一場波見盡長用勝利十一人種的果

洛遊球地 於 06/08/2020 發表 收藏文章

今季英超季尾,見到Big6入面其中一支最少既輪換既球隊——曼聯,愈踢愈差,愈踢愈沉,除咗係因為球員既狀態明顯有回落問題之外,另一個最大問題一定係因為球員太攰,大部份球員都有疲態既出現。因此曼聯喺最後四場英超比賽,可以話用「捱」呢個字去完成。最終僥倖地能夠成功以第三,攞到歐聯資格。雖然曼聯成功攞到歐聯席位,但蘇斯克查永遠用死勝利十一人,令曼聯球迷處於兩極化,一邊認為蘇斯克查既決定係正確,始終後備球員沒有一個值得信任,一邊認為就算其他球員點差都好,都要採用輪換,以舒緩球員疲倦問題,以及令球員重拾狀態。

老實講,小編就比較偏向後者,始終球員都係人,攰自然會受傷,自然會踢得差。踢得差都唔緊要,受傷真係好嚴重既問題,由其隊中有幾位正選球員經常受傷,一傷仲要抖好耐。雖然最後咁樣踢,曼聯都只係傷咗一個梳爾,但呢個做法係咪代表正確呢,小編就對此有保留。而亦都隨著時間過去,呢件事大家都開始忘記,直至昨晚一場歐霸比賽,呢個話題又再一次重現。原因係因為曼聯用咗一班副選,然而踢落去唔單止冇優勢,相反對手有多番具威脅既攻勢。小編喺開始入正題之前,都淺談曼聯今場比賽先。


上半場曼聯一直冇太多攻勢,就算有攻勢明顯見到一啲都唔入肉。另外,明顯喺戰術執行上、默契上、以及能力上,都同正選差幾班波。攻不銳守不穩,正正可以形容上半場既曼聯。唔單止冇乜有威脅攻勢,亦喺角球上差啲失咗球波,只係奧脫福既門柱救咗曼聯,上半場先力保不失。

下半場對手改變踢法,將球員壓前令到曼聯有更多既空位。加上曼聯下半場明顯地加快節奏,令曼聯下半場有更多攻勢。雖然見到曼聯明顯比上半場落力,但對手亦憑住一個世界波首先領先。及後,曼聯老臣子馬達一球妙傳,造就連加特連續兩場有波入。之後曼聯開始換番幾位正選球員,鞏固番整隊曼聯。整隊波就更加似番啲樣,雖然係咁,但對手仍有好多有威脅既攻勢帶比曼聯,只係羅美路一一救走。比賽時間去到87分鐘,馬達同馬斯亞一個靚撞牆,將對手防線撕破,反超前2:1。補時階段,對手亦有一個非常有威脅既攻勢,可惜射得比較正中,羅美路憑本能反應救出,最後曼聯以兩球波反勝對手。下場將會喺德國面對哥本哈根。

整個上半場,可見曼聯完全冇戰術可言。不論係今季,小編曾在上一篇文章裡讚賞過既前場緊迫定係後場組織上去,都完全執行唔到。本來正選既一隊,今季喺前場緊迫都做得好好,非常純熟,但今日明顯見到生疏好多,另外迫搶既速度明顯比正選一班球員慢。令到對手喺後場組織時,壓力都冇太大,好輕易就能夠將皮球運上去。中場方面既配合以及支援都係非常差。兩位防中麥湯文尼以及費特經常疊位或者有太近既問題,另外又好少現身出嚟幫後場球員。令到曼聯當想喺後場組織,組織唔夠幾腳都係大腳踢上去。而中前場球員經常有人前波後、不斷傳失以及走位錯誤既問題。配合方面都係唔足夠,經常見到恩哈路或者馬達係冇人幫手。加上幾位球員連一啲普通既傳球,冇任何壓力之下都傳到非常差,令馬達都忍唔住鬧咗隊友幾句。由馬達加盟至今,真係好少見到馬達會咁嬲、咁勞氣。



下半場未換人之前,雖然明顯見到多咗好多入肉既攻勢,但好多都係因為對手壓前,令佢地後場空咗好多,先能夠打番好少少。另外,見到曼聯下半場明顯喺支援方面多咗,由其馬達、恩哈路以及連加特比較搶眼。相反季初好多球迷大讚既占士,今場就比較沉,更有球迷表示,要佢去番英冠踢、難成大器等等,所以話作為曼聯球員,真係要每場打醒十二分精神,因為只要有幾場你踢得差,浪費機會,就會比球迷送入雪櫃。

另外曼聯下半場亦都有安排青年軍球員文治以及鍾泰希上陣,兩位球員表現亦非常好。其中鍾泰希更係多次喺左邊做到好多突破,以及Key Pass,最令人記得應該係傳比皮里拉嗰球,令皮里拉有一個算係黃金既機會,可惜皮里拉就冇珍惜。下面有片(1:20開始)。而文治喺比賽尾段首次替曼聯一隊上陣,表現亦都非常穩陣,希望佢可以多啲發揮既機會,始終同市宿敵已經簽咗尼敦艾基,由培訓咗加西亞出嚟,相反起曼聯喺中堅方面好似就比較遜色一啲。


講完場波之後小編就對蘇斯克查又有啲微言。小編只係用上半場既表現嚟講,因為下半場有其他正選球員入替。由今季做得最好既戰術前場緊迫開始講起,整季曼聯都係採用前場緊迫呢個戰術,除咗對Big6球隊,打防守反擊之外。上一篇文章都詳細地講過曼聯今季打呢個戰術既好處以及佢地既踢法。踢咗整整一季,整整一季打得咁好,咁點解當副選一上陣,整個戰術竟然完全執行唔到既呢?另一個戰術就係後場組織,將皮球運上前場。又係整季都係咁打,點解連球員企位都有問題既呢?已經唔係要求球員成功地將皮球運上去,但連企位都錯,支援都冇,到底係咩事?

呢兩個踢法整季都一直沿用緊,理論上都好應該係識點樣踢,點解會踢到走曬樣呢?見到賽後有球迷話副選就係差一兩班波,咁到底能力差係咪代表連企位都唔識呢?如果整季,整隊球隊不斷練呢兩個戰術,點樣去走位,點樣去做支援,佢地真係會完全唔識企,完全唔識支援?亦都有球迷話副選心態有問題,咁唔通心態唔好就會企錯位。今場波踢得差既,唔係佢地腳下功夫問題,最大問題係配合、走位、企位呢啲問題。

小編愈睇就愈懷疑到底蘇斯克查今季練戰術既時候,到底只係練咗嗰十一個球員點踢,定係連練都冇練過個戰術。今場波明顯同以往冇般奴既日子、以及季初既表現一模一樣,完全冇改善過。感覺就好似蘇斯克查買咗個識打呢個打法既球員番嚟,然後就靠佢帶住隊波,而唔係用戰術帶領住隊波。



講完呢兩個戰術,之後就係一啲傳控以及默契問題。今場明顯地見到隊波啲默契差到爆,個個踢自己嗰家波,占士自己有一家波、防中有一家波、馬達、連加特、恩哈路一家波,完全冇配合冇任何化學作用出到嚟。呢一點球員固然要負責任,但領隊見到呢一點,完全冇叫過球員改善,到底係啲乜野操作。我死都唔相信領隊講完,球員仍然死都要咁做,就算球員堅持咁做,理論上嗰位球員都應該一早比人換走。今場明顯見到占士自己踢自己波,但點解仍然可以比佢踢到84分鐘呢?係覺得冇問題定係點呢?真係諗唔透。另外整隊波默契方面真係嚇親人,到底勝利十一人以外,有冇一齊練過波,有冇一齊同場踢過波?

呢一點除咗係集訓出現問題之外,亦都明顯係長用十一人得出嚟既果。小編好唔同意有啲球迷,經常將球員踩到一棟都冇,好似當日鍾泰希咁,大家話佢只係識衝,乜都做唔到。但今場比賽其實又唔係差得好緊要。當然,對手弱亦都係其中一個原因,但係有時候領先幾球都唔嘗試比佢地出,連一啲發揮空間都唔比球員既時候,再多料既球員都唔會有成功既一日啦。再講,領隊完全唔比機會佢地落場,點樣令佢地有進步呢?



曼城、利物浦、車路士甚至阿仙奴等等既球隊,喺季尾都唔係死嗰十一個,點解人地仍然踢到佢地既戰術,而今時今日既曼聯,竟然就只有十一個球員先識執行呢套戰術,到底係球員問題定係領隊既題呢?小編強調多次,今日唔係要副選既球員成功地將套戰術執行得淋漓盡致,但係咪連一啲基本既走位、支援都執行唔到呢?最後想同某啲球迷講,如果大家真係咁信唔過呢班副選球員,咁大家真係唔好對來季衝任何一個冠軍有信心。亦都唔好對來季有更多既期望,除非來季曼聯將整隊波換曬佢。


長用勝利十一人,最後就搞到其他球員連執行戰術都執行唔到。默契、能力、球感等等都明顯一落千丈,到底呢一個舉動係咪仲應該支持呢?小編唔清楚,現時小編只係希望曼聯喺來季,係戰術帶領球隊得到成功,而非部份球員既個人能力。希望到時見到既係每一位球員都識走位、都會跑動,而唔係當出副選既時候,好似呢場波咁。

我知道出完呢篇文章,一定引起好多球迷既不滿,喺度想帶番個頭盔,我只不過係一個球迷,唔係球評家更加唔係一啲專業人士。我所分享既只係我既個人感想,所以一啲都唔中立。希望大家見諒。

另外最近都見到好多同我文章相似既創作以及諗法向球迷分享,小編亦都明白可能真係會有好多意見相同,但如果真係想用小編文章既論點的話,希望都打番個Credit by「洛遊球地」,感謝!

如果喜歡我們的文章,請即分享到︰

標籤: 曼聯  蘇斯克查  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→