今晚既奧脫福，好安靜。住喺奧脫福附近既小編都想同情一下主場既球迷，呢幾日天氣都幾凍下，加上超大霧，感覺真係好辛苦，仲要望住愛隊喺主場被輕取3分，可以話係雪上加霜。今次既內容可能會令各大讀者反感、不同意或者有更大回響，希望大家體諒同埋理性討論。
主場敗喺般尼手上，可以話係小編既意料之中。可能大家會覺得小編馬後砲，但仔細諗諗。大家認識既般尼，就係死球、頭槌好勁既，對住一隊今季幾乎每場都輸死球既球隊，可以話食生菜咁，咁易食。呢場比賽完完全全話比大家知，曼聯既大問題一定在於領隊蘇斯克查身上。
首先，進攻球員人數不足，已經唔會係球員既問題，而係戰術或者打法上既問題。呢一樣野，唔係球員解決到既，而係教練去解決，呢一點大家都應該好明白。點解今場波入唔到波，就係因為每次進攻都唔夠人手。
由曼聯既右路講起，今場仍然係冇右邊既中場或者翼鋒喺到，原因都講左好多次，相信大家都清楚。因為馬達本來係右邊既球員，佢經常走入中間，所以變常冇咗一個球員喺右邊。小編解釋完唔係想話馬達錯，相反係想講咁樣安排既人錯，我講緊既係蘇斯克查。雲比沙卡本身進攻已經唔係好，盤球、做突破都唔叻，你要佢一個人對付兩個防守球員，你想雲比沙卡點去？如果你覺得右邊其實唔重要既，咁我又好好奇，點解今場波既進攻除咗遠射就係落底出波？
其次，除咗右路有一貫既問題之外，中路同樣。點解每一次入禁區既球員都係得一至兩個？上半場以及下半場初段至中段，一直冇解決過呢個問題。你打4231唔係問題，問題在於你打4231真係得一個前鋒入禁區。一個前鋒對兩個中堅，點都講唔去啦。點解3個中場一直都係喺禁區外，冇球員入禁區，落幾多次底出幾多球波都冇用啦，如果唔係到下半場尾段，曼聯想博入波，費特、麥佳亞都唔會走入禁區。下半場用咗格連活特取代皮里拉，以為有啲好轉。點知你都係用格連活特出嚟分波同埋做遠射。有遠射都係一件好事，但係我留意咗好多次，根本冇人諗住衝入禁區汁雞。雖然呢場波，對方門將冇任何失誤，但連入禁區既習慣都冇，小編真係唔知點入得多波。
曾經見過球迷話，蘇斯克查改善咗好多球員既傳波，one touch，撞牆等等。呢場乜都做唔到，改善咗喺邊呢？就當小編睇唔到，就算真係改善咗，領隊有冇用戰術去配合，令到球員做到呢啲之餘，有威脅，可以有進攻做到出嚟呢？今場波，除咗一球馬達走入禁區，刻意漏比馬斯亞，製造咗一次半單刀機會之後，根本一啲作用都冇。呢個到底係球員既問題定係教練既問題呢？
講完進攻，再講一下防守。每次失死球角波都係同一個劇本。人多手腳亂，永遠人就最多，做到既野就最少。死角既第一點、第二點從來都唔係曼聯球員贏既。今場呢個失誤起碼重複咗3至4次。如果係球員問題，咁點解上一至兩季既曼聯，防守又冇問題呢？
對上一篇文章都係講蘇斯克查，小編睇番留言，有球迷話曼聯球員本身能力已經差，根本冇機會比蘇斯克查教得好。摩連奴時代唔係呢一班球員？可能你會話摩連奴真係高幾班，冇得同蘇斯克查比較。咁我用今季既錫菲聯球員去比較今季既曼聯球員啦。論實力唔會好得過曼聯喇掛，點解又打得咁好先？雖然錫菲聯依加分數少曼聯一分，但錫菲聯每一場輸波，都唔會好似曼聯咁，輸得咁肉酸，甚至好似今場咁80分鐘已經有好多球迷走人。
講到換人分面，對上一篇文章已經針對過蘇斯克查喺換人既速度超慢，今場都係一樣咁慢。55分鐘，輸到2:0，68分鐘先換梳爾、連加特入嚟。輸到兩球，到底仲要考慮啲乜呢？失咗波成十幾分鐘先識得換人？換走班頓威廉斯小編以為收起個左閘，打進攻啦，點知換番一個左閘出嚟。重點又係，威廉斯同上場一樣，冇拎黃牌，冇受傷，冇打得唔好。後備有高美斯、有達洛治。你要打10號位既球員有，打翼既都有，你唔換，走去換隻閘？右邊長期打少一個，唔可以換佢地兩個出嚟打右翼？輸到2:0，仍然要打兩個防中，到底係咩原因？
處理轉會既失敗，唔單止係蘇斯克查既錯，好多球迷認為活華特都有錯，小編都好認同。但諗番轉頭，邊個叫你放走盧卡古，邊個叫你借走山齊士、史摩寧。依加曼聯最缺既係一個搶點既前鋒，盧卡古咪就係最合適囉。依加曼聯打咁多落底出波，盧卡古咪最頂得嗰個囉。
球迷成日話要賣走一啲搞事既球員，盧卡古走咗有冇一個球員可以代替到佢？普巴如果走埋，中場創造力就係得依加咁多，大家又覺得係咪足夠？如果係泥菩薩過江自身難保既時候，到底又憑啲咩去賣走呢班有實力既球員？
蘇斯克查口口聲聲話要轉打法，利用基本既短傳，猜散對方防線。有冇教過曼聯球員點樣用跑動配合？咁多場比賽入面，只係得馬達不斷走去防守球員身後同埋現位，其他球員就企喺到，到底領隊又有冇責任呢？你話曼聯球前場球員唔走？每次打反擊，個個同你衝同你哨，姐係唔係唔肯走而係唔識走啦。後防同中場斷開咗咁多場，有冇解決過呢？點解到現時為止，皮里拉現咗位等於冇現一樣，搞到後防要不斷拖拖拖，最後亂踢甚至失埋呢？如果後防、中場有選擇，迪基亞又會唔會每場總有幾次龍門球會得咁急、咁差呢？前中後既連接有冇邊一場係做得好呢？定係口講話用短傳猜控，最後都係用緊落底長傳？
如果領隊做唔到野既，其實買幾多球員都冇用。一個活生生既例子，韋斯咸。班波實力唔差，幾乎每季都買好多新人，但點解成績仍然係咁差。其實現實同打機真係好唔一樣，唔係話打得唔好就要買球員換球員，點樣去培養一位球員都係一個學問，亦都係領隊既其中一個工作。曼城既史端寧同利物浦既史端寧就話比你知，如果一個領隊真係有能力既，可以改變到個球員幾多。曼聯好多球員既潛力係好高，華舒福、馬斯亞、格連活特、高美斯等等。但進唔進步到，定係永遠只靠潛力既除咗睇球員自身之餘，領隊都要負上好大責任。小編認為今時今日最大既問題，係冇一個Form比到班球員，如果持續唔改善，儘管比10年時間邊一位領隊去教，都唔會有進步。小編分享呢一篇文章唔係去支持解雇蘇斯克查或者將所有問題歸於領隊身上，只係想曼聯球員認清一個事實，到今時今日最大問題既仍然係蘇斯克查。
如果今次呢篇文章真係令好多球迷反感或者覺得小編係錯既，需要刪除既，小編願意刪除文章。
請按此登錄後留言。未成為會員? 立即註冊