上一次國際賽週，西班牙國家隊教練安歷基揀咗拉也而唔揀迪基亞，當時佢喺記者招待會已經表達過點解有呢個決定，其實都間接講咗佢認為迪基亞有咩不足。不過今輪佢再次選拉也入隊，記者再次問到呢個決定嘅時候，安歷基都算係非常直接地回答，令人覺得迪基亞如果想重返國家隊實在唔易。
安歷基喺記者招待會講到：「我希望陣中三位門將全部都有能力正選上陣，而我覺得依家入選呢三位球員都有呢個能力。就算佢地任何一位上陣，我都唔會覺得有任何問題。
Unai (烏賴施蒙) 已經累積咗唔少寶貴嘅經驗。一位守門員係應該要有能力成為組織攻勢嘅開端，而且要喺應付高空波佔有優勢。
我需要我嘅守門員可以令到我安心同放心，唔等於佢地永遠唔會犯錯，因為犯錯係足球嘅一部分，而我實在非常欣賞呢三位門將能力為球隊所帶嚟嘅正面影響。」
相常講到咁，你知我知單眼佬都知，其實都真係算幾直接表達佢認為迪基亞偏向保守嘅踢法同佢所需要嘅戰術要求都確係幾唔夾。而曼聯新教練坦哈格其實對門將嘅要求都同安歷基相當接近，究竟迪基亞仲可唔可以喺短時間內改變踢法令兩位教練改觀，定係會慢慢被時代所淘汰，最後需要搵另一隊更加適合佢打法嘅球隊呢？
請按此登錄後留言。未成為會員? 立即註冊