國際賽又返黎喇，有唔少嘅英格蘭嘅球迷今次對門將嘅位置有啲期待，因為修夫基「契仔」碧福特因傷缺陣，最後選咗西布朗嘅莊士東入隊。正選門將一席位，如無意外都應該會比好多人都認為一早要做英軍一號嘅般尼門將樸比擔任。
之不過原來樸比嘅成長之路一啲都唔平坦，但係佢就係次次都成功迎刃而解而造就今日嘅佢。英國每日郵報記者 Matt Barlow 就訪問咗一班同樸比合作過嘅一班教練，大家都大讚樸比係一個好球員同埋對佢有今日嘅成就一啲都唔覺得出奇。
每日郵報報導翻譯：
令到樸比可以由連葉士域治都放棄嘅球員變成英格蘭國家隊成員嘅，就係佢把握機會嘅能力。
無論喺查爾頓試腳，外借至低聯賽組別嘅球隊或者喺般尼代替因傷退下火線嘅希頓都好，佢無一次會浪費可以上位嘅機會。
由最熟悉佢嘅人口中，我地可以得知佢上位嘅秘技就係因為佢既冷靜又有好強大但低調嘅決心。
就係佢呢種性格令到佢捱得過每位門將必然會遇到嘅難關，所以我地先會見到29歲嘅佢將會再一次代表英格蘭上陣。
前查爾頓門將教練 Ben Roberts 指出佢非常喜歡樸比呢位球員，當時球會嘅首席球探 Phil Chapple 喺 2010年已經叫我要留意下呢位為貝利上陣嘅後生仔。
「我仲記得佢當時嘅髮形好奇怪，然後因為踢咗10分鐘就撞爆咗個頭，所以個頭包扎到嚇死人。我當時坐咗喺龍門後面，已經足以令到我非常欣賞佢嘅踢法，所以事後我立即邀請佢黎試腳。」
現為白禮頓門將教練嘅 Ben Roberts 對於樸比年青時嘅成長實在係舉足輕重，佢係一位勇於保護自己球員嘅教練。
2014年 12月，比賽踢咗20分鐘查爾頓已經以 0：2 落後比布力般流浪，查爾頓當時嘅領隊 Bob Peeters 立即叫後備門將艾費列治 Neil Etheridge 去熱身。
Roberts 回想返：「我當時坐咗係看台上面，即刻用無線電問佢地想做乜。一眾教練就話領隊想換走樸比，我即刻話你咁樣只會將佢嘅生涯完全摧毀，同領隊講如果佢真係換走樸比嘅話我會即刻離開呢個球場。」
「有一刻我係嬲到即刻用 App Check 下最快返倫敦嘅火車係幾點，去到半場嗰陣我同班教練嘈交嘈得好勁，不過之後領隊好快就冷靜返落黎，無換走樸比比佢繼續踢落去。而樸比亦無令我失望，做出5至6次非常重要嘅撲救，而其實好多門將都有過咁嘅經歷。」
「唔好將錯誤無限放大係一樣非常重要嘅事。如果經常發生而且無進步咁當然係一個問題，但其實令我更加容易了解一位門將嘅能力就係由佢犯錯一刻開始。究竟佢地可唔可以之後喺練波期間反省自己令自己下一場比賽唔會再犯同一個錯？如果位門將做到嘅話，呢個時候你就知道你搵到一位好門將了。」
而呢一種過程其實不停發生喺樸比嘅成長當中。佢外借到 Aldershot Town 嘅表現唔夠好，所以好快就改為外借到英乙嘅 York City 約克城。
約克城嘅主席 Jason McGill 話：「樸比嘅表現實在非常之好，仲帶領埋球隊入到去升班附加賽。你可以睇得出佢嗰種唔使靠出聲都有嘅威嚴感，整定佢會成為一位頂級球員。」
樸比雖然只係為約克城上陣咗22次，但係佢同呢間球會關係仍然非常密切。早前約克城搬主場嘅時候，將舊主場嘅物品以拍賣形式發售。樸比仲成功投得一個舊嘅龍門框。
約克城嘅門將教練 Andy Collet 話：「樸比話佢會擺喺自己屋企嘅後花園，仲講笑話希望佢老婆唔會發現啦。」
Andy Collet 再補充：「我見過有好多球員外借到英甲英乙嘅球隊都好唔適應低組別聯賽嘅文化。例如佢地唔習慣要自己洗波衫同埋要住喺 B&B。但樸比對於要適應呢啲改變上就完全唔覺得係咩問題，佢當時仲更加要同4至5個人一齊 Share 同一間 B&B。」
「依家見到佢喺英超踢得咁好，仲可以代表埋英格蘭國家隊真係非常高與。佢迎對高波能力又好，夠曬主動之餘亦都可以做出一啲令人嘆為觀止嘅撲救。」
樸比之後就外借到貝利，當時終於靠著佢幫貝利成功升班至英甲而吸引到英超球探嘅注意。
當時貝利嘅領隊 David Filtcroft 講到：「佢嘅性格真係無得頂。佢可以做足幾個鐘頭 Gym 之後仲陪班職員一齊玩 Head Tennis ，因為佢想靠玩 Head Tennis 去提升佢嘅控球能力。佢經常會諗點樣可以進步，而且好著重想保持不失，就好似一個射手好想入波咁。」
「佢好勇敢，唔怕會犯錯之餘亦都唔怕同其他人有身體接觸。曾經有一場我地對住史提芬納治，當時佢地嘅領隊 Graham Westley 係一個好鐘意踢燒味足球嘅領隊，每次一有死球就斬入去門將附近。但係當時佢地所有嘅角球同死球都係開短，真係前所未見。」
「呢件事真係令我好難忘。佢地明明最叻就係踢高波，但就係因為佢地知樸比接高波嘅能力太強，如果下下斬入去比佢接實就會要即刻防守反擊，所以完全改變咗佢地嘅打法。」
David Filtcroft 係另一位絕對相信樸比可以應付到成為英軍一號所帶黎嘅壓力嘅人。
「佢嘅性格、做決定嘅能力同埋勇氣就係佢最大嘅優勢。佢行過嘅路一啲都唔容易，佢差唔多達到曬所有必須要嘅測試先成就到今時今日嘅自己。」
「對於勝利同進步嘅渴望對於足球員黎講佔咗好重要嘅位置。樸比唔怕承受壓力，就算全國嘅焦點都放喺佢身上，佢嘅心理質素都絕對有能力應付。」
樸比幫助貝利喺 2015 年升班之後回歸查爾頓，不過當時佢嘅啟蒙老師 Ben Roberts 已經離開咗球隊，由 Lee Turner 接手成為球隊門將教練。
依家已經成為米禾爾門將教練嘅 Lee Turner 話當時樸比正處於人生交差點，佢話：「樸比當時覺得佢繼續留係查爾頓唔係一個最好嘅選擇。當時球隊去咗比利時準備季前熱身賽，我同佢傾咗好耐計，希望可以幫到佢重新出發，同埋諗一套適合佢嘅訓練計劃。」
「佢好鐘意思考，成日都會諗同學習關於足球比賽嘅嘢。佢嘅冷靜踢法令到佢成為一個出色嘅門將，因為往往守門員都好容易變得好情緒化，心情時好時壞，但樸比只會集中喺佢要做嘅事入面。」
「我地經常會用好長時間去睇返佢比賽同練習嘅表現，我好肯定佢依家同般尼門將教練 Billy Mercer 都做緊同樣嘅事。我好開心可以睇到佢有出頭天，因為佢真係一個非常值得人欣賞嘅球員，而且佢可以帶黎一個就算失敗過都可以重新出發嘅訊息比大家。」
樸比好有耐性地終於等到被徵召入英軍嘅一刻，佢自從喺對哥斯達黎加嘅一場友賽入面第一次代表英格蘭上陣之後，三年內一共為英格蘭踢過4場比賽，而喺呢 250分鐘內佢仍然未失過波。
機會又黎喇飛雲，修夫基最信任嘅碧福特因為腹部肌肉受傷而需要缺陣。除咗樸比之外，另外徵召嘅門將有上年11月第一次代表英格蘭上陣嘅甸軒達臣同埋第一次入大國腳名單嘅莊士東。今輪佢地喺世界盃外圍賽嘅對手分別係聖馬力諾、阿爾巴尼亞同埋波蘭。
今次樸比應該又會一如以往地，好好把握今次可以令修夫基刮目相看嘅機會。
報導原文：
https://www.dailymail.co.uk/sport/football/article-9390657/Nick-Popes-cool-head-quiet-determination-helped-England-goalkeeper-reach-top.html
請按此登錄後留言。未成為會員? 立即註冊