你話 Declan Rice 好廢?唔好買囉

鎚仔幫主場 於 15/07/2021 發表 收藏文章

TL;DR: 英格蘭贏唔贏到其實不太關我事,不過有反英球迷諗住搵個靶,然後針住 Rice 嚟鬧,睇唔過眼,所以講吓;如沒聽到批評聲音,請把此文當作一篇韋斯咸球迷吹奏 Declan Rice 的文章。

英格蘭整個歐洲國家盃,場面上固然係一隊西波、極有籤運,但 Southgate 能夠帶英格蘭入決賽已是鐵一般的事實。其中備受批評的一員,就是「飯仔」 Declan Rice – 年資短、有大球會想買,所謂「名大於實」,最適合當做戰靶。尤其中場拍檔 Phillips 在進攻上大放異彩,更在首仗交出助攻,Declan Rice 固然被比下去。

「Rice 憑咩踢正選?出 Henderson 啦」

首先你要知道 Rice 嘅定位。英格蘭嘅後場陣容在於3、4、5後衛之間嘅轉換,從後場安全地建立至前場,任由 Sterling、Kane等好手表演。Rice嘅工作包括攝入兩中堅之間,亦都會喺 Walker 收入之後踢上一格充當防線前屏障。不幸地,英格蘭喺防中/6號位呢個位置無其他人材 – Dier? Winks? 用佢哋不如用 Noble – 至於偏 Box to box 嘅 Henderson 唔係踢 Rice 個位,而係 Phillips 個位。
由於 Henderson 喺歐國盃前有傷,令 Phillips + Rice 呢個組合穩佔正選。除此之外,Southgate 喺歐國盃前嘅熱身賽亦表明 Henderson 都係格硬揀入去,所以 Henderson 嘅出場時間被 Southgate 慳住使。

最後就係,Rice 係 Southgate 親自從愛爾蘭斟佢返嚟。2019年轉籍以嚟都備受重用,經常與 Henderson 拍住踢雙中場,係 Southgate 體系下重要一員;只有喺友誼賽、歐國盃外圍賽對第尾同尾二 (黑山、保加利亞)、世界盃外圍賽對聖馬力諾無踢。你嚟到正賽先嚟嫌佢廢?

「Rice 連 Jorginho 級數都無,邊值 8000萬?」

車路士球迷對此都甚有疑問,雖然我都同意 Rice 去其他球會好易變水貨,不過唔係球員問題,係教練問題。主要係講緊 (Tuchel 就第二個玩法),Solskjaer應該都用唔掂,Southgate 都要調整成7場 (1場友賽 + 6場正賽) 先令飯喺決賽踢得似樣。

「好易變水貨」呢個形容係咩料呢?原因係佢無乜可觀性 – 踢英格蘭嘅飯望落去無咩料到:論傳球,只懂短傳、毫無創意;論防守,身材單薄、能纏鬥但不能硬撞,更常被對手戲弄。

低調嘅飯仔有甚麼重要特質呢?領導能力及戰術意識。喺賽事中仔細觀察 Rice 嘅話,其實會睇到佢參與度高:佢墮後時會指導 Maguire 同 Stones 做傳球過渡、同主場球迷嘅各種互動 – 當你將 Rice 同 Stones、Maguire、Pickford 相比,Rice 明顯更投入、更具感染力,填補到 Henderson 傷出後嘅中後場領導地位。畢竟,呢位22歲國腳已經係韋斯咸副隊長。

踢6號位,最重要係企個好位,方可以透過企好位奪回球權,做搶截 (Tackle)、做攔截 (Interception)。攔截、搶截固然重要,但6號位只是倒數第3條防線,企好位延遲對方攻勢讓防線擺陣同樣重要。在前場失球後,Rice 的對位工作頗為稱職;除對位外,Rice 的成功搶截 (14) 和攔截 (12) 總數原來都係全隊最多 (來源來自 whoscored.com)。Rice的防守真的那麼差?不會吧?


閱讀至此,英迷、非英迷也好,相信都會訝然失笑,嘲笑版主「無嘢搵嘢嚟講」、「Rice 被 Chiesa 欺凌喎?」、「Rice 格硬攔跌 Goretzka 嗰下好白痴」。

先論 Chiesa 一下。飯已經試圖透過犯規解決 Chiesa,拉極都唔跌這個是因為 Chiesa 太強 (球證沒有追頒黃牌這點頗有運)。況且 Rice 已經延遲了 Chiesa 透過推進到達禁區頂的時間,但沒有隊友協防 (特別是中場拍檔 Phillips),一對中堅又對位失敗未能封阻射門,令 Chiesa 差點能直搗黃龍。與其說 Rice 是垃圾,倒不如說這是整條防線的問題,但鏡頭只能捕捉 Rice尷尬的模樣。

然後到 Goretzka,16 強時德國在8分鐘有一單刀機會,Goretzka 成功接應斜線,準備面對門將,Rice 及時犯規阻止射門。Rice 的犯規極冒險,但總算博贏。試想想,為何最後一名場上球員並非中堅,而是追到底的防中呢?中堅被引走,這是中堅問題;但防中能在離球較遠的情況下回追並不用輸十二碼、不用輸紅牌地 (這處有運) 解決對手單刀,已經是接近完美的結局。食咗黃牌後,Southgate 亦能及時調整,令德國在下半場再無還撃之力。

一對英格蘭中堅的盯防並非第一次出問題,決賽又是 Chiesa 有一次沉落左肋,但對位到尾的是防中 Rice 而非中堅 Stones,最後 Rice 閂走輸角球。

足球是團體運動,一個防守球員的窘態不一定是自身問題,更可以是因為其他球員的失敗而起。鏡頭令 Rice 蒙羞,但真正犯錯的只有 Rice 嗎,隊友沒有責任嗎?

在此吹奏 Rice、為我飯辯護,唔係因為 Rice 係英格蘭人,只係因為佢係 One of our own – Not Chelsea’s, not Liverpool’s, but a HAMMER.

所以就建議各位大會球迷,不喜歡 Rice 的,不要買;嫌 Rice 廢的,不要買。他對我們而言很重要,謝謝。

《鎚仔幫主場》Facebook專頁:https://www.facebook.com/hammershome
《鎚仔幫主場》Telegram 頻道:t.me/hammershome
《鎚仔幫主場》的 Fantasy Premier 聯賽邀請碼:hn4uy2

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→