艾達臣弱點未改善 歐聯決賽遠距離單刀再失波 精選

日常賽後評 - 歐聯決賽 曼城 對 車路士 - 艾達臣

歐聯決賽，繼前年利物浦對熱刺之後再黎英超內戰，由曼城對住車路士。今次車路士成功以 1：0 擊敗曼城奪得冠軍，而曼城失嘅一球，「又又又」曝露咗艾達臣對住遠距離單刀相對較弱嘅特點...

有留意開呢個專頁嘅朋友應該都知我之前都講過幾次艾達臣喺對住遠距離單刀（離門中心14碼以外）一路以黎都係佢嘅弱點。由於曼城嘅高位防守打法，令到艾達臣喺企位上一向都相對進取，同利物浦嘅艾利臣非常相似。所以當對方打反擊一個直線或者高波吊去最前比前鋒追嘅時候，艾達臣經常要因應球速同埋對方前鋒嘅位置從而決定究竟要出迎，企定係到定係縮後，而呢個決定係講緊可能三秒內就要做到。
今次呢球就係由孟治一個直線放比夏維斯去追，而當畫面影到艾達臣嘅時候佢大概喺12碼附近嘅位置，而個波仲喺夏維斯身後。當個波去到同夏維斯平排，艾達臣就決定全速出迎希望可以快過夏維斯一步踢走個波。但最後夏維斯追到個波準備起腳，艾達臣就剛剛出咗禁區而且同個波仲有一兩個身位嘅距離。夏維斯決定篤一篤前個波想推過艾達臣，艾達臣隻手雖然擋到個波少少但仍無阻個波繼續碌向前。最後夏維斯面對空門射入領先 1：0。


艾達臣似乎喺閱讀呢啲傳送嘅力度同埋預計自己出迎嘅速度上仍然唔夠好，以為自己可以早過夏維斯掂到個波。如果佢一早預計到夏維斯會控制到個波先，佢一定唔會咁快就衝出黎。不過既然決定咗出迎就當然唔好出啲唔出啲，不如試下全力出迎做得幾多得幾多。點知當夏維斯掂波一刻，艾達臣同個波仲有一兩個身位，令佢只可以嘗試封窄夏維斯射門或者推進嘅角度，所以佢就以一個 Block Save 嘅姿態落地。但因為艾達臣已經出咗禁區，佢嘅 Block Save 唔可以太明顯用埋兩隻手，淨係可以靠身體同兩隻腳封封位，大大減低咗呢個 Block Save 嘅成效。最後變相即使艾達臣擋到下個波都唔夠力將個波擋返轉頭，畀夏維斯射入空門。


其實相比起之前艾達臣面對遠距離單刀企定定係到任人射，今次勉強黎講佢都算有進步，起碼唔會企係到將個主導權完完全全交畀對方。可惜都係唔足夠，而最理想嘅處理方法我相信會喺當佢可以閱讀到呢個傳送夏維斯係會可以追到一刻，佢就應該先回後到最少去到小禁區內，逼使夏維斯要再推多幾腳，當佢真係推到入去心臟地帶，就捕捉佢每次推波嘅幅度再作出迎封位。對住遠距離單刀先回後一來如果對方決定咁遠就射就可以增加自己反應時間做撲救，二來拖一拖時間畀隊友回防向前鋒施加壓力。

但單刀始終入嘅成數點都係非常之高，守門員嘅職責唔係一定要救出，而係將射門嘅難度儘量提升。而且門將要喺電光石火一刻諗咁多野做咁多決定絕對唔係易事，但我相信連利物浦艾利臣近期都成功克服到同一樣嘅弱點，艾達臣如果有心改進都絕對可以做到。