應付單刀比艾達臣冷靜 曼城後備門將奧迪加表現精彩 精選

【 🎙️望住個波 Come On 一個二個 🎵 】

面對單刀除咗要夠冷靜，識揀時機幾時褪後幾時出迎之外，另一個重點就係要唔好驚波，要睇清楚射門嘅路線。

今季加盟曼城嘅 30 歲德國籍門將奧迪加 (Stefan Ortega) 就喺聯賽盃對住車路士嘅比賽入面做咗一個好好嘅示範，除咗點樣由遠距離單刀應對轉為應對近距離單刀，另外仲憑精準嘅 Spread Save 動作救出對手嘅射門。

————
44 分鐘，佩利錫 (Christian Pulisic) 喺中路推進引咗三個守衛埋身，佢就把握機會傳出直線畀左邊嘅賀爾 (Lewis Hall) 形成半單刀攻勢。

奧迪加首先留意到賀爾即將控球嘅一刻離門仍然有段距離，加上隊友利維士 (Rico Lewis) 有機會包返埋嚟， 所以佢決定一邊褪後拉開同個波嘅距離，一邊併步橫移對返準個波。呢個舉動非常明智，一來為自己爭取時間做反應，二來可以防止賀爾笠射，三來可以為利維爭取時間回防。
相信賀爾見到奧迪加嘅企位以及利維士包緊埋嚟，所以並無第一時間撞射，而係選擇以一下左腳假射呃過利維士，形成一個直接面對奧迪加嘅近距離單刀。

即使係咁，奧迪加並無心急衝出嚟封位。因為個波仍然非常癡腳，賀爾可以隨時起腳。如果奧迪加並無停低做好準備動作而亂咁衝出嚟，賀爾反而會更加容易處理。

最後賀爾嘗試以右腳射返近柱死角，但奧迪加實在冷靜，襯賀爾射門一刻再跳前一步封位。然後以 Spread Save 姿勢擴張身體，望實個波嘅去勢並以右腳擋出射門。

呢球重點除咗在於奧迪加喺呢球單刀同自己仲有段距離以及癡腳嘅時候無亂咁出迎之外，就係佢完全唔驚波。賀爾射門一刻望到實一實，令到佢嘅右腳可以對準個波遞出去擋住個波。

————

坦白講喺奧迪加加盟曼城之前真係無乜留意佢喺德甲嘅表現，只係大概知道早兩季佢喺 PSxG +/- (起腳後預期入球差) 數值上都係排德甲頭幾名，20/21 以及 21/22 球季亦都喺德國傳媒踢球者嘅季度最佳守門員投票當中名列前茅。

當曼城宣佈簽入佢嘅時候我即刻搵佢嘅球王片嚟睇，其中一個最令我眼前一亮嘅，就係佢有唔少精彩撲救都係來自於單刀。 無論遠距離同近距離佢都應對得幾好，遠距離唔會亂咁出（應該好過艾達臣 😂）， 近距離做 Spread Save 亦都非常準確。

所以一路都幾期待睇下奧迪加為曼城上陣嘅表現，而今場佢都無令人失望，除咗呢球單刀，佢另外都做出咗４球精彩撲救，真係想唔為佢出呢個 Stefan Ortega Appreciation Post 都唔得。
P.S. 試當真首世界盃主題曲真心洗腦...