評皇馬對伊巴

Hala Madrid 於 10/04/2019 發表 收藏文章
遲來的分析,不過古語有云:遲到好過冇到。雖然今場冇乜意義,但其實都幾多野寫,因為今場牽涉唔同方面,全場賽事及精華

半空/半滿的班拿貝
只有50,284入場人次嘅球賽,加上及後嘅噓聲,都唔知是咪踢緊主場,皇馬以433迎戰,排陣如下

1
19-5-6-23
10-15-22
11-9-20

驚「皇」失措的上半場
皇馬習慣build up from the back,而且鍾意將球分去兩邊,針對呢點,伊巴對皇馬高壓,再加以微調:對皇馬兩閘/兩翼更進一步地緊逼。伊巴出奇制勝,皇馬無所適從,失好多波,但皇馬知道點化解:長傳加球員前插,可惜執行得差,高波變解圍,無計,因為皇馬唔係full team,球員質素或多或少有影響,詳見下面球員點評

伊巴嘅高壓當然有風險,就係防線太前,線後空位多,皇馬其實都好清楚,所以有好幾次嘗試突破越位,可惜不果,而且傳球質素差,有啲through ball唔到位,皇馬上半場嘅進攻大致以呢啲機會為主

另一邊箱,伊巴高壓就係想搏皇馬犯錯,然後突擊,有一兩次咁嘅機會,包括偷到華拉尼嘅波然後傳中,不過想還想,伊巴上半場只有一次射門,攻力有限。而另一個安排係大斜角長傳,務球盡快將波送前,如果自己友接到,就順勢進攻,否則就高壓回搶

總結以上,上半場大部分時間個波及兩隊球員都喺皇馬半場,表現不濟嘅皇馬喺噓聲四起下退回更衣室

神調動
眼見伊巴冇咩板斧,淨係得個逼字,皇馬下半場將計就計,知道自己不時要亂斬上前,就索性喺前場加個點,轉踢442,移前伊斯高。另外兩翼企得好闊,拉空晒球場,可以見到球員間嘅距離比上半場遠得多,由於對方半人釘人,皇馬分開自己球員嘅同時,亦分開左伊巴嘅球員,結果湊效,對方無法如上半場般緊逼,皇馬總算站穩住腳

施丹下半場安排阿申斯奧到右路,其實上半場喺左路佢都表現得臨危不亂,hold到波同造波,下半場尤為明顯,喺右邊時常策動攻勢,要扭要傳,恰到好處,好生猛,加上Odrizola積極嘅走動,阿申斯奧喺右邊畀唔少靚波,充份利用對方高壓嘅漏洞,結果交出一記助攻,為己隊追和

及後施丹換入卻奧斯頂替摩迪、華斯基斯頂替巴利,兩者活動時間不足15分鐘,但表現相當顯著:卻奧斯廣闊嘅視野有利拉闊左嘅陣形,長傳轉邊得以發揮,最後亦助攻予賓斯馬,反勝伊巴;而華斯基斯換入後跟左翼,同左閘、賓斯馬嘅配合十分流𣈱,此前皇馬攻勢集中右邊(因為上述阿申斯奧出色嘅表現),換入後交足功課,差啲助攻(賓斯馬射失空龍)。而被換出嘅摩迪表現麻麻、巴利表現好差,兩個換人都係一加一減,令施丹嘅換人變得更顯著

除此之後,施丹中場休息時畀左球隊4個order,亦可能係皇馬反勝嘅關鍵

球員點評
拿華斯:防守冇咩考驗,不過對方高壓,逼佢斬失/傳失好多波,不過情有可原,畢竟係門將
華拉尼:都幾差,見唔到平時嘅腳下功夫同冷靜,長傳傳失唔少,上半場有次仲被對方偷埋波,完半場時亦被噓,下半場有次畀人扭過,都幾丟架,好彩有隊友包位,否則係半單刀

拿祖:一般,失第一球唔知關唔關佢事:關,可以話佢包左越位,如果佢跟住條防線走,理應企前啲,就好可能截到傳球路線;唔關,可以話佢mark實對方攻擊球員。50/50,基於the benefit of the doubt,當唔關啦

Reguilon:麻麻,對面高壓佢無法處理、局住亂傳唔關佢事(今場應該出馬些路,佢腳下功夫較好),但有一兩次同自己友爭波,結果畀左對方;失波有啲責任,本身mark住入波球員,但唔知點解突然向住個波跑,好似打機有bug咁,無啦啦跟甩左,畀人輕鬆射入

Odriozola:同Reguilon一樣無法應付伊巴嘅高壓,下半場勤力嘅跑動接應唔少阿申斯奧等人嘅靚傳,為右邊帶來唔少攻勢,可惜出波質素一般,冇幾球到位

巴利:好差,面對逼搶,巴利失好多波,腳下功夫曳就不嬲架啦,所以唔係怪呢樣,(你唔會怪後衛入唔到波就係咁解),但有啲犯錯係冇壓力下出現,呢啲就要怪啦,有好幾次好簡單嘅地波短傳都傳失,另外上半場有次反擊帶波都未入到禁區就選擇射,而右閘已經趕到,照理應該傳過去,結果射得離行離迾;完上半場時有一次傳中佢有機會觸球,但佢選擇倒掛,又係唔知射左去邊,完完全全係超級大傻仔嗰隻,你估個波識自動導航咩?下半場亦冇乜起色,有球阿申斯奧嘅靚波撞到佢腳踭,連運都冇埋,慘慘豬

Valverde:不俗,身材高大但都幾靈活,而且跑得都幾快,分波都做得唔錯,可惜同摩迪、伊斯高默契不足,三者唧協調未能為皇馬破解伊巴嘅高壓

伊斯高:稍有起色,上半場有一兩次有威脅嘅傳送,可惜接球者越位,下半場見返佢啲創意,不過都仲有甩漏嘅情況

摩迪:好勤力,上半場見佢踢得好吃力,無他,同另外兩個唔算太夾,獨力難支,而且冇乜大貢獻,下半場失誤較多

阿申斯奧:出色,上半場球隊受制,但佢係陣中少有hold到波嘅球員,下半場搶眼前文已述

賓斯馬:雖然包辦己隊全部入球,但整體表現一般,唔太搶鏡,射失一球空龍,又射中門柱一次,仲有一次半單刀射失,好彩球隊最後贏波

卻奧斯:70幾分鐘上陣,充份利用餘下時間,表現上文已述

華斯基斯:一直覺得佢踢後備好過正選,今場又一例證

Brahim Diza:89分鐘入替,但都不乏機會,走位傳波都同其他人好自然,得嗰幾次控球都畀到我咁嘅感覺
標籤: 皇馬  伊巴  

留言


請按此登錄後留言。未成為會員? 立即註冊
    快捷鍵:←
    快捷鍵:→