借鏡女子守門員克服天生身高劣勢

【 巾幗不讓鬚眉 - 女子守門員的冒起 】

女子歐國盃 2022 正進行得如火如荼,已經差唔多去到四強嘅階段。雖然只係偶爾睇一睇唔同賽次嘅精華片段,但已經睇得出女子足球嘅守門員真係比以往進步咗不少。

而英國每日電訊嘅女子足球記者 Tom Garry 早前就採訪咗幾位前女子足球國家隊守門員,同埋搵咗一啲相關資料,從而得知女子守門員點解近年愈踢愈好,當中發現原來 21/22 球季女子守門員犯錯引致入球嘅次數係少過男子,另外就係靠咩方法去克服平均身高不及男子嘅問題,相信呢樣都應該對大家作為亞洲人有相對高嘅參考價值。

------------
Fewer errors than the men: The truth about women’s goalkeepers
by Tom Garry (報導節錄內容)
------------

.大眾經常睇死女子守門員?
曾經有一位國際知名嘅體育記者講過:「如果女子足球想有進步,就要搵個男人去守龍」,同時另一位就追問:「其實女仔真係會鐘意守龍咩?」,如果你覺得已經夠貶義,大可以再睇埋網上社交平台唔同球迷嘅意見。

其實去到依家呢個世代,當女子足球已經成為職業運動,呢啲咁嘅思想係有幾咁守舊?Andy Elleray 作為一位曾經推出過 8 本關於守門員嘅書嘅守門員教練就最清楚呢一點。Elleray 表示:「女子守門員我肯肯定長期被不公平對待,而且會講呢啲嘢嘅人多數都係網上一啲只係想呃 Like 嘅人,只要有一位女子守門員犯錯,佢地就會講到所有女子守門員都係廢嘅一樣。」

「其實女仔平均地係真係唔會有男仔嘅身體咁有力量,所以事實上係點都會有分別。因為啲人只會望住英超嘅男子守門員然後要求女子做到同樣嘅嘢,但其實身體上嘅分別係絕對有影響。女子守門員會有呢種污名全因為啲人根本唔了解女子足球,佢地根本唔知同男子足球當中有啲咩分別。」
------------

.身高究竟重唔重要?
其中一個男子同女子守門員最大嘅分別就一定要數平均高度,2018 年喺俄羅斯舉辦嘅男子世界盃平均守門員高度係 189 cm,而 2019 年喺法國舉辦嘅女子世界盃平均守門員高度就只有 173 cm。
一個龍門框由 1860 年代開始已經定義咗係係廿四尺闊以及八尺高,一直沿用至今。英格蘭足總依家只會建議 U14 或以下嘅梯隊使用較細嘅龍門,而生物學上女性平均確確實實係會矮過男性,咁呢件事又點樣影響到女子守門員呢個位置呢?

前英格蘭女子國腳 Rachel Brown-Finnis 就話:「正因為我地平均身高相比之下矮好多,變相我地女子守門員嘅敏捷度變得極度重要。另外仲要加埋力量同埋移步嘅技巧令到我地有足夠能力起跳,咁先可以盡量覆蓋整個龍門框。」

「相對無咁高嘅守門員其實喺飛撲嘅時候係會有少少分別。如果你將一個撲救拆做好多微細嘅部分去睇,技術層面上對於一個五尺七吋同一個六尺五吋嘅人比係一定有分別。例如企位可能會比較進取令佢地可以覆蓋更闊嘅範圍。另外仲要識得由控球者身上搵一啲線索去得知佢下一步可能會點做,令到我地嘅反應更快,以及需要處理呢啲球場上嘅資訊處理得更快,因為我地身高嘅限制令我地要做更多先可以救到死角嘅波。」

一啲塘邊鶴就可能會話,咁既然本身個龍門框係為男子足球而設,一係女子足球個龍門整細啲囉,咁好未?而且其他運動都會為女子運動員而有所微調,例如女子跨欄入面用嘅欄會比男子嘅矮。前曼城、紐卡素及昆士柏流浪球員祖爾巴頓曾經都有提過應該要為女子足球作出改變。而車路士女子隊領隊 Emma Hayes 亦都曾經喺 2019 年講過,佢認為大眾經常批評女子足球嘅守門員,我就會話其實個龍門框對佢地嚟講係有啲太大。如果個框可以為男女子嘅分別而作出調整嘅話,佢肯定女子足球嘅守門員都可以好似同男子咁一樣咁勁。
但亦有唔少行內人認為呢個諗法係睇小女性嘅能力,覺得完全唔可行,同埋只要有適當嘅訓練同指導,就自然無需要作出呢啲調整。

曾經係英格蘭足總女子守門員部門成員嘅 Andy Elleray 指:「其實仲有好多其他嘅能力值得我地留意,唔應該再太過集中喺高度上。因為守龍主要係應該追求移步、力量同埋速度。」
------------

.女子守門員的進化史
英格蘭女子足球聯賽喺 2017 年先至正式成為全職運動,即使係一班已經踢開大賽嘅英格蘭守門員嚟講,相信佢地連練波嘅模式都要慢慢適應。

曾經為英格蘭女子隊上陣 82 次而且喺 2012 年奧運代表過 Team GB Brown-Finnis 提到:「自從女子足球變成全職之後,女子守門員呢個專項經過千幾個鐘嘅訓練之後已經成熟咗好多。」

「淨係過往三至四年嘅全職生涯我已經睇到有好大嘅分別。十五年前我地根本無青訓系統,呢班女仔全部一嚟就踢啲好大型嘅國際性青年盃賽,令到佢地年紀輕輕已經好習慣應付一啲好大壓力嘅比賽,變相由細到大都要逼自己做到最好。呢啲歷練令到呢班女子已經好自然地變成一位跟得上潮流嘅摩登守門員,喺比賽當中能夠好好善用自己嘅腳下功夫。」

「我地可以見到依家嘅女子守門員有能夠做到一啲十年前做唔到嘅飛撲,連我自己十年前都做唔到,因為佢地依家嘅情況容許佢地不停訓練同複習唔同嘅情況。呢一啲增加咗嘅訓練時間,令到各位女子守門員都更加勇於出迎處理傳中波,令一班守衛壓力更細,同時佢地嘅腿部更加有力令佢地處理高空波更加得心應手。」

「我19歲嘅時候去咗美國學點樣生波踢 Half Volley ,我終於遇到一位教練有研究同教導呢個專項,因為以往我一直無遇過類似嘅人,令到我好成功地學習到呢個技巧,有更多唔同嘅專屬教練進行唔同嘅訓練,就自然可以學習到更多唔同嘅技術。

Elleray 認同 Brown-Finnis 嘅睇法,佢指「我地喺英格蘭足總非常講求守門員能夠學習到一啲喺比賽用得返嘅技能,只要愈多人願意守龍,我地就會愈有機會搵到更加有能力嘅球員。依家最好嗰班守門員嘅動作真係做得好好,而當中就係夾雜住使出唔同速度嘅能力,而且我會留意佢地會玩啲咩其他運動。」

「有幾位同我合作過嘅守門員,例如阿士東維拉嘅 Hannah Hampton,佢曾經係一個場區球員同埋玩好多其他運動。阿仙奴嘅年輕門將 Fran Stenson 亦都曾經係一位籃網球員 (Netball)。」

「依家有好多地區女子隊都好願意投資落去請一個守門員教練,令到呢個範疇嘅水平高咗好多。連 UEFA 嘅教練課程亦都有包括女子守門員嘅單元。對上四至五年呢方面真係發展得好快,特別係當中嘅知識以及運動科學層面,依家真係可以話係最佳嘅狀態。」
------------

.男子守門員比起女子犯錯更多?

似乎一班女子守門員教練嘅出現,真係幫助到佢地唔少。由英格蘭女子超級聯賽 WSL 嘅資料分析平台 StatsPerform 提供嘅數據顯示,由守門員犯錯引致入球率喺對上三季足足下跌咗 73%。成個 2021/22 WSL 球季,只有四球係由守門員犯錯而引致入球。如果用 WSL 嘅數據同男子英超比較嘅話,2021/22 球季男子守門員犯錯引致入球率更加係女子嘅兩倍。

去返初初 WSL 喺 2011 年創辦嘅數據,當時嘅「由守門員犯錯引致入球率」足足有成 11%,去到 2014 仲上升至 14 %,不過去到近五年都係低過 8% 而且一路下跌緊,而上一季更加係呢項數據第一次 WSL 守門員比起英超男子守門員更低。
Brown-Finnis 認為依家嘅技術分析幫助到一班女子守門員改變佢地嘅思維模式,佢指出:「女子守門員比起男子更加需要有能力去閱讀球賽嘅發展,見到個波嘅來勢同埋直接阻截射門嘅出現,比起以前需要企得更加進取。因為佢地知道如果能夠喺禁區內盡量阻止對方攻門,唔單止對自己有好處,對成隊都有好處,防患於未然先至更加重要。」

「近年足球比賽已經改變咗好多,而守門員嘅角色亦隨之而改變唔少。要能夠好有信心地用波,就好似一位場區球員做守門員咁,就正正係今年我喺女子歐國盃睇到嘅改變。佢地每位守門員都能夠好冷靜地由自己開始組織攻勢,就算遇到對手逼搶都能夠保持冷靜。佢地依家正正做到由組織攻勢同作為最後一道防線都一手包辦。」

「英格蘭現時嘅守門員正選 Mary Earps 完全中曬教練 Sarina Wiegman 對於一位守門員嘅要求。一來佢嘅表現好穩定,唔怕經常提場,而且佢有能力保護整個禁區,仲能夠指揮後防,依家嘅 Mary Earps 係有史以嚟最好狀態嘅佢。」

「 Mary Earps 暫時喺歐國盃仲未失過波(編按:喺剛剛對住西班牙嘅八強賽事終於失咗第一球,但仍然以 2:1 成功出線),佢同英格蘭將會繼續努力爭取球隊有史以嚟第一個國際賽冠軍。希望 Mary Earps 嘅好表現能夠改變一下呢個咁具爭議性嘅運動以及位置,令到更加多人懂得欣賞女子守門員。」
------------

.個人結論
睇完 Tom Garry 呢篇報導,雖然話就話係女子守門員,其實都幾值得我地參考。之前曾經同過一位朋友傾開計講起女子足球,呢位朋友就話其實佢近年盡量留意多咗女子守門員,因為身高同體格上同我地香港男性運動員比較接近,令到參考性更加高。

我聽完又覺得真係駁唔到,以我自己 180 cm 高咁計,如果要我參考艾利臣、紐亞同古圖奧斯其實係不切實際,最多都係睇下桑馬、拿華斯或者卡斯拿斯,但始終都仲係有少少距離。但女子守門員就唔同,矮過我嘅大有人在,但佢地都仍然有能力踢咁高水平嘅國際級比賽,仲要都係守同一個大細嘅龍門,絕對值得參考。

所以事實更加證明我地應該著眼喺一啲我地有能力改變同進步嘅事,例如位置感、步速步法、彈跳力、爆發力等等,而唔係高度呢一啲我地根本無辦法改變嘅事實。高有高踢矮有矮踢,講到尾最緊要搵到適合自己嘅踢法。連女子足球同守門員起跑遲男子咁多,近年都改變咁大進步咁多,男子運動員更加唔應該放棄。
------------

報導全文:
https://www.telegraph.co.uk/football/2022/07/19/womens-euros-2022-goalkeeping-goals-sexism/?fbclid=IwAR3HHjPLXS3tPrujiWBrt0pMcNhhIAU8ud300NtgzsD1nXEAL0plg3yim5w
標籤: 門將  龍門  守門員  

留言


請按此登錄後留言。未成為會員? 立即註冊
    快捷鍵:←
    快捷鍵:→