紐亞:最怕唔識守龍嘅人對我地說三道四

【 紐亞:輸近柱唔一定係錯! 】

德國以及拜仁門將紐亞,以現役門將黎講絕對係我心目中嘅最全面最頂級嘅門將,沒有之一。由2006年佢為史浩克04地標上陣到依家,佢已經喺德甲作出 1171 次撲救。呢位35歲而且剛剛為德國國家隊上陣 100 次嘅門將,接受 The Athletic 記者 Raphael Honigstein 嘅訪問,一齊分析咗 Raphael 心目中嘅 9 大紐亞撲救,當中包括歐聯決賽對住尼馬嘅二連撲以及德國超級盃對住夏蘭特嘅單刀。

今次我就唔譯曬全篇喇,話曬 The Athletic 都係要付費收睇內容嘅平台,都要尊重返記者嘅,所以如果想睇曬全篇訪問嘅話歡迎大家去文章底部嘅 Link 以及訂閱收睇。不過今次我都想節錄少少紐亞喺訪問當中提及過幾個特別嘅撲救以及一啲好重要但唔少人誤會嘅細節。

撲救 1 :2011年2月4號 德甲 對 利雲度夫斯基 (多蒙特)
https://youtu.be/npiAfbtlwLc?t=183
「我出迎唔係為咗型或者上頭條。係要避免一啲潛在危險發生。雖然我離開個禁區成30米睇落好似好危險咁,但點都好過由得個前鋒毫無壓力咁帶住個波推埋黎。但其實今次我係做錯咗,因為我根本唔夠利雲度夫斯基快,但我又無理由去到中間停低,因為佢一定會即刻笠死我。所以我唯有盡力跑,希望跑到去有幾近個波得幾近。雖然呢次做錯決定,但好彩連運都幫埋我。」

「我成日都覺得自己係第11個場區球員而唔係單純一個門將。我以前睇好多雲達沙踢阿積士嘅比賽,佢係我有記憶以黎第一個門將成日都咁主動由後場開始組織同埋出黎清波。喺史浩克嘅時候,當我唔使進行門將訓練,我就會去同場區球員一齊練波。13歲嗰陣連史浩克都有諗過直接比我做場區球員,因為其他門將個個都高過我,但個教練見到我雙親都咁高,我第日應該都會生得再高啲,所以最後都係畀我繼續守龍。依家睇返,教練絕對做咗一個好好嘅決定。」

撲救 2:2020年9月30號 德國超級盃 對 夏蘭特 (多蒙特)
https://youtu.be/ZJq1AVNu6HU?t=117

「呢球傳送非常之好,夠曬深。夏蘭特推到順左腳準備起腳,而佢實在太快,所以蘇利同佢都仲有少少距離。夏蘭特當時得兩個選擇,一係射遠柱,一係就近柱。當時因為我企得夠深所以佢好難笠射,加上唔係人人都鐘意笠射。如果我決定出迎,佢應該就會推過我形成空門。最後佢決定射近柱,其實我都有啲好彩,因為射門嘅高度令到我撲救易咗。而射門角度亦唔算好闊,加上我企咗喺一個好好嘅位置,最後仲成功撲咗畀後衛解圍。」

「對住多蒙特嘅前鋒,由於我地成日都會對佢地,所以唔使做太多資料分析。但當踢緊歐聯嘅時候,我就會分析得好仔細。拜仁嘅守門員教練 Toni Tapalovic 成日都會同我一齊分析下對手啲前鋒同埋後備點樣走位同射門。雖然會需要好長時間,不過努力唔會白費。」
撲救 3:2011年5月4號 歐聯 對 安達臣 (曼聯)
https://youtu.be/KVvN19vV-a0?t=62
「用 Top Hand 嘅原因好簡單,因為可以撲得更遠。當你已經飛緊去一個方向,對住一啲高嘅射門舉起 Top Hand 去撲點都易過用 Bottom Hand。雖然好多人以為係近年先興嘅一種技術,但其實以前 Sepp Maier 美亞同 Oliver Kahn 簡尼(兩位同為前德國及拜仁門將)以前都一樣會咁做。」
「至於幾時用邊隻手,好睇對手嘅位置、距離、有幾多隊友喺我附近、有幾多因素可以影響我嘅決定。我多數都會嘗試接實先,不過都要睇下我有無足夠嘅時間。個波究竟係點樣飛緊埋黎?我有幾肯定可以接實呢個波?練波嗰陣我可能會試接實多啲波,而比賽嘅時候為咗減低風險我會比較多撲走射門。」

世人對門將最大嘅誤解 :
「實在有太多太多喇。例如門將永遠唔應該畀對方射入自己近柱。我成日都聽到一啲根本無守過龍嘅人或者根本無接受過正式門將訓練嘅人講呢樣野。」

「守門員嘅工作其實係非常複遑雜,我地要盡量阻擋所有角度嘅射門,但同時又要準備對方可能唔單止射門,仲可能會做傳送。究竟有無對手完全無隊友看管而又對住個龍門正中間?個波近射手嘅常用腳定係逆足?門將要喺極短時間內計算曬所有野,而同時間有好多其他野發生緊。」

「有時我都會覺得自己諗得太遠,盡量嘗試逼自己唔好做一個完美主義者。畀對方射入近柱有『可能』係犯錯,我唔會反駁呢樣野,但如果話『一定』係錯我就絕對唔認同。我地要獨立每個處境去分析,可能我地作為門將要講多少少一啲同技術有關嘅野,咁大家先會明白每次撲救入面我地究竟諗緊啲咩。」

The Athletic 專訪原文(付費內容)
https://theathletic.com/2624109/2021/06/09/my-game-in-my-words-by-manuel-neuer/?fbclid=IwAR3lCFaQk8xv85hIetHzA9T9iWE12xMb-lNSxxOoaMr6blO4qGNGloKMVNI
標籤: 門將  紐亞  出迎  單刀  撲救  守門員  德甲  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→