一場勝局認清楚幾個事實

洛遊球地 於 21/10/2020 發表 收藏文章
今晚歐聯最矚目既比賽,一定係曼聯作客巴黎聖日耳門既比賽,因為除咗係一場水平接近、高水平既賽事之外,再加上幾個球員既倒戈以及前季曼聯作客奇蹟反勝巴黎聖日耳門,令到今場巴黎更有爭勝心,希望報番一敗之仇。喺講呢場比賽之前,先講一講兩隊最近既背景。

賽前曼聯有好多傷兵,包括麥佳亞、格連活特、拜利等等,另外卡雲尼仍然未能與曼聯一同去到巴黎,除咗係因為卡雲尼既缺戰半年多,狀態成疑之外,佢亦都係啱啱完成隔離,因此今日都冇喺正選或後備名單內。而巴黎聖日耳門亦都有伊卡迪、華拉提等球員受傷,加上幾位球員聯賽停賽或剛傷癒復出,好似迪馬利亞、古沙華等等,而中堅馬昆奴斯亦都係傷癒,狀態唔係十足,所以只能喺後備名單上面。因此兩隊波,其實喺狀態以及人腳方面,都唔係非常完整以及十足。


今場波蘇斯克查放棄勝利十一人,反而排出一個比較保守既陣式,而人腳方面亦都意想不到,好似杜安沙比、費特以及迪利斯正選上陣,令到曼聯球迷喺賽前既擔心以上幾位球員既狀態會唔會差,又有少少期待曼聯會點樣打。今場波明顯見到蘇斯克查有非常大既進步,吸收咗前一場對熱刺大敗既經驗,今場唔再採用普巴搭馬迪,令到防守效率以及速度明顯快咗以及硬淨好多。另外,曼聯同對熱刺比賽,最大分別就係放棄咗控球以及後場猜上去既踢法,改用以往摩連奴打慣既防守反擊,令到曼聯喺後場壓力減少,將好多球員既弱點收埋,好似後場用波唔叻、前場組織力不足等等。

喺講呢場波點樣睇到幾個事實之前,都循例講番少少今場波既表現以及精華。曼聯賽前就排出上季對強隊打得好好既5後衛陣式,門將仍然係選用迪基亞把守最後一關,後場有杜安沙比、迪利斯等球員上陣,而中場就排出3個球員,分別係般奴、麥湯文尼以及費特,前場就交比華舒福、馬斯亞兩位。

馬斯亞(中鋒) 華舒福(中鋒)
般奴(中場中)

麥湯文尼(防中) 費特(防中)

左翼衛(迪利斯) 左中堅(梳爾) 中堅(連迪洛夫) 右中堅(杜安沙比) 雲比沙卡(右翼衛)

迪基亞(門將)


曼聯喺比賽初段就已經進行高強度壓迫,每當對方球員攞到波既時候,曼聯既球員都緊貼對手,由其是當巴黎聖日耳門三位前場球員,包括麥巴比、尼馬以及迪馬利亞攞到波既時候,曼聯既球員都會盡力去壓住對手,唔比對手輕易轉身或者推順。而事實上巴黎喺上半場既攻力都唔算十分強,因為前場少咗一位中鋒球員做支點,另外巴黎上半場主要喺曼聯禁區頂對出做傳控。加上對方少有既跑位入攝以及曼聯後場大量球員守喺禁區頂既位置,令到巴黎儘管攞到大量既控球權,亦都做唔到太大既威脅。雖然威脅唔算十分大,但巴黎都有一兩次算係幾好黃金既機會可以為球隊先打開紀錄,包括迪馬利亞既一次禁區頂燙射以及古沙華一次近門起腳。但兩次非常具威脅既射門都比迪基亞成功救出,令曼聯喺上半場初段仍然力保不失。比賽去到23分鐘,曼聯有憑住對手一次嚴重失誤,成功獲得十二碼。十二碼由上場射失既般奴處理,結果再一次十二碼宴客,喺球速以及角度欠奉下,被基羅拿華斯成功救出。但經VAR Check之後,發現拿華斯喺般奴起腳之前,雙腳已經離開咗門線,令曼聯重獲多一次十二碼機會。而今次般奴就成功射入,令曼聯喺一個唔太好既比賽情況下有領先既機會。比賽去到38分鐘,般奴費南迪斯一腳急墜勁射,直飛右下角,差啲射成0:2,可惜基羅拿華斯成功救出,阻止咗曼聯進一步擴大比數既機會。

下半場巴黎喺開場前,立刻換入堅恩加強攻力以及令球隊喺進攻上面多一個支點,而節奏亦都明顯加快咗唔少,加上進攻人數增加,令曼聯喺下半場受既壓力就更加大。47分鐘,巴黎先有如日中天既麥巴比以一敵二隨即起腳,雖然唔能夠構成入球,但明顯比上半場既威脅更大。及後,因巴黎大量球員壓前,令後場空位多咗好多。而般奴亦都把握到對方失誤,成功將皮球送到落去華舒福腳下。曼聯喺1打2既情況下有極大機會將比數拉開,可惜華舒福非常心急下,將皮球輕易送番比對手,令到曼聯唔能夠擴大比數。55分鐘,曼聯亦都因為馬斯亞防守角球時失誤,擺烏龍令到曼聯被追成平手。66分鐘,蘇斯克查終於有所調動,將迪利斯收起換入普巴。令陣式由原來532改成為442。68分鐘,曼聯主將華舒福一記遠射,成功威脅拿華斯,可惜未能夠成功入球。79分鐘,曼聯再一次透過反擊形成人多打人少既情況,可惜今次般奴唔能夠將皮球橫送,比甘巴比省走,皮球落到華舒福腳下,隨即起腳可惜拿華斯再一次救出華舒福射門。82分鐘,曼聯一次防守失誤,令尼馬有十分多既空位遠射,可惜力度十足角度欠奉,令迪基亞輕鬆撲走。比賽時間去到86分鐘,華舒福憑住對手冇緊貼既情況下,輕鬆轉身隨即起腳,今次射門雖然力度唔係十足,但勝在角度刁鑽,拿華斯力挽狂瀾可惜都係徒然,令比數改寫成為1:2。及後巴黎仍然希望將比數改寫,可惜攻力明顯下降,最後以1:2,再一次喺主場不敵曼聯。

今場比賽之後,曼聯雖然成功全取三分,但仍然只能屈居喺死亡之組第二名,因為同組RB萊比錫以2:0擊敗巴沙克舒希。曼聯喺魔鬼賽程入面,先過一關,而下一場比賽將會重返主場迎戰車路士。


今場波曼聯表現唔係話十分突出,但有幾樣野,確實係比曼聯球迷以及領隊認清。第一,摩連奴同蘇斯克查既差距,摩連奴真係好清楚曼聯打邊家波最好,防守反擊確實係近幾年曼聯最合適既一個打法,就算唔係打防守反擊,亦都絕對唔可以嘗試喺後場猜上去,呢個問題喺上季季尾已經完完全全露曬餡。而今季好多失誤都係喺後場出現,相反今日曼聯放棄控球打法以及放棄後場猜上去,就完全冇咗呢個問題。其實喺後場猜上去冇問題,但大前題係要認清楚對手係打咩波,好似今場巴黎前場壓迫,前場三個球員以及中場三個都係壓前既時候,球隊都唔應該仲打算喺後場做上去。情況就好似對住修咸頓、水晶宮既比賽咁。

第二,就係普巴既重要性。冇錯,眾所週知普巴踢波,真係好講心情但係你不能否定佢既能力以及影響力,下半場當巴黎節奏加快、進攻人數增加而普巴未入替既時候,曼聯受既壓力喺最大、最多,而失球以及最危險既情況都係喺嗰段時間。相反,當普巴入替之後,明顯見到整隊波穩定咗好多,對手攻力都冇咁強,對手都會顧忌普巴。其實情況就好似上季熱刺對曼聯既比賽,當普巴未落場既時候,熱刺好輕易就防守到曼聯既進攻,因為未有普巴落場。但當普巴落場既時候,熱刺就需要搵多一個人跟佢,而曼聯喺有普巴既情況下,喺控制節奏以及威脅性方面,都大咗好多。呢一點雖然唔係十分明顯,但確實完完全全做到一個牽引既作用。喺上季熱刺對曼聯既比賽以及今場既比賽入面,就完完全全做到比大家睇。

第三,就係連迪洛夫真係唔算係一個好差既中堅,喺呢一場高水平既賽事入面,佢完全冇任何失準、失位既情況,加上帶領住經驗欠奉既杜安沙比,亦都非常出色。完全冇嗰種蜀中無大將、廖化作先鋒既感覺。


小編一直都強調一點,就係摩連奴比起蘇斯克查更聰明既,除咗係換人調動方面之外,更佳既就係佢好清楚曼聯每一位球員既強弱項。摩連奴知道曼聯當時唔識點打進攻,佢會選擇以防守為主,運用前場既速度、突破能力,運用普巴既視野以及長傳能力。知道曼聯後場唔識用波,唔會選擇叫球隊喺後場做太多腳下功夫。知道連迪洛夫對抗性唔好,唔會要佢去同啲大隻佬去頂去撞。但相反蘇斯克查喺英超就做齊曬呢啲野,突顯出普巴既慢、連迪洛夫既潺、麥佳亞既頓等等。你地話摩連奴回塘唔識進攻咩?佢又可以帶領球隊入好多波。唔係想踩低蘇斯克查抬高摩連奴,但論到知己知彼,摩連奴真係優勝過蘇斯克查。

第四,就係蘇斯克查更加需要相信自己隊內既球員。當領隊都唔肯相信自己隊員既時候,作為球員既只會愈打愈沉、愈打愈灰。其實近兩場比賽,我地見到好多非常規正選球員,其實一啲都唔差。好似上場馬達、今場杜安沙比、費特等等。當然,每一個球員都會有優點有缺點,但係所謂既勝利十一人狀態以及能力比其他隊員好,我就真係打死都唔相信。其實有時候真係要相信下其他球員,就算有啲球員可能每一場都好Sharp,或者身價好高都好,喺某段時間真係踢得差、冇表現、狀態體能差,就一定要換走。好似今場般奴、馬斯亞咁,其實去到下半場,佢地真係跌Watt跌得好勁,由其是馬斯亞。而後備名單中,係有好多球員可以換走佢地,好似雲達比、占士、恩哈路等等。但係永遠要去到89分鐘或者奠定咗勝局先換,對後備球員唔公平都算,對自己球隊仲要冇任何益處。

其實下半場般奴啲起腳都開始唔準,永遠偏離目標好遠,有一兩球波又傳得好差,而馬斯亞攞親都甩咁制,上半場佢明明做到現身攞波,然後派牌,好似個假9咁,但下半場就真係完全搵唔到佢既角色係咩。喺呢個時候,真係唔可以信任下雲達比、馬達、恩哈路呢啲球員?

今場波曼聯話踢得十分出色,真係未算,始終巴黎明顯地少咗伊卡迪、華拉提,而前場三叉戟又有啲失色,但話曼聯踢得差又一定唔係。今場波見到防中兩個活力十足既球員,費特、麥湯文尼非常搶眼,成功地將尼馬既威脅減到最細。另外中前場既分工以及工作又好清晰,好清楚知道點樣去走點樣去幫波,呢一點確實喺蘇斯克查既帶領入面,好少做到,包括上場對紐卡素都唔得。但今場明顯地係見到球員知道自己做緊乜,成件事真係截然不同。


另外兩位球員既表現亦都令球迷喜出望外,講緊既就係迪利斯同杜安沙比。迪利斯雖然感覺上狀態以及默契可以再提升多啲,但見到佢開角球急勁之餘亦都好準,落點好毒。加上佢好鐘意喺攞波時候,用咗自己個身體去保護皮球先,呢一點明顯係話比大家知,佢喺進攻有一定既意識,同埋會比較穩陣,令人安心。而杜安沙比既表現就更加搶眼,首先身型佔優,幾次都可以贏到麥巴比、迪馬利亞,加上速度又唔輸太多,確實有啲似華拉尼。當然,同華拉尼相比,一定係言之過早同冇得比較,但係喺條件上佢係有啲似華拉尼。只要有多啲比賽既經驗令佢有所進步,去唔到華拉尼既能力,都起碼有七成啦。

呢一場波明顯話比曼聯知,其實曼聯最叻既始終都係防守反擊,如其同某啲球隊爭中場嘅爭控球權,倒不如穩打穩扎打好個防守先。其實532都真係幾適合依加既曼聯,加上梳爾呢位球員,又好似有少少食之冇乜味,棄之可惜,倒不如真係把心一橫打532,迪利斯又可以打左閘,梳爾又可以打左中堅。兩閘又可以因應每場比賽既情況而決定做咩工作,唔洗固定佢地點做,容錯率又高啲,踢法又更立體多變。

希望之後既比賽,可以見到蘇斯克查信多啲勝利十一人以外既球員,唔好當某啲球員傷癒復出,又打回原形。領隊係需要比更多既上陣既機會,球員先會進步㗎。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→