今夏將決定丹尼爾占士喺曼聯既未來

洛遊球地 於 04/05/2020 發表 收藏文章

丹尼爾占士(Daniel James)
年齡:22歲(1997年11月10號)
身高:171CM
國籍:威爾斯
慣用腳:右腳
位置:左翼、右翼

今季加盟曼聯既丹尼爾占士,季初表現非常好,好可惜好表現未能夠保持,喺季中表現開始有回落既狀況。但因為今季曼聯傷兵問題一直出現,季初先有馬斯亞既傷患,當馬斯亞傷癒復出,又到華舒福喺季中受傷,因此丹尼爾占士一直能夠坐擁正選位置一席。今季曼聯踢咗29場波,占士正選上陣咗25場,以及有兩次後備上陣,睇落對於嚟講,好似係一名好重要既球員。但數據以及表現反映咗比大家睇,其實佢都唔係踢得特別好,所以能夠有正選位置,只係因為隊友輪住有傷患困擾。先同大家講下啲數據,今季占士喺英超錄得3個入波,以及6個助攻。當中3個入波裡面,全部都喺8月季初入,9月之後喺英超就再冇入波。而助攻次數亦要數到季中,10月尾先有佢第一個英超助攻,可見占士既表現都比較飄忽。


雖然表現中平平庸庸,但占士確實係幾實用,直頭可以話佢係前場既萬能Key。喺呢到先同大家講一講占士喺曼聯今季既定位先。季初馬斯亞同華舒福都未傷既時候,占士會打右翼,左翼就交比華舒福,而馬斯亞就打中鋒既位置。但季初踢完幾場之後,馬斯亞就因傷缺陣。因此,華舒福就改打中鋒,左翼就比番占士打。當馬斯亞復出後,馬斯亞又打番中鋒,左翼就比番華舒福,占士又要打番右翼。直至季中,華舒福受傷之後,占士又返回佢最熟悉既左翼位置。另外,當曼聯對強隊既時候,蘇斯克查都多次安排過占士踢半個中鋒。當防守時占士既工作會係球隊既第一度防線,喺中路做遮線既工作,好似一個中鋒位置咁。當進攻既時候就會走去邊,同對手鬥哨,好似又打番翼鋒咁。因此,占士可以話係曼聯前場既一位萬能Key。

雖然占士今季好似作用好大,可以話喺曼聯飾演一個好重要既角色。但事實上經歷完今個夏天之後,可能占士喺曼聯既價值就愈嚟愈少。今季全球停賽之後,曼聯可算係最受注目既一隊,因為呢支球隊喺轉會傳聞入面可以話係最多以及最多討論空間。首先有傳多蒙特既辛祖加盟,接住仲有傳有機會高價買入熱刺前鋒哈利簡尼。呢兩單新聞可以話係間接地影響到占士未來既日子。



先講一講冇咁大影響到占士既一位,哈利簡尼。鑑於曼聯現時仍未有一個十分可靠既前鋒,儘管馬斯亞、華舒福都可以踢中鋒呢個位置,但奈何佢地二人打得最好既始終都係左翼位置。而今時今日曼聯仲未同恩哈路傾到啲乜新合約。假設簡尼真係加盟曼聯,馬斯亞同華舒福就總會有一個打左翼,一個打右翼。咁講占士就會因此而淪為後備球員。不過,仲有另一個可能性,就係占士都仲有機會打正選右翼,因為喺馬斯亞同華舒福兩位入面,打右翼既表現都唔係十分出眾,表現可以話係平平無奇。如果係咁,占士確實仍有機會有兩位競爭。
但假設轉會到曼聯既係辛祖,咁占士既位置就明顯地比辛祖搶走。因為占士同馬斯亞、華舒福一樣,最佳位置都係左翼。加上占士打右翼既時候,表現都只係中規中矩,今季好多時表現都未如理想。無論係助攻次數抑或入波數字都未算合格。另外,佢同雲比沙卡產生既化學作用又唔大。咁講辛祖嚟到一定係穩坐右翼位置。而占士同馬斯亞甚至華舒福比較,實力同潛能上都係比較遜色既一位。因此左翼既位置點數佢都係喺兩位球員之後。



因此今夏假設兩位傳得最勁既球員有一位加盟,占士既正選位置都可以話係岌岌可危。占士喺現時嚟講最慘既一樣野就係,佢未有一個屬於佢既技能。小編認為現今翼鋒呢個位置,可以分為兩大類。第一類就係盤球能力好高,能夠靈活多變。呢一種球員就係防守球員最怕既一種。因為你根本唔能夠去嘗試估佢下一步想做乜。當你嘗試去估,嘗試出腳做攔截既時候,佢已經過咗你。就好似夏薩特呢種球員咁。不過要成為呢種翼鋒球員,首先要有上乘既盤球能力以及護球能力,冇番一定既底子根本好難去成為呢種球員。而呢一種翼鋒就係將一招技巧,練到爐火純青既境界。雖然佢係得一招,但都已經十分足夠去應付對手。情況就好似當年洛賓咁,你明知道佢一定會用左腳推大位遠柱死角,最後都只能夠望住個波飛入網。或者係早期少少既曼聯球員華蘭西亞咁。擺到明係用右腳抽個波出嚟,係得一招不過總算出到或者博到角球,但占士又未算係呢種球員。

小編認為用到楊右華就最能夠去講到占士既問題。當年楊格初來曼聯,佢都係得一招級大位出波或者起腳,呢招又喺維拉去到曼聯初期,都好能夠令對手頭痕。占士其實同楊格既情況都有少少相似,因為佢都好喜歡咁既踢法,今季亦都有咁樣既入球。但呢招對於占士嚟講,又未做到非常熟能生巧。因為佢既盤球以及護球能力都唔高,好多時都可以控住個波,但就唔能夠好似楊格咁靈活地將對手重心失,隨即出波或射門。咁如果占士嘗試去學華蘭西亞又得唔得呢?其實理論上係可以,不過現今既足球好似同之前有少少唔同咗。現今好多時都係一個做遮一個做包位。喺呢個情況下根本用呢一招就好難令對手有太大壓力。因此,去到後期華蘭西亞都開始少咗呢招,當然仲有一個重點就係佢變咗打閘啦。



其實占士最大問題就係周身刀冇張利,佢既速度快以及重心低、靈活高,作為翼鋒嚟講係一個好好既優勢,可惜就冇一啲技巧去配合佢既優勝之處。小編上一篇文章都講過,其實達洛治喺某程度上嚟講,可能仲好過占士。因為達洛治都有一招,插花擺脫對手隨即出一啲急勁既傳中球。而占士喺盤球擺脫對手呢方面,已經係比下去。加上佢既傳中球又未係急勁準繩,確實係令占士既競爭力輸好多分。

李小龍曾經講過:「我不害怕曾經練過一萬種踢法的人,但我害怕一種踢法練過一萬次的人。」,其實喺足球場上,單調得一招確實喺影響力方面係冇咁大。好多防守球員都會好喜歡防守呢啲進攻球員,因為好容易就估到佢下一步點做而搵到解決方法。但由洛賓呢種球員就完全地解釋咗比大家知,李小龍呢句明言既真諦。

老實講,占士喺曼聯既日子,前路不是太明朗。假設占士進步再唔加快啲,即使今個夏天曼聯冇買球員去補強,喺好快既日子曼聯都會搵其他球員替補佢右翼一席位。因此曼聯將來既收購會係點,將會係間接決定咗占士喺曼聯未來既日子係點。占士喺曼聯既日子係點,確實令球迷擔心。


多口講句,最近小編睇咗幾篇關於曼聯失敗收購,假設今夏曼聯收購辛祖或其他右翼球員,係咪姐係間接地否定咗占士呢?而曼聯初衷係希望占士能夠解決球隊右翼問題,若收購其他右翼球員,又係咪間接咁話比大家知,占士都係其中一個失敗既收購呢?小編認為收購一個年紀大啲既帶住占士,令佢可以進步同時又代表曼聯未來日子都靠佢,都尚算合理。但收購一個仲比佢細既,市值、潛能仲比佢高既球員,係咪姐係話高價買占士番嚟既原意只係放後備呢?

如果喜歡我們的文章,請即分享到︰

標籤: 曼聯  丹尼爾占士  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→