分析曼聯今夏第一簽 雲達碧克

洛遊球地 於 03/09/2020 發表 收藏文章
望穿秋水,雲達碧克終於嚟到曼聯啦。雖然買到佢返嚟,但有唔少曼聯嘅球迷都覺得買佢係多餘嘅。因為中場已經有好多人選分別係普巴、般奴、馬迪、費特、麥湯文尼、馬達甚至加拿,好多球迷都會覺得佢既加盟,只會令到曼聯中場競爭力越來越大,令到年青一輩冇機會上位。到底雲達碧克對曼聯重唔重要呢?係咪有必要買佢呢?買咗佢又會放喺邊一個位會比較合適呢?邊一個要離開呢個中場呢?相信大家都應該會有呢啲問題,今日就同大家逐一拆解。

雲達碧克/碧達比 (donny van de beek)
年齡:23歲 (1997年4月18號)
身高:184CM
國籍:荷蘭
慣用腳:右腳
位置:攻中、中場中


喺開始文章之前,小編都想講一講之前亦曾提及過少少關於雲達碧克既事,咁點解無端端會講到佢呢?其實就係因為普巴。小編記得喺對上一篇文章講普巴嘅時候,講到普巴對曼聯嘅重要性。而當時要提及雲達碧克既原因就係基於普巴既傷患以及態度,備受質疑。小編當時就話如果球迷真係要普巴走,最起碼要有番一個比較有級數既球員做替代普巴,而雲達碧克就係一個唔錯既選擇。小編記得喺普巴受傷既時候,般奴打得非常之好,令到大家更想普巴離開,唔想佢傷癒復出之後,同般奴爭波踢之餘,又搞亂整個更衣室。然而,普巴復出後同般奴夾得非常好,所以就令到之前話要求普巴離隊嘅球迷以及聲音就漸漸消失。但真係估唔到,喺今夏雲達碧克又真係同曼聯簽到約,而普巴又留隊。雖然曼聯球迷對雲達碧克既加盟有著唔同既意見,有啲會覺得曼聯嘥錢簽中場,本來中場已經好多人,加上右翼以及中堅先係最逼切。但有啲球迷又覺得佢好平、又可以做替補、又可以轉陣,到底佢既來臨對曼聯係利大於弊定弊大於利呢?

從位置方面睇起,雲達碧克喺阿積士主要都係出任攻中既位置,甚少打中場中。雲達碧克係一位經常後上或者經常殺入禁區既球員,呢個踢法其實係非常合適曼聯。因為曼聯經常冇球員打呢一個打法,雖然般奴加盟之後,走入禁區既次數、人數,明顯地多咗。但要般奴走番出嚟現身攞波,又要般奴走入禁區做走位入攝以及起腳射門,根本冇可能。所以雲達碧克既加盟就正正可以解決到曼聯既問題。但有一個大問題,就係曼聯同雲達碧克之間既取決。雖然啱啱都講過,雲達碧克係會走入去禁區,理論上應該會多咗球員喺禁區。但曼聯今季既打法,都係以兩翼拉邊為主。變相入禁區既球員都係只得中鋒同攻中。但雲達碧克喺阿積士既時候,好多時都係好多球員一齊喺禁區入面,令到雲達碧克可以經常走到空位,或者只係對住一位防守球員。然而,曼聯打法就係兩翼首先拉邊,然後睇下有冇閘位球員Over Lap,有就可以配合落底或者擺大位起腳。如果冇球員做Over Lap,就會選擇同中鋒或攻中做配合,撞牆彈入去。如果曼聯仍然保持呢種打法,雲達碧克入禁區既機會、次數雖然冇減少,但威脅就一定會減低好多。所以到底要戰術、打法配合雲達碧克,定係雲達碧克配合球隊既戰術、打法呢?就真係要睇蘇斯克查既諗法。


另一點就係曼聯既戰術,極有可能令雲達碧克既殺著被抹殺。雲達碧克最擅長就係殺入禁區然後起腳,佢既Finishing可以算係世界級,能夠處理窩利、回傳等等。但呢啲所有能夠比佢有機會起腳既機會,都係來自球隊不斷Overload對手既禁區,令對手出現漏洞,然後佢現身去補中或者傳送。然而,呢種打法只係阿積士既打法,而曼聯係好少選擇喺中路不斷Overload,因此就算當皮球運咗入禁區,都好快就完咗件事,唔會再喺禁區入面有波漏出嚟或者有太多傳送喺入面做到。加上啱啱講到曼聯入禁區既球員太少,就算翼鋒有能力將皮球送到入禁區,雲達碧克一定會面對唔只一個防守球員。

不過有一點,相信係雲達碧克同曼聯最夾既野,就係佢既護球能力。佢係一位好識點樣背住對手控球甚至轉身或者喺控球時騰出更多空間比自己做其他動作,不論係傳球定係射門。蘇斯克查執教之後,明顯地選擇咗更多既傳控,希望以多啲撞牆打散對方既防線,但明顯地好多球員做撞牆既能力唔高,或者背住對手就做得唔好,但雲達碧克喺呢一方面就做得非常出色,所以假設佢真係飾演攻中既位置,相信都幫到曼聯唔少。

然而,雲達碧克始終屬於攻擊既中場大於防守既中場,佢喺協防既時候做到既事唔多,唔好預佢係破壞型既防中,都唔可以預佢喺馬迪嗰種打法,以塞位、遮線為主。佢只係一位跑動量好高,好肯落腳鏟波既中場球員,因此中場既防守一定要有其他球員配合。例如馬迪、費特或者係麥湯文尼。



但係問題嚟喇,中場到底點樣排先得呢?隊中已經有普巴、般奴打進攻... 曼聯其實只有四個方法去解決。第一,就係唔用雲達碧克。第二,就係普巴、般奴以及雲達碧克,三選二。第三,就係唔打防守,由得佢穿窿。第四就係轉陣式打四個中場。雖然講就話有四個解決方法,但根本連轉陣式都應該唔洗考慮。因為兩翼一定會繼續用,因為蘇斯克查一直都係主張以兩翼作為攻擊重心。另外左右兩閘佢地又唔會放棄,始終雲比沙卡喺防守方面真係好強,叫佢打中堅又冇頭槌。姐係話五後衛、三後衛都唔洗諗。同埋當球員真係實行轉陣式,係需要好多球員既配合、練習以及羅致新球員先得。今季曼聯季前熱身一定唔會足,羅致球員又好似冇乜聲氣,好多球員又冇打三後衛、五後衛既經驗。話轉陣就轉陣,只會令到曼聯喺新球季面對一個自己比自己既新阻力以及挑戰。

咁到底應該踢邊個走呢?般奴?普巴?好多球迷都應該唔洗諗,一定揀後者。因為普巴經常表現飄忽,態度又差。小編都認同呢一點,但係雲達碧克真係代替到普巴?曼聯經常缺乏球員大腳轉邊,普巴就正正要能力咁做,但雲達碧克喺場上大腳轉向又好似冇乜。講到護球能力,又好似唔夠普巴好,頭槌就更加差過普巴好多。唯一幾點好過普巴既就只有跑動量、經常入禁區既習慣。如果要用雲達碧克替轉普巴,喺能力上明顯地一定減弱,加上雲達碧克多數打攻中,同普巴又唔同位置。換走普巴唯一好既,可能就只有心態方面。如果換般奴又點呢?雲達碧克打法上同般奴相似,但冇遠射又處理唔到死球。做指揮嗰方面又唔會高得過般奴喎...



當然,好多球迷都會話,曼聯嚟緊會打三條戰線,佢都可以做普巴、般奴既替補。呢個諗法的確冇錯,但大家真係咁期望蘇斯克查會有多啲既輪換?小編就真係對佢有所保留。好多球迷話今夏買番幾個好啲既替補,就唔會好似今季咁,打極都係同一隊。但現時曼聯出手買到既球員有幾多個,大家心知肚明。如果係咁,仲期望來季蘇斯克查會輪換?班波基本上就冇乜變,人腳都係咁多,冇話邊個走咗,邊個嚟到。如果係咁,大家仲點期望佢會輪換呢?定係只係輪換一個位置,就係中場呢?

講到呢到,雲達碧克既加盟,又好似多餘喎。小編又咁睇,雲達碧克都只係23歲,而普巴已經係27歲,以普巴既心態,話唔定過多幾年就大跌Watt,或者離隊。依加引進咗個後生仔,除咗能夠比壓力普巴,要佢打得更好之餘,仲留番條後路比自己,而雲達碧克又唔係特別貴既時候,又何樂而不為呢?雖然喺質素上,佢明顯同普巴比下去。但長遠發展嚟講,絕對係一個幾好既收購。



雖然佢嚟緊喺曼聯既日子、位置,好唔穩定。都唔知佢會係球隊既重心定係替補球員,又唔知佢會打咩法,喺戰術上又好似唔係好夾咁。但係無疑地用咁既價錢,買到一個咁有Promising既球員,絕對係一個唔錯既收購。將來既日子,始終仲有好大變數,蘇斯克查、普巴喺曼聯既日子以及位置都唔係絕對穩定既時候,佢既未來好多野都講唔埋。所以真係唔好咁早下定斷,話雲達碧克係一個好或者壞既收購。

最後都係希望曼聯下一個增添既位置,會係中堅,唔好再爭中場,唔好簽埋艾簡達拿過嚟,雖然佢真係幾勁,小編一直都好鐘意佢。但係曼聯根本唔再需要中場,再簽只會令到木仔同埋蘇帥間屋著火。

如果喜歡我們的文章,請即分享到︰

標籤: 曼聯  雲達碧克  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→