只要企啱位 巧妙遠射一樣救得到 精選

【 日常賽後評 - 歐國盃 荷蘭 對 烏克蘭 - 史迪基倫堡 】


唔係掛？呢球靚波邊有得救呀？唔知有無講中大家嘅心聲，但其實遠射就好似單刀一樣，係唔係一定無得救？門將技巧上或者判斷上如果做得更好，唔係話一定救到但絕對有能力將射門難度或者撲救機會提升。歐國盃賽事由荷蘭對住烏克蘭嘅比賽入面，烏克蘭將比數追近少少成為 2:1 嘅一球遠射就係其中一個例子。


當時烏克蘭嘅耶莫蘭高同隊友做個撞牆，由右路 Cut 返入中間左腳準備遠射。而荷蘭門將史迪基倫堡本身大概企喺離門2碼倒，當耶莫蘭高 Cut 返埋中間一下，史迪基倫堡移步對返中間，本身都非常正路。不過當耶莫蘭高準備射門一刻，史迪基倫堡稍為被耶莫蘭高個勢吸引咗企出一步，估計佢嘗試企出一步想封多少少位。
耶莫蘭高最後選擇 Chok 一個內彎波，而史迪基倫堡唔單止本身已經企出咗一步，再加上向外嘅 Power Step，令佢差唔多企到離門成4至5碼，個波嘅內彎就剛剛好彎過咗史迪基倫堡，最後入網。


其實有唔少守門員教練都會好著重提醒門將要去主動「攻擊」個波，Power Step 要向斜前踏出，除咗可以進一步收窄射門角度之外，亦可以防止撞埋門柱受傷嘅機會，如果有需要撲出個波亦都可以憑呢個向前嘅力增加反作用力撲得更遠。但係唔係所有情況都適用呢？例如好似呢球咁，史迪基倫堡跳前一步之後再加斜前踏出 Power Step，其實變相令佢唔能夠喺佢個波飛行路線上遇到個波，反而令佢飛撲之後去到一個離個波最遠嘅位置。


如果呢球史迪基倫堡橫移之後，同個波保持足夠距離，盡量唔好離門線太遠嘅話，我相信佢係有能力可以救到呢球。睇返呢球最終過白界嘅位置，其實唔算非常貼柱，假設史迪基倫堡可以企返大概離門2碼倒，除咗可以等個波內彎翻入黎嘅時候先撲個波之外，仲可以憑住呢2至3碼嘅距離增加反應時間再移多一兩步從而到達適合嘅起跳位置。

你可能話，如果耶莫蘭高唔係射內彎波，選擇硬射咁又點呀？我認為即使如果最後耶莫蘭高真係選擇怒 ban 遠柱，由於史迪基倫堡同個波仲有咁遠距離，之前已經講過其實呢個距離企出幾步所封窄嘅角度絕對唔多，相反只會令自己損失反應時間做撲救。

當然，呢球射門實在係精彩，我認為包括我自己在內都唔會同唔應該有人去怪責史迪基倫堡，不過我又相信大家都一定有見過其他門將有成功救過類似嘅遠射。
除咗遠射唔一定無得救之外，今次係想帶出另一點就係其實一個波救到救唔到，唔一定淨係同手法同彈跳力有關，往往喺未起跳之前個結果其實可能已經因為門將嘅企位而大概心中有數。而去到職業級嘅水平，呢啲睇落微不足道嘅分別，就往往足以成為能力上嘅分野。