冇角度射門好易救？位置感、技巧、決定缺一不可！ 精選

【 話咁快又要吹噓「角度唔算刁鑽 救到係應份」嘅撲救 】


首先多謝大家對於早兩日我地因應藍斯度救出哈菲班尼斯頭鎚嘅分析有咁多回應以及支持。坦白講比我想像中更加多人明白到守門員唔係次次都要衝出嚟，收放自如嘅重要性，同埋攻門以及撲波角度唔係唯一嘅重點，實在倍感安慰。只不過估唔到話咁快又有一個類似嘅例子，今次嘅主角係馬體會嘅奧比勒。

歐聯16強次回合賽事，由曼聯主場對住馬體會。首回合嘅時候，我地有提過奧比勒今季喺馬體會嘅戰術調整下仍未適應遠距離單刀處理，喺西甲嘅撲救數據排緊包尾，而且亦都間接令到曼聯嘅伊蘭加成功把握機會追和。
不過今場奧比勒非常醒神，三番四次出迎將傳中沒收之餘，更加有兩球攻門睇落角度唔算刁鑽，但其實同早兩日藍斯度一樣，全靠佢嘅位置感、技巧以及決定都做得好先可以撲得走。
第一球嚟自上半場 13 分鐘，般奴費蘭迪斯喺右路推進。本身奧比勒企緊離近柱大概兩個身位，但當般奴再壓落底線，奧比勒立即企返貼近近柱嘅位置。當般奴傳出一個急勁嘅地波傳中之後，奧比勒並無心急轉身移動，反而只係留喺同一位置，心口對返外面，全因佢一早預判到傳中嘅落點以及留意到將會接應嘅就係空曬嘅伊蘭加。

伊蘭加撞射之後，省中奧比勒嘅頭部，擋出後彈出邊線。有唔少人話，咁都關奧比勒事？伊蘭加省中佢個頭咋喎？首先，奧比勒如果根本無留意到伊蘭加嘅走位，見到一個咁急勁嘅傳中好大可能會轉身追返出去對住可能 12 碼點或者遠柱位置，最後就會畀伊蘭加射返近柱入網。第二就係奧比勒決定唔移步後，見到伊蘭加咁近接應都完全無畏縮，擴張身體封窄對手射門角度，睇落就易，做呢？
做守門員其實好簡單，其中一樣要做好嘅事就係唔好比對方將個波放入網內，你用頭、背脊定腳指尾擋到都好，救到個波就得啦，數據上亦都會計成一個成功撲救，更何況你如果唔識得企係一個適合嘅位置，你連被省嘅機會都唔會有。


第二個撲救就已經去到 77 分鐘，當時由迪利斯喺右路開出罰球。開出後，奧比勒曾經想出迎，但好快發現原來根本出唔切後，立即退後兩步。傳中落點大概為12碼點附近，由華拉尼接迎，而奧比勒後退兩步之後，大概同個波都只係得返8碼距離。
當時華拉尼以一個炮彈式頭鎚攻門，奧比勒保持身體重心傾前增加撲救力量，及後做出小跳步，先以左腳落地轉移重心向右，再以右腳落地增加彈跳力，連同右手臂力將呢個攻門托出。


角度同樣睇落唔刁鑽，但奧比勒同個波距離咁近，加上攻門嘅球速咁快都可以有咁快嘅反應以及力量撲走，全靠準備動作做得好，決定做得準確。就算一開始睇錯以為可以出迎都唔緊要，最緊要盡快修正去返一個最有利自己嘅位置以及姿勢迎接射門，咁就可以大大增加成功撲救嘅機會。