古惑的亞冠專用波:保羅球失波唔係咁易救

【 日常賽後評 - 亞冠盃 大阪櫻花 對 傑志 - 保羅 】


呢排講咗咁多歐國盃,都要關心下香港球隊踢亞洲賽事嘅情況嘅。傑志之前喺亞冠盃分組賽第一場對住泰港旗開得勝,第二場對住日職聯嘅大阪櫻花,喺丹恩奴域成功打破入球紀錄一刻,相信大家都抱住一個希望可以重演幾年前喺香港大球場擊敗柏雷素爾嘅賽果,再次擊敗日職球隊。可惜下半場 3分鐘內連失2球,最後傑志以同樣比數落敗於櫻花腳下,而傑志失嘅兩球,門將保羅嘅表現似乎受到唔少嘅批評。

首先我今次並唔係覺得保羅完全無問題或者幫佢護航,事實兩球佢都絕對有空間處理得更好,不過都想借呢個機會講下有時睇落好似好易處理嘅情況,實際上都未必有想像中咁容易。
首先69分鐘,大阪櫻花嘅坂元達裕喺右路扭過幾位傑志嘅球員再推落底線,最後傳出一球非常急勁而且貼地嘅近門傳中。當時保羅其實並無選擇地一定要撲出,如果唔係一來有機會變直射入龍,二來遠柱已經有大阪櫻花嘅球員等緊接應。而呢球波咁近傳埋黎加上有返咁上下力度,其實保羅撲出已經算好好反應,但最後撲咗出去畀大阪櫻花嘅泰格,對住空門補中追成 1:1。係咪有可能撲去一個更好嘅位置呢?我相信有嘅,不過當要應付一個本身已經唔易應付嘅傳中,第一下未必諗到太多野,首先要撲得走呢球先,而呢球撲咗畀對方嘅球員,我相信運氣都佔咗一半。


然後第二球就係黎自柏古奴沙嘅一個遠射,我估計離門距離起碼有成34至35碼,角度亦唔算太過刁鑽,但偏偏保羅撲到都照入網,相信呢球都令到大家都好氣憤而且洩氣。睇返一個比較闊嘅片段,柏古奴沙射門一刻保羅剛剛想為呢個射門做準備而後退一步為自己增加反應時間,本身絕對係一個好嘅決定,不過首先我發現保羅後退完企穩一刻其實個波已經飛咗大概 1/3 距離。變相一出一入嘅反應時間無特別增加,仲令到保羅重心有少少向緊後。


然後再加上從龍門後面嘅鏡頭睇到,保羅其實後退完係先踏一步向右,然後再向左落地撲,最後撲咗入網。由於大會嘅鏡頭唔算特別多,實在唔係睇得太清楚個波嘅飛行路線,所以我索性直接問保羅,而佢都指個波真係有啲飄,本身飛緊去佢嘅右邊然後突然喺佢面前轉向飛去左邊,所以殺咗保羅一個措手不及。不過保羅都好大方承認呢下佢想接實未必係最好,明知自己嘅慣性力向緊後同埋失咗位,應該嘗試撲出而唔係接實,因為佢根本無足夠嘅空間同距離畀佢做接實個波嘅卸力動作。最後就係因為保羅嘗試接實而令到佢唔夠力撲走個波,最後形成「撲咗入網」嘅情況。呢球如果佢後退一步嘅決定可以再做快半秒,同埋選擇撲走而唔係接實嘅話,相信情況好大機會會有所不同,不過遇到一個咁飄嘅波,本身重心已經去曬右邊(就好似柏捷斯奧對住夏沙特球遠射一樣)要突然轉向,唔係無可能但亦絕對非易事。


自從王振鵬手指受傷之後,保羅一直都係傑志嘅正選門將。雖然佢嘅資質未必係最好,但既然黎緊嘅比賽似乎都會喺由佢黎把守傑志最後一關,大家繼續支持佢,希望佢喺黎緊剩餘嘅小組賽可以有更加穩定嘅發揮,一齊支持香港球隊同球員!
標籤: 亞冠盃  傑志  保羅  守門員  失波  門將  遠射  

留言


請按此登錄後留言。未成為會員? 立即註冊
    快捷鍵:←
    快捷鍵:→