鎚仔的夏季Checklist(教練篇)

鎚仔幫主場 於 02/06/2015 發表 收藏文章
韋斯咸係2014/15球季獲得公平競技獎,可以藉此殺入歐霸盃外圍賽第1圈 (22/6/2015 抽籤),並係7月初進行賽事。在呢段期間,韋斯咸高層又有咩要做既呢?

梗係搵教練先啦!!


大Sam艾拿戴斯因和球會意見不合而離隊,並沒有指明邊個做暫代教練。因此,拿拿臨搵返個新教練係刻不容緩既。人選呢,其實真係唔多......

要求:1. 有歐戰經驗
2. 英式踢法優先,tiki-taka免問

人呢,就唔係冇既,我諗到呢一個姐:



小馬哥迪馬堤奧,曾經教過西布朗、車路士同埋史浩克04。佢成功團結原本係成盤散沙既車仔,仲要帶領呢隊車仔攞埋歐聯,呢段威水史就應該令大家印象深刻,亦係佢最好既CV。

除此之外,小馬哥帶波靠硬 (硬淨中後場) 靠高 (高Q大棍) 靠守 (大巴也) - 完全係韋斯咸既perfect match!!

不過,班主就係嫌大Sam高Q大棍太悶,英式足球呢條舊路似乎唔係班主杯茶。加上小馬哥響對上一份工教史浩克04係俾人問責辭職落台,睇黎佢都係同鎚仔無緣。

然而,外界傳緊韋斯咸斟緊呢個阿sir喎......


睇個樣,你應該唔知呢位大叔姓甚名誰,等我開估啦。呢位大叔叫:比歷 ( Slaven Bilic )。

佢來頭唔細架,球員時代司職後防,(講緊90年代)曾經效力韋斯咸同愛華頓;呢位克羅尼亞前國腳仲教過克羅地亞國家隊 (2006~2012) ,提拔過摩迪歷(Luka Modric),伊度阿度達施華(Eduardo da Silva)。呢段期間, 佢帶領克羅地亞入過兩次歐洲國家盃主賽圈:兩次分組賽都打得有板有眼,結果兩次都飲恨出局( 08年遇着伊度阿度斷腳,12年分組就遇着應屆冠亞軍西班牙同意大利 )。

跟住佢就響莫斯科火車頭 ( FC Lokomotiv Moscow ) 過左一個失敗既球季後,佢就加盟比錫達斯 (Besiktas J.K. ) ,帶領球隊係土耳其超級聯賽排第3。

比歷亦好鍾意利用音樂黎提升士氣,加上佢後防身份,相信對鎚仔既防線有不少幫助。
進攻方面,比歷喜用一個柱躉中鋒:克羅地亞既伊度阿度同文素基治 ( Mario Manzukic ),比錫達斯既丹巴巴亞( Demba Ba );相信佢可以好好地利用沙高同卡路爾。




大前提係佢地兩個唔好傷......

雖然重有傳畢爾包狂人比爾沙 ( Marcelo Bielsa ),歐霸冠軍西維爾領隊安拿利 ( Unai Emery),同阿積士荷蘭名宿法蘭迪保亞 ( Frank de Boer )執教韋斯咸。比爾沙既瘋狂進攻唔適合英超,剩低兩位又點會為英超放棄歐聯呢?因此我冇詳盡介紹佢地。

無論係咩領隊,我都相信鎚仔唔會出現歐戰後遺症既。#COYI
標籤: 韋斯咸  鎚仔  比歷  迪馬堤奧  英超  歐霸  

留言


請按此登錄後留言。未成為會員? 立即註冊
    快捷鍵:←
    快捷鍵:→