荷蘭正選門將諾拔知多少 28歲但只踢過51場正式比賽

【 勵志成咁 得唔得㗎? 】

諾拔 Andries Noppert
年齡:28 歲
身高:203 cm
效力球隊:荷連芬/荷蘭國家隊
諾拔喺今場代表荷蘭對住塞內加爾之前,28 歲嘅佢只係踢過 51 場正式比賽,有 34 場係喺對上 12 個月發生。上年嘅今日,佢從來都未曾成為任何球隊嘅正選門將。究竟呢位今屆世界盃身高最高嘅球員,過往幾年經歷過啲咩事呢?

----
。2019 年
諾拔為意乙球隊霍治亞 (Foggia) 嘅後備門將,球季以降班終結,球隊亦無同諾拔續約,短暫時間無班落,不過最終佢成功喺同年9月轉會至荷乙球隊多德勒支 (FC Dordrecht)。

。2020年
由於諾拔受到傷患困擾,不獲多德勒支續約再次無班落,球隊更建議諾拔退役。諾拔嘅太太亦建議佢唔好再踢波,轉行去做警察就算。但諾拔亦然選擇繼續足球生涯,努力操練等待一個機會。

。2021 年
成功加盟荷甲球隊伊高斯 (Go Ahead Eagles),初初只能於本土盃賽上陣,但同樣交出好表現,直至四強輸畀 PSV 燕豪芬之前仍然一球不失。然後由於球隊正選門將同主教練不和,令到諾拔得到喺聯賽上陣嘅機會,生涯終於首次成為球隊嘅正選門將。
諾拔把握機會,成功令到主力護級嘅伊高斯繼80年代後首次連續三場荷甲賽事不失球。諾拔亦都協助球隊自 1978 年後成功首次擊敗勁旅阿積士,更成為該場賽事的最佳球員。
。2022 年
伊高斯領隊轉投荷連芬 (Heerenveen),諾拔亦隨住領隊以自由身身份加盟。而諾拔本身就係喺荷連芬出世,亦都係佢地嘅青訓產品。
作為荷連芬喺 22/23 球季嘅正選門將,曾經作客對住飛燕諾有非常精彩嘅表現,憑住 11 次撲救兼不失球協助球隊搶返一分,成為荷連芬喺 2010 年起計單場做出最多撲救次數嘅守門員。
荷蘭國家隊主教練雲高爾 (Louis van Gaal) 以及守門員教練賀克 (Frans Hoek) 決定徵召諾拔入選,並係佢從未為國家隊上陣嘅情況下,以正選姿態代表球隊踢 2022 年世界盃嘅第一場小組賽賽事。
喺今場對住塞內加爾嘅賽事入面,見到呢位地標戰球員完全無怯場,無論位置感、撲救、出迎、控傳等等亦都非常出色。最終諾拔更加以 4 次撲救 0 失球,協助荷蘭以 2:0 擊敗塞內加爾,打響頭炮。
----

雲高爾喺賽前被記者問到,世界盃第一場就出一個從未為國家隊上陣嘅球員唔會太冒險咩?雲高爾霸氣回應:「用諾拔太冒險?我第一次出雲達沙做正選嗰陣佢得 19 歲咋。」
標籤: 門將  守門員  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→