甸恩軒達臣:出走曼聯就係為證明自己

【 家陣啲後生仔唔捱得? 】

相信每個年代嘅人都總會聽到某啲人成日講「依家啲後生仔真係唔捱得,鬧兩句就唔撈,以前我地 ......(下刪一百字)..... 咪又係咁捱過嚟!」或者類似嘅說話。

「嚴師出高徒」理論上係合理嘅,靠著導師嘅嚴謹同埋推動令學生能夠喺最缺乏決心嘅一刻推佢一把,從而成功突破自己。但偏偏有人將呢句理解為喺任何情況下都要非常甚至不合理地嚴格,不公平地對待學生。以為只要愈辛苦愈難頂,不論要求是否合理,咁都肯留低嘅人就係人材,就自然做到汰弱留強,但又係唔係真係咁?

上次講過甸恩軒達臣外借加盟森林之後大吐苦水,表達咗唔少對曼聯嘅不滿。雖然我仍然認為佢喺表達不滿嘅方式有待改進,始終做人公關都好緊要嘅。加上今日唔知聽日事,個圈子其實無想像中咁大,凡事留一線,日後好相見。不過我仍然非常支持佢勇於表達呢方面嘅情感,以及積極向外尋找離隊機會,有非常明確嘅目標以及自信,所以都廢事浪費時間畀坦哈格遊說。

但係當呢段訪問出街之後,仍然會見到唔少人話甸恩軒達臣自己唔好彩邊有得賴,傷完之後又中肺炎,迪基亞季初表現「好」就自然坐穩返正選。仲見到有人覺得甸恩軒達臣應該要喺訓練或者盃賽期間表現自己畀領隊睇自己值得正選,而唔係喺到事後拎出黎講,咁後生應該要捱下先,唔係下下你想要就要畀你。

首先要搞清楚,根據甸恩軒達臣講嘅內容,係曼聯一方先承諾會將正選位置交畀佢,唔係純粹甸恩軒達臣自己想踢但無得踢咁簡單。然而一名 25 歲嘅門將想得到更多出場嘅機會都非常合理,前一季季尾已經踢咗一排正選,然後加上阿仙奴嘅藍斯度又上位成功,然而樸比同莊士東亦相繼轉會以得到更多頂級聯賽正選機會,令到英格蘭喺嚟緊世界盃揀兵嘅時候門將位置真係頭都大埋。明知自己有能力可以踢正選,但球會出爾反爾,承諾會畀正選自己所以拒絕所有外借要求點知都係無得踢,如果再唔為自己前途著數,就真係對唔住自己喇。

早排我喺 Twitter 見到著名 Performance Coach Steve Magness 講過,當我地作為領導者不斷地對部下實施不合理嘅嚴格及高壓行為,你以為自己可以做到汰弱留強,但事實你只係趕走緊一啲知道自己有能力搵其他更好嘅人去領導自己嘅人材。當佢地明知自己 deserve better 嘅時候,點解仲要浪費時間喺到比你咁樣對待自己?

正如如果喺職場上經常被高層無理地不公平地對待,但我明知我有料去第二度得到更好嘅待遇(無論錢定係態度都好)嘅話,點解要屈就喺呢到?相反肯留低嘅,只係一啲知道自己已經無能力搵更好嘅領導者,被逼馬死落地行就繼續屈服於高壓管理之下。我都明知自己嘅能力已經搵唔到第二份更好待遇嘅工作,咁咪唯有頂硬上繼續做落去。

所以其實唔係「依家啲後生仔唔捱得」,係世界進步緊,資訊豐富咗選擇多咗。合理地嚴格能夠帶嚟進步,唔合理嘅對待只會趕走真正有能力嘅人,因為佢地知道個世界好大,東家唔打打西家,點解要無端端不合理地受你氣先?

而講返甸恩軒達臣,琴日對住韋斯咸嘅表現,無論接實迪勤懷斯嘅十二碼又好,其他精彩撲救都好,都睇得出佢好有決心證明「行動勝過一切」。你話我唔捱得?我就話你知唔係我能力嘅問題,只係你走寶。唔知今年世界盃嘅英格蘭大軍名單,唔知最後會唔會出現 Dean Henderson 呢個名稱呢?
標籤: 守門員  門將  龍門  

留言


請按此登錄後留言。未成為會員? 立即註冊
    快捷鍵:←
    快捷鍵:→