當拿隆馬反面教材 接應回傳的學問 精選 推薦

【 接應回傳的學問 】

歐聯16強次回合賽事，由皇馬主場對住 PSG。繼首回合臨完場入波令 PSG 領先 1:0 之後，麥巴比今場 39分鐘再入多一粒，令 PSG 兩回合計一度領先 2:0。諗住皇馬都唔係咁易可以反 Cup，點知去到 61 分鐘當拿隆馬嘅一個犯錯，令到皇馬追成較接近嘅比數。之後去到 76 以及 78 分鐘賓斯馬連入兩球，令皇馬成功反勝晉級。有唔少球迷都覺得 PSG 嘅球員心理質素實在唔掂之餘，全因當拿隆馬輸壞咗個頭。

皇馬嘅第一個入波嘅過程先由 PSG 左閘紐奴文迪斯回傳開始，當時佢見無位再傳向前就決定回傳畀門將當拿隆馬。而當拿隆馬並無一腳踢走，先控一下個波，之後見到賓斯馬跑緊埋嚟逼搶，佢就撥橫個波想橫傳去球場右邊，相信係想傳比夏基美。

但當拿隆馬想踢走個波嘅一刻，賓斯馬已經逼到埋身，令當拿隆馬完全失曬平衡下撻曬 Cue。雲尼素斯就把握呢個機會追返個波，再傳中畀返賓斯馬射入今場追平嘅一球。


當拿隆馬嘅第一個問題就係當紐奴文迪斯回傳之後，可以見到當拿隆馬嘅身體一直都係面向賓斯馬逼搶埋嚟嘅方向。真係唔知佢係太有自信，覺得之後可以慢慢搞定係太緊張，佢係完全無為要撥橫個波做準備。如果唔係撥橫，以呢個身體姿勢一個大腳向前踢走佢都還好，始終球隊仲領先緊兩球，安全啲都好合理，但當拿隆馬又唔係想大腳，反而想控一控個波先。

控波呢下就係當拿隆馬第二個問題，正常就會控離自己少少，等自己可以唔使再調整個波嘅位置以及唔使助跑下立即可以進行下一個動作（無論大腳又好，橫傳又好，扭過對方都好）。但偏偏當拿隆馬就控到個波貼曬腳，證明佢喺接應之前根本無諗清楚要點處理呢球，控咗個波之後先再諗點算。變相當佢發覺賓斯馬愈逼愈埋身嘅時候，先再望一望右邊好似有隊友有空位，但個波又太貼腳未踢得走住，唯有等個波碌過少少，先再用右腳撥一撥橫，嘗試為自己建立多啲空位去做長傳。
不過好明顯呢一切已經太遲，當拿隆馬想傳走個波嘅時候賓斯馬已經逼到埋身撞到埋嚟，令佢失平衡下交失咗球波，輾轉下益返賓斯馬射入。射門呢下距離太近，救唔到都唔太怪當拿隆馬，但之前嘅過程同當拿隆馬輕敵或者無事前做好準備有莫大嘅關係。

呢球回傳最穩陣嘅處理方法，當然係一腳踢走就算。不過踢得 PSG ，一定對門將要求更加高，而且本身個波同賓斯馬都仲有一段距離，想控多一腳先處理都無可厚非。但控呢一腳前就真係要望曬個球場，知道隊友嘅位置加上要諗定點處理先，而唔係個波上到腳先再諗。

如果當拿隆馬一早諗好想傳去右邊畀夏基美，身體可以一早轉向右邊做好準備先。我當佢唔想賓斯馬預先知自己想傳向右邊，最起碼都控波一腳控離自己多啲而且向右邊控，等佢可以一追返個波就即刻長傳，而唔係控到咁貼腳令自己要等個波郁後再做調整，浪費時間畀對方逼近多幾步，增加自己以及隊友嘅壓力。