繼續高水準處理單刀 艾利臣冷靜化解致命回傳 精選

【 敵不動我不動 冷靜致勝 】

艾利臣今季嘅單刀表現，相信連唔係利物浦球迷都知佢有幾堅。特別喺利物浦嘅高位防線戰術下，艾利臣嘅單刀應對能力顯得更加重要。而喺剛剛阿仙奴對利物浦嘅英超補賽當中，艾利臣又成功救返利物浦一命，令當時比賽維持喺 0:0，之後利物浦再入兩球擊敗阿仙奴，同榜首嘅曼城只差一分。

首先過程源自於利物浦嘅泰亞高，佢喺無望清楚嘅情況下打算回傳畀門將艾利臣，誰不知阿仙奴前鋒拿卡錫迪突然出現接應呢個直線「助攻」。艾利臣由本身大概企喺小禁區頂嘅位置，立即跑去出迎至拿卡錫迪面前並成功停低準備。

相信拿卡錫迪見到艾利臣企得咁近，立即射門都無乜著數嘅情況下嘗試推橫想扭過艾利臣。但拿卡錫迪呢一腳唔算推得好順之餘，艾利臣亦無過份心急落地，佢只係以前交叉步 Cross Over Steps 橫移對返準個波，令到拿卡錫迪仍然無位射門，只好回後比奧迪加特。
奧迪加特準備接應前，艾利臣再次使用前交叉步橫移對返準個波。奧迪加特控一腳後準備射門，而艾利臣亦已經成功喺佢起腳之前停低做好準備。最後艾利臣用上 Spread Save 姿勢以右手擋出奧迪加特嘅射門，保住張 Clean Sheet。

呢球嘅重點在於艾利臣橫移嘅步法夠快之餘，亦無因為見到拿卡錫迪想推心急撲落地，因為當個波仍然喺拿卡錫迪控制範圍下，盲目撲落去只會增加被扭過、撲跌對手以及被對手踢傷嘅機會。另外艾利臣喺拿卡錫迪以及奧迪加特每一下可以射門嘅觸球前都煞得切制，令身體準備好做反應或撲救嘅動作，呢一點亦非常關鍵。


以上講嘅我諗大家都識同知要點做，但落到場係唔係可以個個都咁冷靜做到呢？講到口都臭埋，但事實有時除咗技術之外，心理質素確係佔比賽表現入面好重要嘅一環。