評皇馬對切爾達

Hala Madrid 於 17/03/2019 發表 收藏文章
全場賽事及精華(link

開賽佈局
由於兩個純防中都傷左,中場都冇乜選擇,出晒摩迪同卻奧斯做中場中,皇馬以442/4411開局,伊斯高踢自由人,阿辛斯奧左,巴利右,排陣如下:

1
19-5-4-12
11-10-8-20
22
9

上半場膠著
同其他弱隊作客班拿貝一樣,切爾達一心求和,以防反為主,上半場(及下半場大部分時間)全隊縮後,令皇馬冇空位進攻,而442已盡量拉闊球埸,但不湊效,呢種情況一般要個人盤扭去創造空位,所以關鍵係伊斯高,奈何佢冇態,而且經常背住對面龍,淪為搏腳,而當佢有波在腳嗰陣亦好”論盡”。

話雖如此,皇馬都有幾次反擊機會,亦處理得幾好,唯欠射門。

防守上未見太大考驗,睇唔出切爾達想點,不過有一次好近磅嘅頭槌(要不是拿華斯...);皇馬前場逼搶時,對方亦好騰雞;冇純防中都好夠造。

針對性微調
個勢唔對路,施丹都唔等半場休息就調動:轉巴利打左,阿辛斯奧打右,並上腳用波。此前阿辛斯奧幾乎隱形,而巴利喺左邊亦錄得一記撞眉埋門。雖然整體套路冇變,但進攻生動左。

要知道442唔同433,前者換邊需要兩翼走晒成個球場闊度,難以進攻時順勢實行;但後者可以隨球員走動自然換邊,較有彈性,所以巴利阿辛斯奧換邊係收到order,係真戰術調動。

下半場求勝
施丹下半場強化剛才嘅微調,巴利下半場由開波到收波都打左咁濟,阿辛斯奧喺右邊用波更多,結果佢帶波走左一段,然後畀賓斯馬助攻伊斯高入第一球。

眼見對方進攻乏力,施丹更進取地移前摩迪,效果明顯:右路進攻頻繁,球員間撞牆配合亦多左。值得一提嘅係:摩迪同伊斯高一樣背住對面龍,但前者嘅作用大得多,可見兩者(今場)級數嘅分別。

進取當然有風險,皇馬中後場空間多左,對方反擊亦多左,好彩對面派膠,真係膠到胡呢胡塗,皇馬冇純防中嘅情況下事急馬(摩迪)行田,算施丹棋高一着。

球員點評
拿華斯:受到考驗不大,但都有一次神救

華拉尼:整體中規中矩,上半場左腳一記長傳到好空嘅右邊,都幾靚

拉莫斯:整體考驗不大;有一兩次角球係free header咁濟,不過冇入到;防守上,有次出擊但截唔到波,結果畀對方2打2,好彩對面派膠

Odriozola:呢個真係唔係好惦,雖然好跑得,但係時機錯晒:有次阿辛斯奧向前衝緊,佢喺後面全速向前跑,同自己隊友鬥快咩大佬?另外位置感差:唔少片段見到其他人搵右邊畀波嗰陣,佢唔知去左邊;又有次要開界外球,佢冇出現

馬些路:基本上同平時一樣,而防守上都截唔少波

巴利:表現最好之一,盤扭帶射都有參與,連回防都有,最後亦取得入球,我會畀9/10分。要留意嘅係:佢以右腳射門取得入球,平時亦不時用右腳出波,其實甚少左腳球員嘅右腳咁純熟,你睇洛賓就知,要佢用右腳,佢可能用左腳入左N粒lu

阿辛斯奧:施丹調動前後分別好大,調動後好生猛,可惜右閘不濟,變相孤軍作戰

卻奧斯:同平時一樣,傳波依然高質

摩迪:表現最好之一,上半場攻守兼備,畀佢踢晒咁齊,下半場則移前加強右邊嘅進攻;另外有幾次見佢跑,完全唔似33歲囉,不過施丹都錫住佢,1:0後冇耐就換走佢

伊斯高:除左入球,其餘時間冇乜建樹,施丹63分鐘就換佢,可見一斑;不過佢為球隊開齋,足以補救

賓斯馬:同平時一樣,同隊友嘅配合好好,亦錄得一記助攻,平現幾好

施巴路斯:表現不俗,比起換走嘅伊斯高,施巴路斯更乾脆俐落,換入後加快左球嘅傳送,令進攻變得流𣈱

Mariano:時間太少,加上球隊領先兩球,所以冇機會發揮

Valverde:唔太顯眼
標籤: 皇馬  切爾達  

留言


請按此登錄後留言。未成為會員? 立即註冊
    快捷鍵:←
    快捷鍵:→