文迪示範撲救除咗手法之外步法同樣重要 精選

英超賽事由列斯聯主場迎戰車路士，最後打成 0：0，我就最鐘意呢個賽果，因為多數雙方門將都係有好表現先會出現，而今場美利亞同文迪確係無令人失望，特別係今次嘅主角文迪。

列斯一次攻勢，由羅拔士喺大概離門 25碼嘅距離射一個內彎遠柱嘅波，而文迪呢下應對非常值得大家學習。文迪首先預判到羅拔士呢球將會內彎並笠過佢，所以先後退一步保護返自己同門線中間嘅距離。然後文迪用上前交叉步 (Cross Over Step) 跑向個波嘅軌跡。呢下前交叉步比起平時用開嘅橫移併步可以覆蓋嘅距離更加闊，而且同時令文迪起跳前嘅助跑速度更加高，變相當佢做完前交叉步之後，左腳做 Power Step 起跳嘅時候有更強嘅力度，令佢跳得更高。


最後佢更加使用 Top Hand 令自己隻手可以覆蓋更加高嘅位置，最後佢嘅右手指尖成功輕輕掂到個波，改變咗少少方向，從而令到個波只能撞楣底彈出。
今次文迪就成功示範作為一位門將，撲救除咗手法之外，撲救前同埋中間嘅準備動作同步法同樣重要。呢球即使文迪本身一個咁高手又長嘅球員，都要做好曬呢啲動作先僅僅掂到個波，證明大家真係唔好忽視平時步法嘅訓練，"Never Skip Leg Days" !