單刀出迎要識停 迪奧高哥斯達助葡萄牙保住CS 精選

【 就算要出 都要識得停 】

葡萄牙第一場分組賽賽事，臨完場前門將迪奧高哥斯達 Diogo Costa 差少少就奶嘢畀對手追和，嚇到 C 朗都就嚟爆血管。今場迪奧高哥斯達就叻仔喇，不失球之餘仲以非常精彩嘅大字形 Spread Save 救出對手嘅單刀，幫助葡萄牙以 2:0 擊敗烏拉圭。

－－－－
32 分鐘當時比賽仍然係踢成 0 : 0，烏拉圭球員比坦古亞 Rodrigo Bentancur 喺葡萄牙禁區頂以一敵三。以為一定會被葡萄牙搶返個波，點知比坦古亞一推就過曬三個對手，直面入到禁區內面對面對住迪奧高哥斯達。

迪奧高哥斯達就睇準比坦古亞大步推前一刻，立即走出黎封位。不過迪奧高哥斯達亦都唔係完全唔收掣地衝出去，因為佢知道佢無可能先過比坦古亞掂到個波，所以佢一見比坦古亞準備拉弓，就立即停低準備，半坐低，上身挺直。
然後當比坦古亞射波一刻，迪奧高哥斯達立即做出大字形 Spread Save 姿勢，雙腳以及雙手攤開，盡量封窄比坦古亞嘅射門角度。

其實比坦古亞都已經好醒，明知守門員守正中間嘅單刀多數會做 Spread Save，自然兩隻腳中間就會好大空位，所以即刻射返正中間地波。點知迪奧高哥斯達擴張身體得嚟又無跳得太高，令到佢剛剛能夠以左腳大髀底壓一壓到個波，最後迪奧高哥斯達回身再接返實個波，守得住呢球單刀。

－－－－

推甩腳而且距離門線較近，從來都係一個相對明顯要出迎嘅時機。但守門員同時都要了解自己出迎嘅速度，清楚自己能唔能夠快過對手掂波，如果唔得仲夾硬衝出去又唔停，身體喺一個未準備好嘅狀態係好難做反應撲救，遇到冷靜少少嘅對手見你咁快衝埋嚟，其實輕輕一推橫就扭得過你，再唔係挑起個波笠死你都仲得。
單刀本身守門員已經係相對被動，所以識得揀時機衝，都要識得停。預早準備好自己，盡量提高對手入波嘅難度，咁先係上計。