或受初段爭議性入球影響 艾利臣少有因「過早出迎」犯錯而失手 精選

【 艾利臣連環不幸事件 】


韋斯咸對住利物浦嘅英超賽事，當中不斷發生具爭議嘅情況，當中唔少得韋斯咸嘅第一個入球。而呢個入波似乎唔多唔少都影響到艾利臣嘅信心，令呢位今季英超單刀撲救王都出奇地因出迎過早而失手。

韋斯咸第一個入球來自一個角球攻勢，當時科拿斯開出內彎角球，近柱嘅奧邦拿準備接應，而艾利臣亦都準備出嚟打手鎚。點知最後艾利臣未能打走個波，反而只係輕輕掂到而令呢球傳中漏入網。

睇返 VAR 重播，可以清楚見到奧邦拿起跳嘅時候係向後跳，而且右手舉高擋住艾利臣。個人認為呢球絕對係衝門犯規，如果奧邦拿就咁起跳都算，但佢隻右手明顯舉高而且撞到艾利臣，所以呢球咁樣都唔吹罰實在較難令人接受。