性,鍾泰希除咗爆落底仲可以用非慣用腳扣大位射門,對比起完全單蹄馬既占士仲優勝少少。只係喺速度上比占士慢啲,經驗以及某啲情況下比占士差少少。但絕對未去到,唔夠班同占士比較既階段,如果鍾泰希喺占士打得差既時候,有多啲機會替補占士,相信佢會更加有心留喺曼聯,進步亦都會快啲多啲。

喺暫停英超期間,曼聯多次傳出高價收購辛祖,如果最後收購真係成功。睇嚟鍾泰希嗰兩年新約都可以提早完約,到底鍾泰希既前景如何呢?除咗講上陣機會多與少之外,最重要都係曼聯會唔會喺今夏收購右翼球員。小編到現時為止,就仍然傾向於收購一個好既中堅或者中鋒、中場,好過收購右翼。

如果喜歡我們的文章,請即分享到︰

標籤: 曼聯  鍾泰希  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→