一場波睇到普巴對曼聯既重要性

洛遊球地 於 22/06/2020 發表 收藏文章

文章開始之前,請大家冷靜,因為我知道呢個Topic一定令好多人反感。小編都預咗喺留言下面見到好多負面說話。例如:馬後炮、曼迷有事鍾無艷 無事夏迎春、一場波就引番曬啲普巴迷出嚟等等。大家留言之前,不如睇下小編點解咁講先啦。先同大家講一講,呢篇文章有好多野都係基於上一場波,熱刺對曼聯去寫既。所以大家可以先睇番小編上一篇文章既戰術分析。「大戰後完美展現出蘇斯克查完敗喺摩帥手上
https://football.fanpiece.com/happywalk/大戰後完美展現出蘇斯克查完敗喺摩帥手上-c1378694.html#comment
事不宜遲,即刻由上一篇文章既第一個論點講起。

普巴般奴間接地互相解放了大家

小編喺上篇文章講到上一場賽事,蘇斯克查出錯陣去踢呢場比賽。換人、換戰術既速度又慢,令般奴得最尾30分鐘時間踢到波。點解會咁,上一篇文都講過。因為普巴既出現,間接半解放咗般奴。喺上半場20分鐘打後,摩連奴見勢色唔對,即刻改變咗打法。落Order叫榮斯半Man Mark般奴,每次當佢攞到波,一定要第一時間對住佢。呢個做法同之前摩連奴叫靴里拉Mark夏薩特唔同。榮斯唔洗死跟般奴,榮斯可以基於球賽發展去做佢要做既事,例如包位、攔截等等。當佢出咗去做其他工作,施素高就要做榮斯既工作,總之就要有人對住般奴。當般奴一攞波,唔洗去搶,只係去做遮掩以及有一個負責喺後面逗住就夠。


點解摩連奴要咁安排,就係知道般奴有咩強弱項。佢好清楚般奴同夏薩特唔同,唔可以攞住個波推入去,以寡敵眾,所以只係需要近距離去遮線就足夠。般奴以一敵二既情況足足維持咗40分鐘,跨越咗上下半場。雖然唔係好強烈既緊貼,唔似靴里拉咁捉住夏薩特,但已經足夠令般奴威力減弱。



直至60分鐘,蘇斯克查先解決呢個問題,解決方法好簡單就係收起費特,換普巴出嚟。令到曼聯好識用波既球員除咗有般奴之餘,仲有普巴。榮斯同施素高喺普巴出嚟之前完全冇壓力,因為曼聯中場用緊般奴、麥湯文尼同費特,後者兩位相對喺用波方面冇太大威脅,所以基本上可以唔理佢地,只要搞掂般奴就夠。加上熱刺後防塞到密密麻麻,你冇番咁上下斤両,根本打唔到入去。但當普巴既出現,榮斯同施素高就唔可以當普巴冇到。因此,榮斯同施素高就要一人對付一個。

摩連奴為咗平衡球隊,唔能夠再塞防守球員落嚟,因此二對二既情況喺比賽60分鐘打後就一直出現。亦都係因為咁,般奴既間接地被解放。喺好快既時間佢即刻交到個Key Pass比馬斯亞,只可惜射門被熱刺中堅戴亞省走。

當普巴同般奴同時只面對一個防守球員,所有面對既事情都變得簡單得多。因為當防守球員過份看管般奴時,普巴就有更多空間發揮,反之亦然。今場普巴睇落去生咁多,除咗心態好咗之外,都因為般奴在場,間接令防守佢既球員少咗,表現自然好咗好多。小編曾經睇過一個留言:「我比夠機會普巴,之前又話買費特可以解放到普巴,但當費特嚟到,普巴一樣冇表現。」,小編表示非常認同。當費特喺場上,普巴面對既問題依舊存在,因為費特做唔到太多既威脅比對手嘛,大家可以當兩個防中唔存在,專注防守普巴就夠,情況同上場熱刺同曼聯一樣,有異曲同工之妙。但當般奴既出現,防守球員唔能夠只集中防守一位中場球員,咪真真正正可以解放普巴囉。

情況就好似當年巴塞咁,你守得沙維又守唔到恩尼斯達。但當巴塞得沙維或者得恩尼斯達只得一個球員喺到,中場變咗有兩個防中,假設係巴斯基斯同基達喺到,中場用波嗰位球員不論係沙維定恩尼斯達,都會變得吃力好多。

隊中好多中場球員仍然未得到蘇斯克查既信任

喺熱曼大戰一役,曼聯一直好需要一個攻中去解決熱刺死守既問題,後備名單有馬達有連加特,但蘇斯克查冇去用。相反竟然選擇用馬迪,然後仲要搵馬迪打後一格,推咗麥佳亞上前打防中。上一篇文亦都講過,麥佳亞喺嗰兩至三分鐘,未獲十二碼之前,係前過麥湯文尼同馬迪。點解寧願揀麥佳亞都唔選擇考慮馬達同連加特呢?唔清楚,但明顯喺當時蘇斯克查好似相信場內嗰10名球員,多過馬達、連加特。假設當時有多一個中場係熱刺後防走嚟走去,做駁腳做走位做拉扯,之後既威脅力一定更大。
當然,亦都有一個原因令蘇斯克查咁樣排陣,就係考慮到熱刺可能會因為冇防中球員而偷雞改打法,調番轉頭打進攻,令曼聯有機會再失多一球。但不論蘇帥係啲咩諗法都好,喺比賽中見到既就係當佢想改變戰術、改變打法既時候,好多時會受到好多限制。擔心防守力大大減低、擔心球員力有不逮等等。



曼聯要真真正正重返「高水平」呢三個字,好多時都要依靠好多有能力既球員。然而,老實講句曼聯中場既能力有幾多,大家都心知肚明。我地睇下其他球隊再對比曼聯既中場就知道問題既存在。用西甲兩支球隊做比喻:好似巴塞咁,佢地有巴斯基斯穩住成個中場以及後防,根本唔洗擔心防守問題。好似皇馬咁,同樣有卡斯美路陣守中場線,掃曬所有波,非常穩健。但講番曼聯,就只有麥湯文尼、費特,無疑地佢地真係好落力,但始終係力有不逮,呢一點真係不得不承認。差幾班波就唯有喺人手上做補救,所以曼聯經常用兩個防中去出戰,目的就係想平衡球隊既攻與守。

驟眼睇,曼聯好似用咗兩個防中就能夠平衡攻與守,但喺呢一場波入面就見到,根本係平衡唔到攻與守。蘇斯克查其實好清楚兩個防中既能力去到邊,佢知道曼聯當防中剩低一個既時候,就會有好多問題出現,所以點都唔會冒險棄用雙防中,喺呢個時候蘇斯克查就側重於守多過攻。若不是普巴博到個十二碼,曼聯根本就攻唔到入去。

除咗西甲兩隊之外,其實現時英超排名比曼聯高既球隊,佢地都唔洗擔心防守既問題。可以放膽去做進攻。利物浦三個中場Box To Box都頂級、曼城防中有根度簡、洛迪高、費南甸奴出其中一個都夠穩陣、李斯特城有尼迪迪、車路士有簡迪。以上每一支球隊,佢地喺防中既位置上面都係好穩陣,所以佢地喺進攻方面就唔洗太多顧慮。但相反曼聯只要出咗般奴同普巴,就冇一個防中可以揹起中路既防守。



所以都解釋到點解蘇斯克查喺60分鐘之後,仍然攻唔入之下,都唔換馬達、連加特。喺76分鐘換人既時候,換走個中堅都唔換走一個防中,因為蘇帥擔心防守既問題,又想平衡進攻。佢會假設埋入咗波既情況,當追番和就可以將麥湯文尼同馬迪打番防中,然後收起一個前場球員,放番拜利落嚟。最後轉番原本既陣式去打埋最後嗰段時間。

以上既原因可見蘇斯克查對中場既信任程度仍然唔大,如果再賣走普巴。除咗要喺中場防守方面作出收購,攻中亦都要收購番一個同普巴實力相若既球員。計番轉頭,條數可能仲變相貴咗。因為啱啱文章第一點都講到,曼聯若然仍然要打一個攻中,只會令到般奴威力減低,所以點計都要有多一個攻中,因此普巴其實喺曼聯入面仍然係重要既棋子之一。


熱曼大戰中顯現普巴既能力對曼聯十分重要

普巴既能力大家都好清楚,可能仲熟過小編。不論佢護波能力、長傳、視野、遠射乜都係頂級。喺呢個比賽當中,大家可以見到曼聯面對泊大巴既球隊,就算有般奴都唔能夠打穿條防線。喺呢個時候,曼聯就要加入更多不同既進攻套路入去,唔能夠再將進攻變得單調。

好可惜,曼聯喺進攻方面既招式唔多,由其現時好多球員都離開咗曼聯。令曼聯Plan B都好似漸漸消失咗。蘇斯克查喺下半場明顯地落咗指令叫兩閘推前做配合,雖然係咁但始終曼聯都係做唔到太多改善。除咗因為兩閘喺進攻方面唔強,傳中既準繩以及威脅唔高之外。曼聯都有一點做得好差,就係快速地轉換兩邊。呢一點小編喺好多曼聯既文章都曾經提及過。

利物浦、曼城等既球隊之所以咁擅長入波或者擅長打破鐵桶陣,其中一個最大原因就係佢地既轉邊既速度好快。佢地無論係中場轉兩邊做得快之餘,兩閘都做到呢一個工作。佢地會多運用長傳去轉邊,而曼聯每一次轉邊都係地波橫傳,由右邊傳到中間再傳到左邊。


解決鐵桶陣除咗要不斷走位、拉扯,令防守球員走錯位、捉甩人之外,快速轉邊都係好重要。因為不斷轉邊先會令防守球員要不斷交換Mark既對象。但當防守一方遇到曼聯呢啲踢法既球隊,佢地就唔會怕。因為每次轉邊都要經過幾次傳送,喺轉換邊線既時間係完全足夠比防守球員重整防線。

曼聯最大問題就係冇球員能夠好有準繩地大腳由左邊轉右轉,或者右邊轉左邊。球隊入面除咗普巴之外真係冇第二人,就算係般奴都唔得。大家睇番佢喺士砵亭嗰陣就知道,喺力度以及準繩方面都掌握得未夠好。然而,普巴喺呢一方面,真係好出色,好似當年既史高斯咁。如果真係要解決大巴問題,普巴真係一個不二之選。加上佢有能力博好多犯規,遠射能力以及創造力都有番咁上下。真係會吸引到好多防守球員既注意。種種因素以及種種能力都見到佢對曼聯非常重要。

市面上真係冇太多個普巴

曼聯其實真係好需要呢啲有能力改變賽果、扭轉比賽既球員,然而老實講現時喺市面上真係冇乜邊個比得起普巴既能力。首先要有番咁上下大份,頂得波揹得位、然後仲要有埋啱啱講既技能,最緊要就要真係踢得慣英超。要喺市面上搵到呢種球員,好老實除咗普巴之外,真係搵唔到太多。



雖然大家可能話曼聯唔洗搵一個同佢完完全全同一樣既球員,小編都好認同。但市面本來已經唔多呢啲球員,難買已經算,仲要擔心佢踢唔踢得慣、踢唔踢得掂英超,真係唔易搵㗎。好似當年迪馬利亞、法卡奧等等既球員,能力真係唔差,但嚟到英超就係水肚不服,你都冇佢符。如果要顧慮咁多野,倒不如留普巴冇咁嬲。

現時夏維斯、雲達碧克呢啲球員的確好有潛能,但係咪能夠順利、穩定發展,真係講唔埋。當年安達臣都攞過金童獎,個個對佢既期望都相當高,但最後既表現都係麻麻。如果最後買咗佢地其中一個,但最後發展又一般,又放走咗普巴。曼聯會唔會變相更加蝕呢?

無論係普巴既能力或者普巴既心態,其實曼聯球迷都好清楚。佢有時真係會令到曼聯愈踢愈沉,但談到需要性,曼聯始終仍然係需要普巴。最近連加特都講到,其實普巴好有心踢。如果佢講既真係屬實,不如大家真係放低之前既諗法,重新再比機會普巴啦。始終般奴既出現,不論係壓力以及互助,都會令普巴成長既。或者真係比小編講中,當初普巴發揮唔到係因為未搵一個球員去解放普巴呢。現時曼聯好似搵到個解放普巴既球員,搵到個可能令普巴改變心態既球員,大家又係咪可以試下重新認識過呢位球員呢?

如果喜歡我們的文章,請即分享到︰

標籤: 曼聯  普巴  

留言

會員
我要評論
請按此登錄後留言。未成為會員? 立即註冊
  • Tsz Fung Cheng
    Tsz Fung Cheng 於 01/07/2020 評論 NO. 1

    你真解釋得好長篇,👍🏻好用心,

快捷鍵:←
快捷鍵:→