球例解說：門將咩情況下當係已「控制皮球」？ 精選

【 乜又係你呀「控制皮球」 】

英超第11輪賽事，由利物浦大戰曼城嘅比賽當中，除咗雙方門將各自做出精彩嘅撲救，艾利臣亦做出一球非常精彩嘅 Side Volley 助攻之外，繼季初社區盾賽事之後雙方又再再再次出現同「控制皮球」嘅爭議。
事件源自於迪布尼嘅一球直線，艾利臣以及夏蘭特嘗試同時爭波。爭完個波之後個波彈咗畀霍頓，霍頓再射中高美斯彈入網，當時主球證安東尼泰萊並未有表示入球過程有任何犯規。不過經過 VAR 嘅建議，以及安東尼泰萊睇返重播之後，指入球過程夏蘭特曾經做出犯規動作，以拉低法賓奴去重奪皮球展開攻勢，所以決定判入球無效。

咁但係之後艾利臣同夏蘭特爭波過程，其實夏蘭特又有無犯規呢？先睇一睇球例點寫：－－－－
足球球例 22/23
第十二章 - 犯規及不檢行為
2. 間接自由球
守門員在以下情況會被認為已用單手/雙手控制皮球：
．當皮球在他雙手中或處於手部與任何接觸面之間(如地面、自己身體等)或已用手或手臂的任何部份觸及皮球，除非皮球從守門員身上或守門員撲救來球後反彈開的皮球
．當皮球在伸展開的手上
．在地面上來回拍球或將皮球拋向空中
當守門員用單手/雙手控制皮球後，對方球員不能與他爭奪皮球。
－－－－





再睇返當時爭波嘅過程，有球迷指艾利臣未「接實個波」所以夏蘭特應該無犯規。但其實艾利臣係快夏蘭特少少掂到個波或者接近同步接觸個波，再加上艾利臣有一刻已經雙手將個波撳喺地下，變相已經足以形成球例入面「單手/雙手控制皮球」第一點描述。
而夏蘭特喺艾利臣成功「控制皮球」之後或者同時踢中個波，令到個波離開艾利臣隻手，亦都相對明顯地構成「爭奪皮球」嘅動作。所以就算夏蘭特之前無犯規拉低法賓奴，相信 VAR 都會建議主球證睇返爭套皮球嘅重播，同樣地判呢球係詐糊。

而事後英超賽會亦都向 BBC 確認，入球過程係應該有兩個犯規發生，第一下就係夏蘭特拉低法賓奴，第二下就係夏蘭特嘗試爭奪已被艾利臣控制嘅皮球。就算第一下無事都會吹返第二下，只不過因為夏蘭特拉低法賓奴犯規在先，所以 VAR 播完第一條片畀安東尼泰萊睇已經足夠，就算已經準備埋第二下嘅片段，都唔使重播畀安東尼泰萊睇咁解。

另外今次想特別稱讚 Now TV 旁述 Rio Leung Kwun Chung 梁冠聰，因為喺電視重播返近鏡見到夏蘭特踢落已被艾利臣雙手撳住咗嘅波之後，佢已經可以好清晰地講出球例第十二章有提及單手或雙手控制皮球嘅內容，而無需「接實」先計，果然有做足功課 👍🏻